意見多多 – 22個月

剛剛踏入22個月o既晢晢, 要求愈來愈多... 例如...

一. 疴疴下豬豬, 見到隻牙刷又無啦啦要「brush brush 丫」, 跟手仲唱埋: 「向上刷, 向下刷…」 

二. 媽媽同佢唱緊「時常都快樂」, 唱到一半, 突然又話「唔愛丫, 要 “baa baa black sheep丫(個樣好誠懇架!) 」, 到媽媽話: 「好啦, 唱baa baa black sheep 啦! 」, 都未唱, 晢晢又話:「唔愛丫, 要ABC 丫…」呢D情況唔係一次半次, 而係差不多每晚如是… 應該係玩嘢!

三.  好地地自己聞歌起舞, 又要夾硬拉我哋起身, 要求我哋跟佢一齊跳舞, 一齊拍手…

四. 臨出街著鞋時, 明明同佢著緊波鞋, 好地地著到一半, 又話: 「唔愛丫…」, 跟手拎咗對涼鞋出嚟, 媽媽諗住順佢意著涼鞋啦, 晢晢又話:「唔愛丫…」(想點呀!?)

五. 同佢行街睇鞋, 一直都睇得好哋哋, 仲好似知道買畀佢咁不斷講:「shoe shoe 呀, 靚靚呀, 呢隻丫, 嗰隻丫…」, 轉個頭又變面話: 「唔愛丫, (指住門口)去玩啦, bye bye shoe shoe, (再向職員揮手)bye bye…

仲有好多… 唔數喇… 總之… 佢提出o既要求數之不盡, 有時又令人摸不著頭腦… 甚至會令人好勞氣... 

好耐之前媽媽已經睇定書兼做定notes, BB踏入歲半開始, 自己o既意思就會多咗, 但語言表達同肢體又未運用得好好, 心裡想做果樣往往未能達到, 會令佢哋會好沮喪, 所以呢個階段o既小朋友脾氣會大咗, 藉以宣洩一下受挫o既情緒… 書中提醒我哋做父母的, 要體諒佢哋, 喺呢個階段唔好同佢哋硬碰, 若處理得當, 到兩歲至兩歲半後, 佢哋語言同肢體發展成熟時, 情況就會好轉… (啫係磨鍊爸媽EQ啦…)  

媽媽一直記喺心裡, 而家總算用得著… 當晢晢「發LONG泥」時, 媽媽就會不斷提醒自己冷靜, 多企喺晢晢角度思考...  

近來, 我哋發現晢晢唔鍾意換衫, 尤其心情欠佳時, 一除就拉返低件衫話: 「唔愛」… 好不容易除到件衫, 又要同著衫博鬥!  

爸爸媽媽一直都好煩惱… 又諗: 「會唔會晢晢想自己揀衫呢!?」 但當我哋邀請晢晢揀衫時, 晢晢又繼續叫: 「唔愛」…  

直到前幾日, 晢晢涼完涼我哋如常幫晢晢著衫, 晢晢又話唔愛… 媽媽突然諗「會唔會晢晢想自己著衫呢!? 」

媽媽就問晢晢: 晢晢, 係咪想自己著呀?

晢晢: (呢次終於冇講 “唔愛”喇, 雖然冇答我, 但佢畀咗個SAY YES o既笑容

媽媽就話: 好啦, 晢晢自己著啦…

之後, 媽媽就畀晒成套衫褲晢晢自己著(當然有少許協助, 不過只係少許, 因為一插多少少手晢晢就推開我…), 果然晢晢好順灘又好愉快咁自行著好成套衫, 著完仲好自豪咁拍手, 又用眼神要求我同爸爸一齊拍手讚佢~!  媽媽感到好安慰… 然後同爸爸講: 「原來晢晢想話我哋知佢識自己著衫呀, 係我哋唔明咋, 仲話晢晢曳, 其實晢晢一D都唔曳~!」 … 晢晢聽到好開心呀~! (緊係啦, 大平反成功!) 

晢晢真係好幸福, 生於一個會尊重小朋友o既年代, 畀著媽媽個年代, 肯定畀婆婆打咗九世~~~!  

晢晢, 媽媽會努力了解你多些, 又教你多d用語言表達, 希望我哋可以 「愉快地」「捱」 過你呢個令你沮喪o既階段啦~!