全職媽媽體驗 03.03.10

上個星期因為婆婆忙於辦理太公安息禮事宜, 所以媽媽請咗三日假全力照顧晢晢, 好讓婆婆無後顧之憂處理事務… 

呢個難得的假期, 讓媽媽可以體驗一下做全職媽媽o既滋味…  

星期三朝早, 媽媽同爸爸一齊送晢晢返學, 之後媽媽就趕回家預備晢晢午餐, 打理一下家頭細務, 然後12點正又趕到學校接晢晢放學… 等車期間, 媽媽同隔離班同學仔個家長閒聊幾句, 全職媽媽感覺非常強裂… 

返到屋企, 安頓好晢晢午餐同午睡後, 媽媽又繼續忙家務同醫肚。 個多小時後, 晢晢睡醒了, 媽媽唔想大好假期留喺屋企吽, 所以就帶咗晢晢到公園玩, 晢晢相當興奮, 韆鞦, sir滑梯, 氹氹轉, 爬繩網…玩個不停~! 

之後晢晢再走到草地上玩, 其間晢晢無啦啦躲喺大石後, 幾秒後邊大叫『嘩嘩嘩』邊拎住枝高過佢o既樹枝跑出嚟發來發去, 可以想像晢晢當時個樣幾似一個傻佬!!! 笑到媽媽肚痛!!!  

呢張已經係事後補影, 佢突然從大石後跑出嚟個樣係傻百倍!!!

 

上一張影得唔好… 就係呢枝樹枝喇!

 

隔咗一陣, 晢晢又無啦啦走去執柴…

媽媽全程企埋一邊一路睇住晢晢玩一路餵蚊, 做人母親真偉大! 玩咗大概一個鐘, 晢晢突然話: 『我想食麥樂雞』, 難得晢晢咁主動表達, 媽媽幾辛苦都帶你去啦…  

媽媽含辛茹苦抱住晢晢去到麥當當(因為晢晢已經玩到腳仔軟), 點知撞正中學放學時間, 麥當當迫滿人, 媽媽唯有再抱晢晢到某茶餐廳食飛碟薯角餐, 晢晢食晒媽媽D薯角!!!

食飽返到屋企, 媽媽又忙於同晢晢洗白白同預備晢晢晚餐, 然後又要同晢晢玩D小遊戲消磨時間… 當一切安頓好後, 已經係晚上8點多, 媽媽已經攰到眼睛都睜唔大lu… (注意: 媽媽連涼都未沖, 飯都未食架!) 

直到媽媽開始釣魚, 就叫晢晢返房瞓, 好在晢晢好合作, 刷好牙, 講完故事就zzz… 然後媽媽先開始洗白白同醫肚… 

之後4日連埋weekend媽媽都係放假兼親自照顧晢晢, 感覺尤如全職媽媽… 經過呢幾日, 媽媽可以來個總結, 就係…

做全職媽媽真係一d都唔易!

若將來媽媽有幸可以成為全職媽媽,

一定要請個工人幫幫手~!

(哈哈~~ 發夢似乎太早~!)