和爸爸到球場+畀哥哥虾 >.<

剛過去o既星期日晢晢可謂節目豐富, 朝早8點出門口返教會, 之後返幼兒樂園, 放咗學又同爸爸去球場踢波… 一直玩到9點多先停... 

呢日晢晢其實極度唔夠瞓, 但一到球場, 見到一大片草地又精神過來~! 晢晢喺場邊觀察咗一陣就學人帶波, 練咗一陣, 已經成功帶住個波直線跑到一大段路~~~ 小朋友學嘢真係好快~!  

不過… 歡喜之後發生咗件小插曲… 

當媽媽同晢晢喺場邊睇緊爸爸踢波時, 突然有個面燶燶, 似乎等佢爸爸等得好唔耐煩o既小朋友不問自取咁拎走咗晢晢個私家波玩!! 其實呢位咁冇禮貌o既小朋友, 媽媽問心係好唔想借個波佢玩! 但媽媽冇理由同個小朋友斤斤計較, 所以都諗住由佢…. 

可惜冇耐晢晢見自己個波波畀人愈踼愈遠就開始扭計要拎返個波波, 媽媽唯有抱起晢晢同佢講: “借畀哥哥玩一陣啦”… 呢句說話, 仲有晢晢o既叫喊聲, 媽媽肯定呢位小朋友同埋佢坐喺看台上o既媽媽都係聽到的! 但, 佢哋竟然當冇回事!! 媽媽個心係好嬲好嬲!!! 不過, 唔通要我同個小朋友講: “細路! 拎返個波嚟”咩!? … 唯有硬住頭皮同果位小朋友講: “我哋晢晢好想玩波波呀, 你可唔可以同佢一齊玩呀?” 個小朋友依舊好冇禮貌咁答: “唓! 咪玩咯~!” … (全程佢媽媽都睇住, 但冇出過一粒聲!!!) 

一放晢晢落地, 果位小朋友跟本完全冇打算同晢晢玩, 只不段大力射波, 有時仲刻意向晢晢大力射球!!!(似乎拎晢晢出氣!!!) 好在射唔中! 否則我呢位媽媽一定唔會同你客氣!!!  

表面上, 媽媽一直冇刻意做任何嘢去保護晢晢(因為媽媽都想磨鍊一下晢晢), 但事實上係金精火眼!!! 一路睇到實呢位小朋友一舉一動!!!

過咗一陣, 爸爸終於踼完下半場... 呢位小朋友竟然主動開口邀請晢爸: 一齊玩丫! (佢哋唔識! 但爸爸一向好受小朋友歡迎~!) 爸爸當然話好! 但又好醒向呢位小朋友開出條件: 你要細細力踼畀BB喎! 小朋友答應: 好!

開始時, 個小朋友依然都有大力向晢晢射球! 又有刻意拎起個波掟晢晢個頭!(呢次中咗!) 但爸爸好大聲+嚴厲+明確同佢講: 唔.可.以.!!! 然後繼續同佢玩... 漸漸... 我睇到呢位小朋友態度開始軟化, 亦開始見到佢面上有返小朋友應有o既笑容... 冇耐, 佢仲主動抱實晢晢, 又不時問晢晢: 有冇整親呀? 邊度痛痛呀?

呢位只有6歲o既小朋友, 其實原來都好可愛~! 到抵出咗咩問題!? 點解咁細個就會用d咁o既面孔保護自己!? 作為父母, 應該要點做!?

愛係放手還是放任?

愛係責罵還是接納?

媽媽喺爸爸身上上咗一課...