晢晢B和曉詠 + 靖家的聚會 (二) 21.11.09

晢晢好快當咗喺自己屋企... 一d都唔客氣~!

靖家:「D玩具我都玩厭晒, 你哋即管玩啦, 唔駛客氣~!」

靖家真係好幸福, 有好多好靚又好好玩o既玩具~! (車仔都有兩架!) 曉詠同晢晢都玩到愛不釋手, 仲不時有爭玩具情況~! 曉詠好乖, 當曉詠媽一句:「曉詠, 晢晢哥哥玩緊, 等一陣先」, 曉詠就會點一吓頭, 然後耐心等候~! 相反我哋晢晢B…  當媽媽話:「晢晢, 落車車讓畀妹妹玩一陣啦…」, 晢晢只有加速逃走! 搞到曉詠喊咗幾次呀陰公…!

有片為證, 晢晢冇得抵賴!

 

呢日晢晢可謂吓曉詠吓到盡, 先有爭車仔, 再有攔途截劫, 趁曉詠喺身邊經過時竟然靜雞雞攝隻手出去搶走曉詠件玩具! 最離譜果次係, 晢晢竟然將細細粒o既曉詠夾格拉落車! 可憐o既曉詠就灘喺地上喊… 媽媽呢次忍無可忍, 抦咗鑊金過佢!!! 晢晢嗚咽幾句就講咗句「SORRY」, 然後走佬繼續玩, 都唔知佢係咪真心架!!!?? 不過好在佢哋好快又和好如初… 

曉詠:「晢晢, 食餅餅丫, 我食過, 有我口水尾架~~」

晢晢:「咪搞, 你食過o既~ 你自己食返啦!」

曉詠:「食~~~啦~~~」晢晢(逃走)

曉詠:「唓~! 唔識貨~! 唔食我自己食!」

 

是日我哋晢晢同兩位妹妹玩煮飯仔呀!!

晢晢:「我係gentleman, 同女仔玩煮飯仔冇問題~!」

玩到3點幾, 三小B齊齊吃「TEA」(奶)差差電先~~

三個B一齊開餐~ 夠壯觀呢~!

  

食飽奶, 靖家媽媽就開咗隻寶寶學普通話o既DVD齊齊睇, 個個都睇得好開心~~

 

是日其中一件趣事, 當靖家爸爸返到屋企開門果一刻, 晢晢竟然好開心咁衝埋去攬實人哋個爸爸, 仲熱情過人哋個囡囡靖家~! 真係畀佢笑C~! (晢晢, 莫非你認錯老豆!?) 

另一件趣事係, 當曉詠媽要求曉詠叫細佢一個月但身型比佢高大o既靖家做「妹妹」時, 曉詠竟然堅持話:「姐姐呀!」, 曉詠媽唯有話:「好啦, 好啦, 你咁堅持, 姐姐就姐姐啦~!」 

呢日我哋晢晢B都收穫十分豐富, 先有曉詠妹妹親手入袋o既手指餅, 再有曉詠媽o既珍寶珠, 更有一份大禮物~~

好精美o既數學教本~! 好靚! 好玩!!! 多謝曉詠媽~!

呢份大禮媽媽同晢晢都超級鍾意!! 百看不厭!! 曉詠媽真係十分有心! 媽媽真係講N次多謝都唔夠呀!! 只帶咗兩梳蕉出席o既媽媽真係極度極度唔好意思~! 媽媽話過, 下次見曉詠時一定要補送一份大禮! 到時曉詠媽一定唔可以同我客氣啊!!!  

呢日真係玩得好開心~ 希望大家再有機會約出嚟玩啦~!

小記: 其實呢次係媽媽第1次單拖帶晢晢去街, 心情… 其實好緊張, 身邊冇個照應, 始終有d「毑手唔成世」同「呢咁hea」… 不過呢次經驗又好難忘…  

當我哋離開靖家屋企時, 成朝冇瞓過o既晢晢差不多一出門口就瞓著咗, 得90幾磅o既媽媽要抱住27磅o既晢晢B行千多米到西鐵站都「幾係嘢」! 走到臨到月台前一百米媽媽直頭以為自己會心臟病發… 好在頂到最後一刻, 直到到達旺角東站見到爸爸將肥豬移交(第一次形容晢晢「肥」), 媽媽先鬆一口氣… 結果, 媽媽對手震足一晚, 連拎筷子都冇力呀~!

爸爸問:「你下次仲敢唔敢單拖帶晢晢去街?」

媽媽:「緊係敢! 最多下次停低抖吓先再行過lor~!」