Anna妹妹到訪 23.01.10

呢日Anna一家到濕滯公園遊覽, 難得咁遠入到嚟大西北, 就順道上嚟我哋屋企小聚啦~! (本來嵐嵐一家都打算上嚟, 但中途遇到小意外, 所以臨時取消咗, 好在各人平安~!) 

成朝冇瞓過覺o既Anna, 一入到屋就見佢呼呼大睡, 瞓到個樣連晢晢都唔認得呀! 媽媽指住Anna問晢晢:「佢係邊個嚟架!?」晢晢諗咗一陣就答咗個百搭o既答案:「妹妹」(平時佢認得Anna架~!) 

Anna差咗大概半個鐘頭電就醒咗, 然後周圍搵玩具玩~! 一時玩下玻璃珠, 一時玩下車車, 一時又拎晒一盒盒玩具排隊, 又時時口up up好多嘢講, 好得意~!  

晢晢同Anna初時都玩得好開心, 會一齊玩玩具, 有時又會CHEERS, 又會一齊食朱古力星星餅, 不過冇耐就論到晢晢扭眼瞓, 開始唔好老皮, 唔多願意分享玩具, 尤其到尾聲玩單車時, 講好咗每人玩廿秒, Anna乖乖follow, 要晢晢等時就喊到豬頭柄咁, 一d風度都冇, 真係失禮晒…  

呢日真係好多謝Anna一家到訪, 又送咗一本好精美o既童書畀晢晢做見面禮~! 下次媽媽到Anna家踩場時一定會送份大禮o既~! (今次媽媽抽唔到時間準備禮物, 真係唔好意思~!)

始終晢晢係獨生子,  媽媽好希望可以畀晢晢多d同小朋友相處o既機會… 所以…

 大家有空就上嚟坐坐啦~!