晢晢B與媽媽的週末

剛過去o既星期六, 我哋一家三口去完幼稚園開放日, 爸爸就去咗返工(仲要係做到半夜三間果隻!), 賴低我哋兩母子相依為命, 不過, 媽媽當然不甘寂寞, 即刻約埋兩位姨媽搵節目~! 是日我哋就上咗婆婆家打邊爐, 開餐前仲book咗個場打羽毛球(都唔記得幾多年冇打過lu~~~) 

媽媽呢次都算大膽, 爸爸唔喺身邊都帶晢晢周圍去玩… 其實媽媽都有d驚架, 一來晢晢一向都鍾意自己四圍跑, 又唔肯拖人, 萬一睇漏眼, 都好易走失架~! 而且我哋係去打羽毛球, 若果我哋打到忘形, 唔小心拍到晢晢個頭都幾大鑊~! 不過媽媽實在唔忍心大好假期賴低晢晢喺婆婆家, 就膽粗粗一試媽媽o既揍仔能力啦~!  

落到球場, 發現原來媽媽o既憂慮係無謂o既~! 我哋都未開波, 晢晢就自己拎咗塊球拍同羽毛球玩~~~ 哈~! 果陣媽媽先知, 原來晢晢知道打羽毛球係要將球放到拍面然後打出去… 雖然未至於識打, 但動作就扮到似模似樣喇~!  

到我哋正式開波, 晢晢一直都係企喺網底範圍玩, 一塊拍, 一個羽毛球, 就自得其樂~! 傻豬仔只係睇見我哋將個波打到飛來飛去就已經笑到卡卡聲, 不時仲笑到dum晒腳, 好搞笑~! 而媽媽又因為晢晢一直都站喺視線範圍, 所以都玩得好放心, 只係一向少做運動, 打兩打就冇晒氣啫~~~  

不過呢日Yoyo表姐就明顯地覺得好悶喇… Yoyo大個女, 好想加入同我哋一齊打, 但又唔夠我哋快, 好冇癮… 無耐就發脾四大喊叫走,  仲喊到飯都唔落呀陰公~~~ 最後Yo媽唯有帶Yoyo返屋企交畀Yo爸照顧, 然後再返婆婆家打邊爐…  

是晚邊爐宴有好多靚海鮮, 虾, 蟹, 鱔片, 花甲, 青口, 蠔… 仲有好嫩o既青菜~~ 全部都係媽媽「飛弗」~! 媽媽當然食得開心, 而晢晢都唔執輸, 一見到個煲就不停叫住「我要麵麵呀…我要麵麵呀」工人姐姐就煮咗差不多1/3個出前叮叮畀晢晢食… 咁細個食叮叮好恐怖呢~~ 不過見放假, 媽媽就畀你放肆一次咁多啦~!  

我哋一路食到差不多10點, 晢晢開始中眼瞓, 媽媽唯有帶晢晢返歸, 入屋未夠1分鐘晢晢就變咗隻豬仔lu…  

呢日晢晢真係玩到盡, 有機會要再帶晢晢打返場~!