幼兒樂園 - 第六堂 - 18.10.09

晢晢: 「今日揹咗個書包仔呀, 有型嗎?」

晢晢又係揀返揼揼玩具, 乜唔厭o既咩??

今堂o既主題似乎係「波波」, 因為無論故事, 歌仔, 圖功同唱遊都同「波」有關~!

婷姨姨問: 「邊個小朋友想要樂器呀?」晢晢一馬當先舉手, 所以佢就可以先出去揀樂器~~~

今堂有少少唔同, 過往分樂器時係導師拎成個樂器箱到小朋友面前叫佢哋揀, 今堂就係叫佢哋行出位揀, 揀完再要求佢哋返自己位~! 晢晢做得唔錯呀~!  

到故事時間, 今堂由另一位導師余姨姨主講, 媽媽有d覺得講得有少許急, 不過可能題目受小朋友歡迎o既波波, 所以佢哋都聽得幾留心架~!  

完咗故事, 婷姨姨就拎咗個汽球出嚟邊泵邊唱 「吹呀吹呀吹個大波波 X 3… 小心吹破」(一首好得意o既歌仔), 之後本打算讓小朋友感受一下風由汽球噴喺手板上o既感覺, 但當第一位同學仔小逸試過喊驚後, 坐喺隔離位o既晢晢又驚埋一份, 仲即刻爬咗上爸爸個身度叫「驚驚」, 婷姨姨見狀就改為叫小朋友摸下個汽球, 不過晢晢已經連摸都唔肯lu… 其實平日o既晢晢喺婆婆家係經常自行泵爆汽球同徒手鍊爆汽球, 所以晢晢o既表現媽媽覺得好好笑~!  

到圖功時間, 今堂係利用唔同o既器具(例如: 多多樽, 牙籤筒等)以不同顏色o既水彩喺畫紙上印出不同大小o既「波波」(即圓形), 晢晢除咗按要求印「波波」外, 仲不停「發揮創意」, 一時邊印邊轉個樽, 一時拖住樽畫出條「小路」, 一時索性印自己隻小手板到畫紙上… 眼見附近同學仔o既作品都係清晰一個一個「波波」, 唯獨晢晢的就花碌碌, 一pai pai~~ 唔知好嬲定好笑~!

唱遊時間, 今堂主力唱新歌「來共我揮揮手, 來共我掂膊頭, 來共我扭一扭, 來共我dum舊大石頭…」哈哈~~ 其實媽媽過去一個星期同晢晢積極練習動作, 喺屋企跳得唔錯架, 不過到上堂時就跳到一pai咁~~ heehee… 都冇所謂啦, 志在玩吓啫~~ 尾聲時婷姨姨又拎出波波邊唱邊掟~~ 個個都玩得好開心~! 

到最尾茶點時間, 是日美食係風水梨, 餅乾同晢晢唔食o既提子餐包, 婷姨姨本來諗住用餅乾引誘晢晢食一啖包包, 不過媽媽心諗: 「晢晢從來唔會被利誘到o既…」結果當然係失敗~~  

食飽飽放回餐具又落堂lu~~~

呢個星期晢晢同兩位同學仲有下場~~~ 下回報告~!