無「飯」媽媽

晢晢一向有偏食問題(尤其偏向唔食媽媽煮o既飯餸!), 搞到個個weekend餵親飯都頗勞氣!  

某日, 媽媽喺朋友店中餵飯, 晢晢如常 --- 唔食! 朋友就行過嚟, 望咗一眼媽媽手上o既飯餸就話:「呢d嘢人食o既咩!?」… 然後, 媽媽再望下自己手上o既食物… 嘻嘻… 又真係肉酸咗d 既~~~  

其實, 媽媽係有廚藝架 (講完都有少少唔好意思)~! … N年前, 媽媽都曾經憑住煮兩餸一湯攞咗家政科全級第一名架~! 不過煮BB食物, 調味又要少, 煮法又只得蒸蒸烚烚… 完全同煮小菜兩回事架嘛~!  

嗰日, 同晢晢各力咗一陣, 爸爸就勸媽媽放棄唔好再餵, 跟手就走咗去附近o既飯店買咗盒海南雞飯返嚟, 唔駛一陣, 晢晢就食咗大半盒! 仲要係主動張開口「呀呀呀」等你餵~! (晢晢, 留d面畀媽媽好喎…) 

到下個weekend, 媽媽一早起身打算煮晢晢餐飯準備出街, 爸爸就話:「唔好煮啦, 煮咗都唔食! 出街食好過啦, 你又可以抖下, 又唔駛勞氣…」 

咁… 都好o既… 又要煮, 又要洗, 又要花心機餵… 其實都幾攰架…  

諗落, 晢晢一個星期先出街食1-2日啫… 唔算好過份丫…  

好啦… 媽媽從此做「無飯媽媽」啦…  

嗱~~ 係你哋叫我做架咋, 日後唔同人講「我女人唔煮飯」呀!