交畀晢晢做!

兩歲呢個年紀之所以畀人感覺唔聽話, 好多時都係因為佢哋有自己主意, 咩都想自己做, 大人愈要干涉, 小朋友就愈反抗! 要避免衝突, 就得放手交畀佢哋做…媽媽開始領悟到一點點…   

某一晚, 媽媽返到屋企如常食婆婆預備o既飯盒, 晢晢就同工人姐姐玩玩東, 玩玩西。 媽媽食飽後, 忽發其想, 刻意一臉認真同晢晢講:「晢晢, 幫媽媽拎個飯盒返廚房!」(咁認真, 係因為媽媽想晢晢覺得呢個係任務而唔係遊戲!) 工人姐姐對媽媽o既舉動有d愕然, 仲想插手制止, 但媽媽用眼神同工人姐姐示意唔駛擔心, 由得晢晢試下! 結果晢晢真係好認真, 小心翼翼將盒飯由客廳搬到廚房, 然後「投」到sink盤中(用「投」字, 因為晢晢未夠高「放」入sink盤, 而媽媽又唔想抱起晢晢, 以免減低獨立自主性!)

其實投放其間晢晢曾經唔小心整跌咗盒中o既匙更, 但地下少少污jo又有咩所謂!? 難得晢晢樂於去做! 之後晢晢keep住認真態度執返起地上o既匙更, 然後再次投到sink盤中! 完成後, 媽媽臉帶微笑跟晢晢講聲:「唔該!」! 之後晢晢眼定定望住媽媽, 似在等下一項任務! 晢晢o既反應似係話畀媽媽廳, 佢對於所以委派o既工作好有成功感! 咁… 下個工作就抺返撻地啦~!

之後o既日子, 媽媽間唔中都會認真地叫晢晢「幫忙」做下家務! 所謂「幫忙」, 其實只係間唔時叫佢將d物件由東搬去西, 然後一件件放好, 最肯做係搬衫! 不過「幫忙」完媽媽其實都要再花時間收拾收拾~! 冇打緊, 晢晢大少你開心就得啦~! 唔知可以維持幾耐呢~!?  

晢晢:「屋企有咩家頭細務就交畀我啦!」