幼兒樂園 – 第4堂 – 10.01.10

晢晢:「放咗兩個星期假, 好掛住班同學仔啊! 」(媽媽:「你掛住呢個扑扑槌咋嘛, 又係玩呢個o既!?」)

今堂晢晢表現算係咁多堂之中最投入, 最坐定定的一堂! 晢晢終於「正常」返啦! 媽媽可以鬆一口氣~!

今堂Anna做小班長, 負責分樂器畀同學仔~!

唱歌仔時間, 只有少量離座(通常都係見人起身又跟住人哋起!), 但只要講句:「晢晢, PAT PAT坐靚靚」, 就會乖乖返回座位, 唔似之前咁, 要捉馬騮~!

到故事時間, 晢晢亦全程投入去聽完整個故事! 今堂係講有關坐巴士的故事, 晢晢好有興趣, 仲不時指住大叫「搭bus呀!」

而今堂的圖工亦是跟故事有關, 就係造一架巴士出嚟! 婷姨姨好有心思, 特別編印咗小朋友個樣, 等佢哋可以成為小司機~! 晢晢睇見好開心啊!

婷姨姨拎咗晢晢張相做示範呀~! (右上圖)

晢晢好專心做圖工架~!

到唱遊時間, 晢晢當然最開心! 媽媽刻意走埋一邊, 由得晢晢一個人站著唱唱跳跳~! 晢晢今堂冇四圍走來走去攪攪震~! 好留心跟著婷姨姨指示做「熱身」, 又隨住音樂同歌詞做動作, 好得意! (最衰爸爸拎埋部相機去廁所, 拍唔到片添!)

今堂播HEAD & SHOULDER, KNEES & TOES, 係晢晢飲歌之一! 晢晢正在指ears & nose~! (用手機拍攝, 效果係咁上下…)

今堂仲有競技遊戲玩, 媽媽依然靠邊站~! 遊戲首先喺一邊拎一個波波, 然後走到對面將波波投入相應顏色o既盒中! 其間晢晢刻意拎住個波走到不相應o既顏色盒前講「NO~」, NO晒咁多個先走到相應o既盒前say「YES」然後放入相應盒中! 真「襟」玩! 不過近尾聲時, 晢晢太興奮, 唔小心跌咗喺凳前, 好在冇乜大礙!

(係影得差d, 做紀錄啫… 頂住先…) 

洗完手, 就到茶點時間, 今堂又係火龍果… 晢晢放咗入口一陣已經想lur, 媽媽唔畀, 就不停慘叫! 最後喺婷姨姨威迫利誘下, 吞咗1粒咁大把! (冇四處lu都算叻架啦~!) 食完火龍果, 就到下一味茶點, 包括: 提子包 + 餅乾 + 紅梅乾 = 晢晢唔好o既食物 (餅仲好少少, 提子包+紅梅乾係晢晢大敵!)… 不過今次有突破, 肯食提子包, 因為咁橋冇提子! 餅都乖乖食晒, 唯獨紅梅乾---免問!

晢晢:「今堂唔知係咪心情靚, 包包特別好味o既!?」

 食飽飽, 收好餐具(又係晢晢主動收拾), 拎過手冊就開開心心放學lu!

今堂表現媽媽好滿意, 希望下堂, 下下堂, 下下下下堂… 都係咁乖就好咯~!