『V』– 24個月

晢晢, 你幾個月前已經開始努力練習呢個『V』字手勢, 有時見你左右手交替協助試圖做出『V』字個專注樣真係好好笑, 可惜一直未能成功。。。

但你好乖啊, 一直都冇放棄, 仍不斷練習! 直到有一晚, 你食緊奶奶時不停講住『TWO TWO TWO』, 媽媽都不以為意, 但突然媽媽發現, 原來你隻左手, 正用母指, 無名指同尾指拎住奶樽蓋, 然後樹起食指同中指做出『V』字。。。 嘩! 晢晢, 你成功啦!! 係呀, 樹起兩隻手指就係『TWO』啦!

媽媽以為你已經做到, 就拎走樽蓋再次叫你做出『V』字, 點知… 原來冇樽蓋你係會手指打結。。。冇打緊, 繼續努力!

直到平安夜, 跟你拍照時我哋隨口say YEAH, 晢晢你竟然非常純熟地做出『V』字手勢! 晢晢, 你終於做到啦!!!

而家, 無論問你幾多歲或者叫你 say YEAH 你都會搭埋個『V』一起作答!

晢晢, 你真係好叻呀!!! 錫晒你!!!