幼兒樂園 – 第6堂 24.01.10

晢晢:「媽媽, 我好眼瞓呀!」

晢晢兩父子真係好鬼懶, 呢朝早唔願起身, 要三催四請先肯起身刷牙洗面換衫, 所以遲咗出門口, 搞到媽媽唔夠時間食早餐, 餓到飛起~! (好在冇遲到咋!)

今堂晢晢有少許扭計, 又有少許離座, 不過都係可接受程度, 唱到第二首歌到先開始投入坐定定~!

完咗唱歌時間, 婷姨姨就拎咗所有紅色o既道具出嚟向小朋友展示(eg: 紅色的狗, 紅色的碟, 紅色的刀…), 原來想話畀小朋友知, 新年就快到, 大家將會四處都見到紅色o既物品啦~! 晢晢睇見D紅色物品, 就話「It is RED~ It is RED~」, 又指住自己張凳:「Hello Kitty, red, 一樣呀!」…

到故事時間, 婷姨姨就拎咗本叫＜大魚＞ｏ既繪本出嚟, 故事入面條大魚又係紅色架~! 小朋友都聽得好投入~!  

婷姨姨教小朋友要細細力摸條魚魚, 大力的話魚魚就會痛架啦~!

完咗故事, 婷姨姨就拎咗盤年吉出嚟, 亦係教小朋友要細細力摸~!

到做圖工時間, 今堂要整一盤年吉出嚟, 即係喺貼有紅色花盤o既畫紙上畫上枝幹同用海綿球印上橙波波, 媽媽交咗畀爸爸負責~!

晢晢都幾畀心機做圖工架~!

完成圖工後, 就到晢晢最鍾意o既唱遊時間, 不過今堂發生咗件小意外… 平時爸爸媽媽多數靠邊站, 然後金精火眼及到實, 但今堂咁啱有幾位家長企喺我哋前面, 晢晢只係離開我哋視線一秒, 就發生小意外了…

意外前, 晢晢仲跳得好高興。。。

意外發生後, 婷姨姨就skip咗唱遊, 直落茶點時間, 今堂晢晢發達啦, 因為伙食唔錯, 仲有晢晢最愛o既 blueberry~!

食飽飽, 放好餐具, 拎埋手冊就放學lu, 之後輪到爸爸媽媽開餐啦!!! (超肚餓!!!)

小記: 今次小意外, 晢晢額頭多咗層樓, 但喊咗幾聲就冇晒事, 而同學仔傷勢… 媽媽唔太清楚, 但就喊到好淒厲, 相信一定比晢晢更痛… 睇返受傷同學爸爸部機 playback, 先知原來係晢晢先撞到人, 真係十分十分唔好意思呢…  

課後餘興 - 1881 Heritage & Harbor City。。。　見時間尚早, 帶晢晢去附近行下影下相~! 晢晢已經好開心啦~!