上學的第7週

3月15日(星期一): 呢日媽媽身體不適請咗病假, 臨到診所前媽媽順道跟爸爸一齊送晢晢返學。 晢晢呢日精神麻麻, 事關佢氣管炎又返發, 半夜咳得好厲害, 爸爸本來想同晢晢請病假, 但媽媽見佢除咗咳就冇咩唔舒服, 所以照畀佢返。入到課室, 晢晢有點驚驚青青, 中途爸爸先行離開, 然後媽媽趁晢晢專心玩玩具時溜走。到放學時, 婆婆形容晢晢心情頗佳, 口甜舌滑的跟每位老師say BYE BYE先離開, 另外呢日亦都冇賴尿, 叻仔! (如果連返學都能夠同爸爸媽媽say BYE BYE就更叻仔喇~!)  

3月16日(星期二): 呢朝早晢晢6點就醒咗, 一陣話要睇書, 轉頭又話要踩bicycle, 好在爸爸仗義看住佢, 媽媽先有覺好瞓。雖然呢朝早咁起身, 但晢晢精神反而唔錯, 據爸爸形容, 晢晢呢日心情輕鬆不少, 不再驚驚青青。另外, 因為前一晚媽媽跟晢晢畫畫時, 當媽媽畫咗個心形後, 晢晢突然爆咗句『Heart is 咇卜咇卜咇卜』(仲識拍下拍下個心口仔!), 呢朝早爸爸就問老師係唔係剛剛教咗心跳, 老師話正正就係尋日教! 哈~! 晢晢, 你返學真係有留心聽書過wor~ 冇嗮學費呀~! 到放學時, 婆婆話晢晢心情一樣咁靚, 笑住主動跟老師say BYE BYE~!  

3月17日(星期三): 晢晢又係6點醒咗! 今次爸爸媽媽一於好少理, 由得佢自言自語, 過咗一陣果然返瞓, 直到7:30AM時晢晢大叫『我瞓醒啦!』就起床梳洗食早餐。爸爸返到學校, 跟班主任傾咗幾句, 老師話晢晢適應得唔錯, 冇依賴, 而且做事頗獨立(時時都話『我自己嚟!』), 但上課時有離座, 而上音樂課時就好留心, 能夠坐定定跟老師一齊唱(近來晢晢時時唱起不知名歌曲, 相信都係學校學返嚟喇~!), 另外爸爸又問到晢晢作為細B(仲係全班最細果個)進度能否跟上(據了解同班最大果個足足大晢晢一年!), 老師話會將大B細B分組, 對細B會特別投放多點時間教(咁聽落都放心D~!)。今日晢晢情況跟過往差不多, 爸爸又係趁晢晢唔為意溜走~! 到放學時, 婆婆話晢晢精靈得唔尋常, 直頭懷疑佢喺學校瞓過覺, 媽媽打算向老師求證! 

3月18日(星期四): 病假一天。其實晢晢都病咗好多日, 但每朝都見佢好精神就繼續畀佢返學… 直到尋晚, 晢晢異常地失控, 竟然長氣到由半夜2AM喊到朝早7AM!!! 一時話唔舒服, 一時話要ALL 臭臭(流料), 一時話要睇Noddy, 一時話要踩bicycle, 一時話要聽故事… 爸爸一直好耐心照顧佢, 直到臨天光真係火都嚟, 大渴一聲『唔準扭計! 瞓覺!』結果晢晢一直企喺BB床大喊, 喊咗足足15分鐘以上! 最終爸爸投降帶咗佢出廳睇Noddy… 雖然7點幾時o既晢晢精神尚可, 但佢成晚冇瞓過又好多痰聲, 都係在家休息好喇… 媽媽好擔心晢晢情況, 所以每隔一陣就打電話到婆婆家了解, 婆婆話早上晢晢有點攰, 返瞓咗大概兩小時, 中午開始就一切正常, 晚上返到媽媽家亦係正常過乜, 之後隔離屋妹妹嚟玩時晢晢又異常地乖巧… 跟妹妹道別後, 大概10pm就大覺瞓直到第二朝7:30am~! (萬幸, 如果晢晢呢晚又大喊爸爸媽媽真係頂唔住架!) 

3月19日(星期五): 生日會, 無須穿校服, 放11am。為咗晢晢瞓得好d, 喺前一晚媽媽特意畀咗核桃、蜜糖水同保嬰丹畀晢晢食, 據說有助安眠, 睇嚟效果唔錯! 呢朝爸爸見晢晢心情頗靚, 就膽粗粗試下跟晢晢say BYE BYE, 結果… 唉… 又係喊到『鬼鍊喉』, 爸爸唯有話『爸爸未走住』, 然後晢晢就變身樹熊, 一直到Ms. Lau引開晢晢注意, 爸爸方能成功逃脫! 到放學時, 晢晢又係好風騷咁周圍同d老師say BYE BYE, 然後同英文老師來個BIG HUG先走~!

晢晢, 其實你返學係開心架, 係咪? 如果唔係你就唔會連日來放學都笑住走啦~! 咁點解你成7個星期都未能跟我哋say BYE BYE 呢? 爸爸話要喺平日同你做多D練習, 希望不久你會畀驚喜我哋啦~!