晢晢有趣語錄 – 23個月

某日朱精姨媽請晢晢食咗一條童星點點面, 晢晢食過翻尋味, 朱精姨媽就趁機教晢晢「樹」起手指公講「正~!」, 同晚於婆婆家打邊爐時, 晢晢食咗啖腸仔後就自己「樹」起兩隻手指公話「正~!」 

唔知幾時開始, 每當晢晢想逃離現場時(多數都係見悶或見攰), 就會講:「搭taxi呀, 搭bus呀… 去街街呀… bye bye 姨姨, bye bye叔叔(同在場人仕say bye bye, 見一個bye bye 一個)」 

近來好鍾意主動同人/物件say hello / bye bye… 仲要喺hello / bye bye 後面加個稱呼, 例如: hello 哥哥, hello 妹妹, bye bye flower, bye bye bicycle… 某日媽媽同晢晢一齊搭lift, 一出lift時晢晢向lift內一位外貌同媽媽年齡相約o既女仕講「bye bye 姨姨 x N次」, 果位女仕唔知係咪唔知係咪嬲晢晢叫老佢呢? 竟然黑面, 一句都唔應晢晢呀~! (唏~! 童言無忌, 姨姨你又何必咁小氣呢~? 嘻嘻~!) 

一早起身, 晢晢好想去街時, 就會話:「I’m ready, 去街街~!」 

晢晢搭車時好鍾意講出旁邊經過o既車輛, 例如car(私家車), bus, mini bus, shuttle bus, truck, train (輕鐵 / 地鐵), van, taxi… 當同一時間出現好多架同款車輛時, 晢晢就會話:「嘩, taxi(或其他車), 好多呀~!」 

前排天氣轉冷, 晢晢有兩聲咳, 某天早上晢晢咳完幾聲後同爸爸講:「爸爸, 我咳咳呀~!」

晢晢開始注意儀容整潔, 當食完飯婆婆/爸媽久久未安排抺咀, 晢晢就會話:「婆婆/爸爸/媽媽/姐姐, 我黐立立呀~!」 

當有好壯觀o既場面(例如上次去濕地見到一片「蟹海」, 就會話:「好勁呀!」 

晢晢畀人讚得多, 開始識讚人喇, 最近讚爸爸:「爸爸好叻叻呀!」係因為爸爸整郁架搖控車…  

仲有呢句應該算係晢晢原創, 事原晢晢發音未係好完善, 當讀mini bus 時, 分開mini 同 bus兩個字讀就冇問題, 但一齊讀就會讀成「year bus」, 媽媽為咗抖正佢, 就喺佢講完「year bus」後, 就補句「mini」提醒佢正確讀音, 誰不知以後當佢見到mini bus時就會話:「year bus, mini」~! Shuttle bus情況一樣, 變成「year bus, shuttle」… 激C~! 

呢個月最令媽媽驚訝係呢句有邏輯性o既說話:「冇電呀? 搵爸爸整丫~!」http://hk.myblog.yahoo.com/myadrianbb/article?mid=767