幼兒樂園II – 第1堂 06.12.09

晢晢:「今日我生日喎, 都要返學?」

呢期幼兒樂園媽媽改咗朝早10點上堂(上一期係2:15PM), 所以我哋一早就要出門口喇~! 不過呢朝我哋遲到半小時先到, 只怪媽媽論盡帶漏嘢~! 一入到課室已經係唱歌仔環節喇…

唱歌仔時都幾投入架~! 唱緊「哈哈笑~ 哈哈笑~」

今期幼兒樂園除咗Anna之外, 全部都係新面孔~! 可能因為咁, 晢晢成堂都叫住Anna個名~! 明明中間隔咗新同學芝芝, 晢晢都唔理騷擾人, 不停地伸個頭到Anna處say HELLO~! Anna灘咗喺地又走出叫人哋:「Anna起身呀!」, 認真老友鬼鬼~! 

不過今堂晢晢幾曳曳坐唔定, 尤其故事同介紹圖功時間經常周身郁, 又突然大笑! 有時仲曳到灘喺地下! 後來又因為爸爸阻止晢晢玩相機而大喊… 媽媽都冇佢咁好氣咯~!  

臨近聖誕, 婷EE講有關聖誕o既故事, 又介紹聖誕老人畀小朋友認識~! (唉吔! 聖誕係紀念耶穌降世架嘛! 點解基督教機構都會講聖誕老人o既!? 咁耶穌呢!?)

傳緊聖誕老人公仔, 隔離位芝芝同學拎咗都未夠一秒, 晢晢就催人:「畀畀丫! 畀晢晢丫!」

到圖功時間, 今堂係造聖誕咭~! 先係黃色畫紙上用白色顏料模上星形同心形圖案, 再喺聖誕樹上貼上圓形貼紙, 最後貼上咭紙上, 並貼上婷EE預先造好o既祝福語就完成! 晢晢非常快手, 三兩下手勢就搞掂, 不過有d「厭悶」o既感覺, 可能同晢晢平時喺屋企做慣做熟有關, 媽媽或者要考慮減少家中練習, 以免影響晢晢日後上堂學習興趣喇~!

晢晢的作品~! 

到唱遊時間 – 算係晢晢表現最好o既時間 (當然啦~! 唔駛坐定定嘛~)!

跳完舞, 洗過手就係茶點時間~! 先祈禱, 再向同學們講:「各位小朋友食茶點」就開餐咯~! (晢晢將「食茶點」講成「食牙點」, 聽到媽媽耳都側埋!)~!

今餐晢晢食風水梨同蛋糕, 晢晢又玩嘢, 突然又唔食蛋糕喇…

咪以為晢晢咁孝順, 實質係佢自己唔食先「質」畀媽媽食!

之後仲驚C媽媽迫佢食, 嗱嗱聲要求交還餐具 (平時又唔見你咁爽手!)

交完餐具, 跟婷EE say Bye BYE 後就一馬當先放學咯~!

晢晢今堂表現同上期真係好唔同, 明顯地百厭咗, 坐唔定 (幸好仲係可接受程度)… 係咩原因令到晢晢咁呢? 係咪因為對環境同流程愈來愈熟悉有關? 媽媽應該點幫晢晢呢? 爸爸話:「唔通你想晢晢冇反應咩? 你令願佢精靈活潑啦!」爸爸都有道理, 但唔代表媽媽o既憂慮唔成立啊~! 搵機會請教下婷EE先得喇!