面試記 - 晢晢變了小魔怪 01.12.09

尋日帶咗晢晢去interview, 佢o既表現係從來未見過咁

曳 + 不受控制!!!

過往三次interview, 晢晢都係十分乖巧, 坐定定, 老師問乜就答乜(或畀反應), 叫做乜就做乜... 100%合作!

但呢次! 只有走佬! 走佬! 走佬!

或者晢晢自細就跟婆婆送Yoyo表姐返學, 對學校有一定認識(連人哋d單車收埋喺邊都知呀!!!), 所以一去到, 已經不停同媽媽講:「入去玩玩呀! 我要sir滑梯呀! 要bicycle呀!」

好不容易等到叫晢晢個名入課室面試! 但晢晢就唔肯入課室要玩sir滑梯…

好不容易捉返隻馬騮返課室, 晢晢又不停拎來拎去坐唔定(或者枱面上玩具唔夠吸引)

好喇~! 捉隻馬騮捉到氣咳... 終於… 正式開始小組面試 (每組4人)

老師開始講故事, 上半part晢晢都少許有拎來拎去, 好在到中段開始投入…

老師問:「大象個鼻呢? 河馬個口呢? 老虎隻眼睛呢?」晢晢都能正確指出…

老師再問:「呢隻咩嚟架?」晢晢主動答:「elephant… lion…」(全對~!)

老師又話:「你摸下隻BB雀個咀丫(老師隻指偶公仔)」晢晢肯伸手去摸(旁邊o既小朋友唔敢摸, 驚到喊!)

到老師叫大家唱:「head & shoulder」晢晢由頭唱到尾兼做埋動作…

臨近尾聲時, 晢晢總算捱到最後一分鐘, 冇離座, 反而同組其中一個就喺度喊, 另一個就無啦啦好興奮咁走來走去, 碌來碌去…  

之後到老師單獨同媽媽面談, 老師先提到學校課程偏淺, 主張愉快學習, 功課好少, 只有評估沒有考試, 提醒媽媽要考慮清楚能否接受, 另外又提到學校注重家校合作, 問媽媽平日工作煩忙與否, 有否足夠時陪小朋友, 又問到能否抽空出席學校親子活動等… 媽媽一一如實作答~!  

面談完結後, 我哋就可以離開課室, 晢晢主動講:「bye bye老師~!」

晢晢表現… 總算… 衰… 唔晒…

1月4日派彩, 不過... in得成都係奇蹟…

雖然晢晢表現欠佳, 但媽媽一D都冇失望! 因為上星期六去完聽學校簡介會後, 先知道呢間學校已經冇晒AM位, 新生就算收都只會派到PM班, 媽媽無意入讀, 不過見請咗假, 又畀咗$30報名費, 就即管嚟in見吓攞個經驗…  

感恩係, 今次interview係冇壓力下進行(因為都冇諗過讀), 若果呢間學校係媽媽好著緊的話, 以晢晢o既表現, 媽媽一定嬲到飛起!  而家~~ 得啖笑~~~  

離開學校時, 媽媽抱住晢晢問:「呢間學校好唔好玩呀?」

晢晢:「好玩呀!」

媽媽:「咁你鍾唔鍾意呢度呀?」

晢晢:「鍾意呀!」

媽媽:「喺度返學好唔好呀?」

晢晢:「好呀!」

媽媽: (心諗)「好都冇你份啦~! 你咁曳!」

 

其實interview表現事少, 媽媽反而擔心晢晢突如其來o既情性大變! Interview後媽媽同婆婆傾晢晢問題, 婆婆話可能因為晢晢出牙所以咁反常! 媽媽就叫晢晢張開口! 果然有對大牙正在蓄勢待發! 有點紅腫! 婆婆即刻煲菊花茶畀晢晢飲, 而媽媽又趁晢晢臨瞓前畀支保嬰丹佢食, 今日下午打返去, 婆婆話晢晢今日再冇反常表現, 而今晚同媽媽一齊都同過往一樣, 十分合作… 咁希望尋日咁失常表現真係因為出牙啦~! 又, 希望晢晢出牙o既不適都快d消退... 不過都有可能係TERRIBLE TWO的序幕… 媽媽嚴陣以待, 已返刨緊<你的兩歲孩子>, 晢晢即管放馬過嚟啦~! 不過… 當然...

放媽媽一馬更好~!!