上學的第8~9週

第8週

3月22日(星期一): 早上起床時晢晢相當精靈, 又玩字咭, 又同媽媽玩, 又食蛋糕, 諗住今日返學實冇問題, 點知爸爸話晢晢今日好呆, 返到學校門口已經企定定唔願行, 又躲起爸爸背後好驚咁, 唔知發生咩事!? 到玩玩具時, 因為隔離位同學夾硬拎咗佢d積木, 晢晢又好驚咁將d玩具攬到實, 爸爸睇見好擔心, 過咗不久, 爸爸就趁晢晢唔為意離開。到放學時, 婆婆話晢晢冇笑又冇喊, 只係有點呆, 抱上手不久就瞓著… 或者weekend玩得太攰引致今日的情況吧…  

3月23日(星期二): 尋晚因為爸爸媽媽夜歸, 晢晢又太掛住我哋, 所以一直眼光光等到媽媽返屋企, 再講咗10個故事以上晢晢方能安睡, 當時已經差不多晚上12點了, 所以今早晢晢睡得特別晏, 差不多8點先起床。如此精神狀態下, 都預咗晢晢冇心機返學。返到學校, 晢晢又一副沒精打采模樣, 然後玩玩具時, 隔離位同學又無端搶走晢晢手上玩具, 令晢晢再次陷入恐懼與不安… 過了不久, Ms. Lau 過來跟晢晢玩, 爸爸就趁機離開, 然後走到校門外的窗偷望, 見到晢晢正在大喊, Ms. Wong安撫中。放學時, 婆婆話晢晢雖然係笑住走, 但明顯地十分疲倦, 又係抱上手冇耐就瞓著…  

3月24日(星期三): 呢日媽媽要做身體檢查, 所以請咗假, 順道送晢晢返學。沿途媽媽不停『落藥』, 同晢晢講:『返學好好玩架… 返到去要同Ms. Wong say GOOD MORNING 呀… 返學校唱歌好開心架…』一直晢晢都表現得好輕鬆, 直到入咗學校, 晢晢開始緊張起嚟, 但喺媽咪鼓勵下都能獨自走到玩具架拎玩具… 幾分鐘後, 媽媽話:『好喇, 夠鐘啦, 媽咪要返工喇!』晢晢就喊到好淒涼, 不停叫住『媽咪! 媽咪!』, 但媽媽依然恨心地將晢晢交喺Ms. Lau手中, 然後跟晢晢揮手道別…. 呢個時候, 晢晢雖然仍然喊緊, 但手仍然揮動著跟媽咪say BYE BYE 的。到放學時, 晢晢又係笑住離開, 仲不停地跟老師say BYE BYE, 似乎渡過咗一個愉快o既上午…  

3月25日(星期四): 呢朝早爸爸返到學校就問Ms. Lau尋日我哋離開學校後o既情況., Ms. Lau話『晢晢只係喊咗一陣, 一上堂就笑返』… 今日爸爸繼續跟晢晢say BYE BYE, 晢晢又繼喊到C去活來… 爸爸離課室後, 就一直站喺學校玻璃門外偷看晢晢上課情況… 原來一夠鐘, 小朋友就會排隊然後到操場做早操, 爸爸話晢晢真係一上堂就會笑, 老師話舉手就舉手, 踎低就踎低, 好得意! 大概10分鐘後, 就排隊到音樂室上堂, 爸爸話晢晢排隊時兩頭拎周圍望, 然後傻奸奸一個跟一個入課室, 爸爸睇到呢度就走咗lu… 到放學時, 婆婆話晢晢又係好風騷咁邊行邊同身邊o既老師say BYE BYE, 不過就攰得好緊要, 一抱上手行幾步就瞓著, 到3點幾都未醒, 飯都未食…  

3月26日(星期五): 爸爸繼續say BYE BYE行動, 一句:『爸爸走啦!』就將晢晢交到Ms Lau手中, 晢晢雖然有喊, 但明顯地已經冇以往咁激動, Ms. Wong仲拍晒心口話:『放心啦, 佢喊一陣就唔喊架啦!』咁爸爸尋日又真係現場睇過晢晢上課情況, 所以爸爸都好放心離開… 到放學時, 晢晢依舊風騷地跟沿途各位老師及嬸嬸say BYE BYE…

 

第9週

3月29日(星期一): 呢朝早媽媽身體不適請假一天, 睇醫生前順道跟爸爸一齊送晢晢返學, 我哋照舊跟晢晢say BYE BYE, 雖然晢晢有喊, 但唔算好激動, 此時Ms. Lau將晢晢抱起, 然後同我哋講:『放心啦, 佢日日都係咁, 你哋一走咗佢就笑返架啦~!』, 咁爸爸媽媽就繼續邊揮手say BYE BYE邊離開。(翌日問返Ms. Lau, 原來我哋一走就打上堂鐘, 晢晢一聲見鐘聲就即刻冇晒事, 然後話:『oh… 夠鐘收玩具, 我落地呀!』… 小朋友變臉能力真強!) 到放學時, 晢晢依舊笑咪咪… 

3月30日(星期二): 晢晢終於唔喊啦!! 呢朝早媽媽都有一齊送晢晢返學, 因為晏咗出門口, 所以我哋到達冇耐就响起上堂鐘, 爸爸媽媽趁機同晢晢say BYE BYE, 雖然晢晢有皺皺眉, 但已經冇喊, 亦可以目送爸爸媽媽離開! 晢晢終於做到啦!!!

呢朝早有早操, 爸爸媽媽就好似FANS咁跟一大班家長們到學校門外『裝』, 睇見班小朋友跟住音樂同老師指令做動作真係好得意! 大概10分鐘後早操完結, 我哋睇見晢晢識得好乖咁排隊, 又會雙手放後面跟住前面位同學, 一個跟一個咁進入課室, 似乎晢晢已經十分適應! 又, 睇見佢一直都笑咪咪, 老師真係冇呃我哋, 晢晢上堂真係笑得好開心架!!! 媽媽睇見好感動…  

3月30日(星期三): 慶祝復活節, 無需穿校服。爸爸繼續跟晢晢say BYE BYE, 晢晢即纏著爸爸隻腳, Ms. Lau就對晢晢話:『你咪扮嘢啦!』, 然後抱開晢晢, 爸爸話晢晢今日似扮喊多, 交唔足戲, 哈哈~!  

4月1-2日(星期四及五): 復活節假期無需上課。 

好喇! 好喇! 晢晢踏入第9週終於克服到分離恐懼啦! 媽媽深信距離晢晢笑住say BYE BYE o既日子不遠已!! 晢晢加油!!!