曉詠妹妹到訪 16.01.10

晢晢自從跟曉詠上次見過面後, 就時時掛住對方, 一個成日叫住「晢晢哥~晢晢哥」, 一個就「曉詠妹妹~曉詠妹妹~」, 叫到人哋心都煩埋 (講笑啫!)~! 為解佢哋相思之苦, 喺剛剛o既星期六, 媽媽就邀請咗曉詠+曉詠媽到我哋家小聚~!

我哋屋企出咗名「百冇」, 都冇咩招呼人, 所以媽媽喺某日lunch就特登走到超市買d手指餅同紅梅乾招呼曉詠, 本來想買埋烏冬, 但C9道行未夠高o既媽媽喺超市兜咗幾個圈都搵唔到!!之後又要趕到書局買曉詠份見面體, 又要趕搭shuttle返公司… 十萬九千個理由下… 最後厚住面皮請曉詠媽帶包即食BB食 + 兩包烏冬過嚟畀兩位小B開餐, 真係超級唔好意思… (嘻嘻…我知曉詠媽唔介意o既~!)

曉詠一到, 媽媽就大顯身手, 煮午餐畀兩位小B食(其實只係用飯煲烚烏冬, 然後淋D現o既汁上面就完成~!), 一向唔好烏冬o既晢晢, 見曉詠食得咁滋味都跟住食咗大半碗, 不過當食到有粟米, 紅蘿蔔同肉粒就好似筲箕咁隔晒出嚟! 曉詠媽終於見識到晢晢幾咁偏食~!  

曉詠上到嚟都見佢玩得好開心(晢晢冇虾佢果陣!), 好鍾意晢晢玩具架上o既玩具, 拎完一個又一個, 又同晢晢一齊擔凳仔, 排排坐~睇魚魚~! 好得意~!

其間我哋又帶咗兩位小B到公園玩, 有媽媽o既協助下, 曉詠終於可以初嘗sir一條又長又曲的滑梯的滋味! (曉詠媽唔敢一個人帶曉詠sir滑梯, 要上下都有人「旁」住先放心)… 從背面見曉詠飛快咁滑下, 頭髮又吹到樹起晒, 就感覺到佢好開心~~~ 晢晢當然唔執輸, 排隊要求一齊sir!

玩到兩位媽媽都散晒之後, 就帶返兩位小B返屋企休息, 呢個時候, 媽媽先記得影相!!! 真失策!!!

晢晢:「呢條魚魚C咗~!」曉詠:「吓, 又有魚魚C咗!?」

晢晢:「畀我攬下啦~」曉詠:「(一手推開) NO WAY!」晢晢:「(扁晒咀)食檸檬添~!」

睇見兩位小B一齊玩時, 深感成長中有個伴真好… 但當兩位小B爭嘢玩或者齊齊攪攪震時, 又會大歎「嘩~揍兩個點頂!?」… 做媽媽真矛盾…

呢日真係好多謝曉詠+曉詠媽到訪, 有空再嚟玩過啦~! (如果唔介意晢晢成日虾曉詠的話~!)