幼兒樂園 - 第五堂 11.10.09

媽媽: 「晢晢悟空造型好浮誇呀~! 」 

媽媽們：「想逃學!? 唔駛指意。。。」

同學們: 「點解呢位同學仔瞓咗喺哋o既??」

話咁快, 原來已經去到課程o既一半啦~!

呢堂因為遲咗少少到, 晢晢得好少時間warm-up, 加上食過藥, 落車時仍然吽吓吽吓, 媽媽都擔心晢晢會冇心機上堂甚至發脾4, 不過好在都尚算投入…

經過幾堂適應後, 明顯地晢晢同其他同學仔都比開初留心同少咗離座, 喺唱歌同故事時間都可以乖乖坐到15-20分鐘~! 

到圖功時間, 是日做o既手功係「枱墊」, 即係同張畫紙裝飾~! 導師講解後就每人派咗畫紙, 油粉彩, 漿糊同數張細細片手功紙, 然後就齊齊開工! 呢項活動最大o既挑戰係要徒手用漿糊, 導師話好多小朋友都好怕黐立立o既東東, 但媽媽就冇擔心過, 因為晢晢一向好鍾意玩d濕立立o既嘢~~~

到唱遊時間, 晢晢今日玩到high high哋, 唱到一半仲四圍跑, 又追住Anna妹妹, 嚇到人哋雞咁腳咁走~~ 哈哈~!  

到最尾茶點時間, 今次係食提子連椗, 導師話要小朋友自己抆走d椗先食, 又要小朋友咬開一半一半咁食, 因為提子圓碌碌, 成粒食容易啃到, 所以要教佢地咬開… 晢晢一一做到~! 之後導師再派一片包包同數粒小曼頭, 果然不出所料晢晢二話不說將成片包包對畀媽媽(因為佢自己唔食)~! 幸好爸爸叫晢晢share小曼頭畀媽媽同爸爸都樂意分享~~~ 咁就算你啦~!  

放好餐具, 拎埋手冊後就準備放學啦~!

今堂臨走時同導師傾咗幾句, 佢提到呢個階段可以畀小朋友習慣拎自己o既小背包, 裡面可以放毛巾, 小食等物品, 可養成佢哋自己負責自己物件o既習慣~! 導師又講到, 時下好多幼稚園小朋友, 一見到家長/工人姐姐接放學, 二話不說就會掉個袋喺地(連交去對方手上都唔會!), 然後就預咗有人同佢拎咁, 完全冇責任咁!

晢晢, 媽媽唔想你變成咁, 所以你下次去街就要拎返自己個袋啦~!