再遊濕滯公園

晢晢:「又嚟濕滯公園!? ... 真濕滯...」

呢朝早一起身, 本來諗住求求其去麥當當食早餐就算, 點知爸爸突然提議去濕地公園食, 哈~! 果然係好主意wor~! 橫掂張半年票仲未到期, 一於嘆返吓啦~!

其實濕滯間餐廳只係某大集團o既快餐店, 食物都冇乜特別, 而且呢間d餐仲要有d古怪... 成間餐廳只有不出十數種食物, 仲要晨早流流都有供應飯同下午茶餐~! 不過嚟得呢度都唔係志在食(係嘆個靚景至真)~~~ 所以媽媽都跟住古古怪怪咁叫咗碟洋蔥豬扒飯同雞翼沙律配咖哩角(下午茶餐)做「早餐」~!

望住咁靚o既環境食係咪好正呢?

晢晢都好陶醉啊~!

我哋揀咗張落地玻璃旁o既座位, 望出去就係一望無制o既濕地, 確實心懭神怡~! 不過晢晢好快就畀隔離o既兒童遊樂場吸咗去~! 見到入面o既小朋友個個都除晒鞋玩, 佢又跟住除咗對鞋, 然後意圖逃脫張highchair, 指住叫:「嗰度玩玩呀~~」媽媽:「玩玩呀~~ 得得得, 不過要食埋嘢先wor…」

終於氹掂隻皇帝仔食晒碗洋蔥豬扒飯, 然後就去玩玩啦~~~ 今次係百分百讓晢晢自己爬上爬落, 爸爸媽媽齊齊靠邊站~~又覺得晢晢大個仔咗喇~!

玩完遊樂場就順道探下貝貝, 嚟咗幾次幾次都係呢埋, 今次終於爬咗出嚟見大家(不過都係瞓著咗…), 媽媽問:「Where is the crocodile?」晢晢好醒識指住話:「crocodile 呀~!」叻叻~!  

之後又係主力行內館... (媽媽怕曬啊~~)

晢晢:「呢個啱呀, 嘟嘟丫~!」

(左下圖)以往晢晢入到呢個放映室, 見到片中人物都有d驚, 但呢次就睇得好投入, 仲識揀個靚位(媽媽個大脾)坐定定睇咗15分鐘以上, 直到我哋叫走佢先肯走~! 小朋友果然日日唔同~!

之後因為仲有下場, 所以快快行完內館一圈就要走啦~~ 

晢晢:「吓~! 咁快要走嗱!? 下次可唔可以探下招潮蟹同彈塗魚先走呀?」

媽媽:「冇問題, 我哋搵日再嚟過丫~! 橫掂張票未到期~!」