2010 新年進步 – 再見片片!

一直有朋友以為晢晢已經一早戒片, 但事實並非如止! 雖然晢晢早於10個多月大已懂得表達poo poo, 直到現在都從未「甩碌」, 但wee wee呢, 郤反反覆覆! 其實早於18個月大時, 晢晢係曾經成功懂得用語言「all豬豬呀」表達wee wee, 亦有一段時間係全日冇濕片, 但後來不知何故又不肯再表達, 更有段時間抗拒「all豬豬」! 媽媽跟工人姐姐傾過後, 發現原來姐姐經常頻密地「捉」(或者說成「迫」更貼切)晢晢去all豬豬而令他反感, 所以進度不進反退, 媽媽有見及此, 就暫停wee wee訓練, 靜待晢晢自己的時候… 

直到聖誕假期, 晢晢突然對他的potty產生興趣, 主動要求坐上去wee wee, 更坐到唔肯起身, 不停講:「媽媽, 我all豬豬呀! 好嘢!! 晢晢叻叻呀!」... 呢一刻, 媽媽知道… 時候到了…

一直等到2010年的第一天, 就正式進行為期三天的如厠訓練! 揀呢一日唔係因為有代表性, 而係因為爸爸媽媽放假而已…

　　　　　　　　　　　　　　 

第一天訓練 2009年1月1日(星期五)

一朝早起身, 媽媽就將晢晢腰以下的都脫光, 爸爸話晢晢呢個造型有點… 難為情…

 

開始不久, 晢晢的第一wee就來臨! 或者晢晢對wee wee訓練已有一定根底, 所以第一次已經會講「我all尿呀」同自動走到厠所的potty 上wee wee! 雖則臨坐下時賴咗少少於地上, 但都係好開始! 所以媽媽都有獎佢一大杯蜜糖水以示鼓勵之餘亦增加wee wee次數以便練習!  

到是日第二wee, 晢晢再一次自動走到potty上wee wee, 而且100% wee在potty裡! 距離成功不遠已!!!  

到之後的時間, 雖然曾經都有賴過兩次到地上(兩次都係掛住睇魚魚所以忘記了), 但往後幾次都自動自覺返potty 上冇甩碌~!  

到晚上, 我哋到會所食晚飯, 其間媽媽問咗一次:「晢晢, 有冇豬豬呀?」, 晢晢竟然答我:「街街唔all豬豬架!!」吓!? 喺街街就唔豬豬!? 咁都得!? 不過唔緊要, 媽媽唔會迫你的…  

返到屋企, 發現片片濕了少許, 但一脫掉片片時依然自動自覺到potty wee wee, 所以媽媽對是日訓練仍感到十分滿意!  

　　　　　　　　　　　　　 

第二天訓練 2009年1月2日 (星期六)

呢日爸爸要返工, 所以只得媽媽獨力繼續訓練!但媽媽對晢晢充滿信心, 早上依舊將他下身脫光, 又讓他周屋走, 一樣冇甩碌!! 但呢日晢晢已經唔再用potty, 他主動踏上腳踏, 然後坐上座廁上wee wee!  

到中午時, 媽媽就帶晢晢到婆婆家繼續訓練, 因為媽媽想讓婆婆同工人姐姐知道如何配合! 其間晢晢曾經賴咗兩次於地上, 但其餘時間都是主動走到坐廁上wee wee 的! 即使我們曾經到街上嘆下午茶, 但晢晢都冇便於片上, 一直等到返回婆婆家才主動走到廁所上wee wee!!!

到晚上, 等到爸爸放工回家, 我們又到會所吃晚飯, 其間媽媽又問晢晢:「駛唔駛all豬豬?」呢次晢晢話:「冇豬豬wor~!」好! 媽媽信你!!! 結果到返到屋企真係冇濕片, 而且亦是主動跑到廁所!!!  

是日小插曲: 在婆婆家時, 朱珍姨媽見到晢晢正接受如廁訓練, 就力勸媽媽「要打架!!! 一定要恨心!! 唔可以心軟!!! 咁先得架!!!」媽媽一笑置之, 人人訓練方法不同, 但媽媽堅持不打不罵!!! 媽媽對晢晢有信心!!!  

第二件小插曲, 就係晢晢「坐」於座廁上wee wee的問題, 其實爸爸跟婆婆都有懷疑媽媽的做法, 「男仔唔係應該企喺度wee wee o既咩!?」好在媽媽做足功課, 明白有些男孩於剛開始學習wee wee時會用「坐」的方法, 但只會是過渡期, 過一排就會用返「企」的方法! 結果, 到第二天訓練的晚上(即到會所吃晚飯前), 晢晢就開始主動要求站著wee wee! 晢晢, 你知道嗎? 你的表現就是媽媽最大的支持!!! 加油!!!

　　　　　　　　　　　　　 

第三天訓練 2009年1月3日 (星期日)

其實第二天中午時已經冇再要求晢晢脫光下身, 所以呢一日都唔例外, 有給晢晢穿長褲, 但裡面是「真空」的!

朝早吃完早餐, 爸爸就提議到昂坪360, 開始時媽媽都有點猶豫, 因不想如廁訓練半途而廢, 但又唔想掃爸爸興, 所以就決定出發!  

由大西北到東涌的車程大概1.5小時, 所以媽媽有同晢晢穿片片以防萬一! 到落車時, 晢晢第一句就話:「要all尿呀!」媽媽盡量表現輕鬆以免影響晢晢, 但心裡實在好焦急, 因為車站距離就近的商場都有十多分鍾路程!!! 幸好, 晢晢真的能忍到直到到達厠所才wee wee, 片片仍是乾乾的!!!  

之後的時間, 媽媽只以自己做指標, 媽媽急=晢晢急, 結果全日冇濕片!!! 就算回家前有2-3小時冇帶晢晢到廁所, 晢晢都依然冇失手, 返到家中才主動跑到廁所wee wee!!! 晢晢好嘢!!! 

是次訓練圓滿結束! 晢晢仍需繼續努力啊!!!

 

後感: 是次訓練十分順利, 有賴晢晢合作外, 最重要是配合晢晢的時間表, 媽媽清楚知道晢晢已經準備好才開始, 這樣就可以不打不罵下一樣可以戒到片片!!! 之後o既時間, 媽媽明白戒片初期仍有機會失手, 但唔緊要, 因為咁係正常o既, 而且經過今次經驗, 媽媽肯定晢晢係懂得表達便意, 亦懂得控制, 只要多練習, 相信好快就可以同片片正式say GOODBYE~!  

雖然戒片唔算係咩大成就, 但就對媽媽來講就好鼓舞, 畢竟能夠戒片都是成長的一大印記, 晢晢又邁向成長一大步了!!! 感恩!!!