幼兒樂園II – 第三堂 20.12.09

晢晢:「今日又遲到半個鐘, 蝕低晒啦!」 

呢朝早天氣好凍, 晢晢兩父子特別好瞓, 所以晏咗起身, 又… 遲咗返學…  

返到去已經係唱歌仔時間, 當爸爸想拎相機影相時, 先發現有機冇咭(超論盡!), 所以今當只係用媽媽手機拍攝, 質素… 都係唔好有要求喇…

睇吓晢晢歌唱仔時段表現~! 近尾聲時開始PAT PAT 痕~!

 今堂晢晢表現同過去兩堂都差不多, 不過媽媽都「化」lu, 而且媽媽再細心觀察, 發現其實其他同學仔都唔係全程坐定定, 有d會拎去後面搵父母, 有d會sir到凳前地面坐, 有d會坐喺媽媽腿上, 有d又會企喺凳上… 而晢晢… 只係出位咗少少, 會扒喺地… 或者企喺凳上跳啫… 都… 唔係… 差好遠啫… 呵…!? (媽媽絶對唔係較, 只係覺得, 大部份2歲小孩確實有佢哋o既共同特徵, 媽媽無需再「大驚小怪」, 甚至「耿耿於懷」!)

今堂因為臨近聖誕, 所以婷姨姨預備咗特別節目畀小朋友欣賞 --- 就係變魔術! 不過晢晢似乎唔多欣賞, 久不久會出位, 而當婷姨姨準備喺晢晢耳邊變出花花時, 眼利o既晢晢即刻指住婷姨姨隻手話:「呢度呀, 呢度呀!」哈哈~~~ 婷姨姨, 你「穿崩」喇! 當晚返到屋企, 爸爸媽媽又係用大同小異o既手法喺晢晢耳中變出萬樂珠, 晢晢笑到卡卡聲, 又一副莫名其妙o既樣, 奇怪點解耳仔會變出糖!? 哈哈~! 都係爸爸媽媽犀利D!!! YEAH!!!! 

婷姨姨表演完畢, 就畀小朋友動動手腳, 齊齊喺課室尋找星星~! 有得郁, 晢晢當然醒晨! 所以好快就已經搵到3粒星星, 成為大贏家! (小小意見: 呢個遊戲如果能安排多起碼一倍數量o既星星會好玩好多! 因為只預備每人平均2粒星星實在未夠挑戰性! 而且小朋友未warm up投入去玩, 遊戲已經玩完!)

 

之後就到茶點時間, 雖然今餐有晢晢唔食o既紅莓乾(基本上晢晢乜果乾都唔食), 不過呢次晢晢都肯主動放入口試味, 而唔係「嚟手就劈」, (雖則試完都係唔食…) 食清晒隻碟後(除咗紅莓乾), 晢晢就主動收拾餐具, 乖仔~!

臨放學時, 婷姨姨預備咗一些聖誕禮物畀小朋友帶返屋企, 個個滿載而歸~!

下兩個星期因為聖誕同新年假期停課兩次, 下次見面要等到明年1月10號咯~!

 MERRY CHRISTMAS & HAPPY NEW YEAR