3月8日(星期一): 前一晚晢晢半夜咳得好厲害, 所以精神十分差, 平日明明瞓到7點就醒, 但呢日到8點多依然瞓到好冧,連媽媽出咗門口返工都唔知。爸爸形容晢晢返學時神情十分呆滯
, 而爸爸偷走時又唔小心畀晢晢發現, 所以喊咗一場
。到放學時, 工人姐姐話晢晢又有喊攰, 媽媽聽見到有點心痛… 另外, 今日晢晢喺學校賴尿, 事後問返老師原來晢晢係有表達「ALL豬豬」, 只係臨除褲一刻趕唔切先整濕條褲, 咁就原諒你啦
~! 婆婆勸媽媽到夏天先再戒過, 但媽媽覺得晢晢係因為返學著返片先會依賴, 因為平日晢晢係唔會甩碌架嘛! 所以媽媽想堅持… 晢晢, 你要掙氣啊! 
3月9日(星期二): 晢晢半夜發噩夢, 大叫:「唔愛呀! 放手呀! 我架! 我架!」, 其實都持續咗好多晚, 相信係發返日頭同Yoyo表姐爭玩具情景
; 另外晢晢半夜依然有咳, 兩大因素下晢晢睡眠質素十分欠佳, 要諗辦法幫幫佢, 以免影響精神學習! 今朝返學情況理想, 爸爸趁晢晢玩玩具時同佢講:「 爸爸走喇」, 晢晢冇特別抗拒仲繼續玩, 算係大突破
! 到放學時, 終於笑住走出嚟
! 不過可能今日有運動堂所以好攰, 一抱起行幾步就瞓著
, 直到返到婆婆家先起身食飯。
3月10日(星期三): 晢晢半夜再次發噩夢, 大叫:「我幫你呀! 畀畀呀!」(搞乜呀???
)。 爸爸形容今日情況十分理想, 爸爸又係趁晢晢玩玩具時同晢晢講「爸爸去廁所先」, 晢晢依然冇咩反抗, 咁爸爸就「借尿鈍
」。 放學時, 姐姐話晢晢又係笑住走出嚟, 不過又係一抱上手行一陣就瞓著, 瞓到3點都未醒, 飯都未食呀! 到底點解真係攰得咁緊要呢!?
3月11日(星期四): 今日媽媽有事請假, 順手送埋晢晢返學
。晢晢呢日有些少唔舒服, 有點攰, 但so far情況都不錯。入到課室後, 爸爸先離開課室, 晢晢發現後問:「爸爸呢?」媽媽:「爸爸去廁所呀!」之後晢晢就好緊張咁拖住我, 深怕媽媽都走埋。此時Ms. Wong及Ms. Lau過來解圍, 媽媽就趁晢晢唔為意離開。放學時, 晢晢依然係笑住走出嚟, 十分令人安慰~!
3月12日(星期五): 前一日婆婆見晢晢咳得厲害咗, 又有鼻水, 所以帶咗佢睇醫生, 帶病o既晢晢顯有點忟憎, 有點攰, 但今朝一起身, 晢晢除咗咳之外, 依然鬼打咁精神, 媽媽最後就決定畀佢返學(爸爸初頭反對架
)。返到學校, 爸爸偷走時畀晢晢發現咗然後大喊, 爸爸恨心地將晢晢交到Ms. Wong手, 然後跟晢晢道別「爸爸走喇」, 爸爸一路走一路聲見晢晢淒厲o既喊聲, 諗起都令人心痛, 幸好到放學時係笑笑口咁走
…
晢晢, 媽媽已經寫咗成6個星期喇, 點解仲有喊架!? 媽媽好期待你崩崩跳入課室然後同我哋SAY BYE BYE呀…
沒有留言:
張貼留言