媽媽說故事 – 海龜逃走了

媽媽每晚都會有床邊故事時間, 每次都會隨晢晢喜好而講唔同o既故事, 過往大概3-5日晢晢就會轉新故仔, 不過近來晢晢對<海龜逃走了>呢本故事書情有獨中, 已經連續講咗兩個星期以上喇! 仲要有時連朝早起身都要媽媽或佢自己講一次畀先夠皮~! 認真大癮~!

 <海龜逃走了>故事內容大概係講一隻海龜喺海中暢泳時唔小心跌入魚網, 差d做咗大黑熊o既午餐, 好在得海鷗經過相救, 逃過大難~! 之後輪到海鷗遇險, 腳被海邊o既石頭click住, 又遇正潮漲, 差點浸死, 好在海龜及時幫忙推開石頭方能脫險~! 最後大家互相道謝說再見~!

 

最初講呢個故事時, 晢晢都未有特別反應, 只係坐定定咁聽媽媽講, 不過經過重複又重複, 再加上媽媽加入互動元素, 有問有答, 又加D動作畀晢晢做, 晢晢愈聽愈過癮~! 每晚一到瞓覺時間, 晢晢就會問:「天藍藍, 水綠綠呢?」(書中第一句對白)

 

當媽媽問:「海龜游游吓水, 唉吔! 唔小心跌入咗邊度呀?」

晢晢:「魚~網~!」

媽媽:「大黑熊見到咁佢點做呀?」

晢晢:「拉佢上嚟!」(做埋動作!)

媽媽:「咁海龜畀大黑熊捉住咗咁點呀?」

晢晢:「喊呀, 喊呀… 嗚嗚嗚… 叫救命呀, 救命呀~!」

媽媽:「咁海龜驚驚會點架?」

晢晢:「縮縮縮縮縮…」(縮入龜殼中)

(略…)

媽媽:「海鷗飛到海邊時…」

晢晢:「隻腳腳夾住咗呀!」

媽媽:「d水愈來愈漲咁海鷗點算呀?」

晢晢:「bulubulubulu… 浸死啦! 救命呀~!」

媽媽:「咦~! 海龜啱啱經過, 佢幫海鷗…」(故事發展係講海龜幫海鷗推開石頭, 海鷗順利脫險…)

一講到呢度, 晢晢就會將自己隻腳攝入枕頭底, 然後話:「救命呀, 腳腳夾住咗!」, 之後就會邊講「推」邊推開枕頭, 當雙腳重現時, 晢晢就會話:「好嘢! 腳腳出返嚟啦!」… 之又會要求媽媽扮海鷗遇險, 佢就幫忙推開枕頭救媽媽~!

最後…

媽媽:「海鷗話: 海龜, 好在有你咋, 如果唔係我就冇命架啦~!」

晢晢:「唔駛客氣~ bye bye~!」 

雖然重複又重複咁講呢個故事講到媽媽都有d悶, 但當發現原來晢晢每次都有新領悟時, 咁悶都係值得o既~!

剛剛睇到有關兩歲小孩發展o既書, 原來呢個年紀特別鍾意重複~! 咁好啦~! 媽媽就講到你悶到嘔為止啦~!