乳牛一年 ２００８年１２月６日

晢晢一歲啦!

啱啱老公問我:　記唔記得上年呢個時間你做緊乜嘢?
我話: 喺醫院紀錄緊陣痛時間lor...

一年話咁快就過咗lu...

記得第一次埋身餵係晢晢出世第3日, 睇住佢一口一口咁啜, 果種窩心o既感覺真係呢世都唔會忘記...

到接晢晢出院, 我放產假期間, 就開始咗瘋婦般o既餵奶生涯!! 時時刻刻都喊食, 到兩個星期就忍唔住轉咗做全泵, 直到而家...

呢一年, 因為餵人奶遇過好多困難... 每日要早起夜睡搞長期睡眠不足啦, 試過追唔切奶要含住泡眼淚補奶粉啦, 晚晚天寒地凍半夜起身泵奶啦, 又試過乳線炎...為泵奶日日返工搞到去旅行咁...試過壞雪櫃萬幾ml冰奶全軍覆沒搞到要1次過狂泵17oz先夠數(之後多咗個"朵" )... 曾經成為一代奇富奶媽日產40幾oz谷奶谷到上喉嚨 ... 到漸漸跌奶, 而家日產24oz多滴都冇...

雖然喺唔同階段都遇到唔同o既困難, 但從來冇諗過要放棄, 每次只會上bk問下各方好友意見然後繼續努力...

雖然我唔見得我晢晢好似其他人奶b咁因為食人奶而特別叻或者身體特別好, 但我都從來冇諗過放棄...

理由只因為晢晢係我o既寶貝仔~!

雖然大部份時間晢晢都係食樽, 但見住佢每日食自己努力為佢預備o既奶奶一日一日咁長大, 感覺依然窩心~! 試問自己又曾經為過邊個咁不顧身世咁付出過?

感謝主, 喺我咁奀挑鬼命o既身體依然賜我足夠o既奶量餵養晢晢! 亦多謝咁多位"返工啦"既好姊妹一直o既支持同提點! 冇佢哋支持同指教我諗我呢個傻媽撞o既板一定唔少~!

今日晢晢一歲啦! 我同晢晢都一同踏入新階段, 我明白而家除咗奶之外, 我仲要喺其他方面, 好似教導上都要付出更多努力! 所以泥緊我打算將一日3餐人奶改做2人奶1奶粉直到晢晢自然離乳, 希望騰出多d時間陪佢玩, 陪佢學, 陪佢經驗唔同o既事物~!

希望呢個改變晢晢可以快d適應, 亦希望呢個改變令一家人都更加快樂!

各位奶媽姊妹們, 雖然餵o既過程好多眼淚, 好多血汗! 但回頭看, 果種甘甜真係冇嘢可以取代! 所以真係幾辛苦都值得架!!! 

奶媽萬歲!!!

小晢返學喇 - 幼潛第十堂 之 畢業 (11個月)

話咁快就到最後一堂, 真係極度極度極度唔捨得... 今日媽媽o既心情都好忐忑呀~!

今堂冇堂上, 只做評估, 晢晢表現不過不失...

挑戰1: 聽指令"擺"放通粉入杯 --- 過關冇難度~!　

 

挑戰2: 聽指令"擺"放數粒積木入杯 --- 同樣過關冇難度~!　

挑戰3: 連續接3支棒狀積木--

喺接第3支時晢晢未能如預期般先將第二支交到其中一隻手後再接下1支,

而係放低其中1支然後再接, 所以挑戰失敗...

 

呢次參加幼潛對我得著好大, 尤其媽媽真係咩都唔識,

喺呢度有導師指導同提點下, 媽媽喺教導上真係有方向咗好多!

亦都提醒咗我喺唔同階段要同晢晢鍛鍊唔同o既嘢!

每當晢晢達標時, 我同晢晢都好有滿足感同成功感!

今日晢晢畢業啦, 真係好唔捨得一班咁可愛o既同學仔, 希望我哋快d有機會再聚啦~!

點點滴滴...

小晢返學喇 - 幼潛第九堂 (11個月)

呢日其中一個項目係疊廁紙, 因為身高所限, 晢晢最多只疊到3舊咋...

 

另外又學咗過火圈(係呼拉圈先啱), 目的係令BB學會當遇到障礙物時懂得跨欄同縮低個頭...

不過晢晢都未識行, 所以都未知佢算做到定做唔到~!?

今日仲好難得咁同曈曈合照~~ 嘩! 曈曈高成半個頭咁多, 晢晢你唔再努力點追到曈曈呀~!

今日有一件事好感恩, 因為一直晢晢喺學行方面都冇乜進展,

今日喺feedback時我同梁ee提起, 梁ee就示範咗一個方法畀我,

晢晢竟然喺梁ee既示範下行到幾步!

媽媽開心到想喊啊!

感謝主!




小記: 一個桶, 小朋友就玩到傻咗~~

 

1026小鬼Party (10個月)

今日應同事Wendy邀請, 參加咗一個萬聖節Party, 先睇吓晢晢一身hea到爆o既做型~~(媽媽好懶, 只係公司附近買咗對角畀晢晢~~ heehee~ )

隔離呢位就係同事個仔仔--小Q~! 小Q只係大晢晢兩個星期, 但就大晢晢幾個碼~!







睇吓後面, 今日都好多人參加架~! 不過因為晢晢剛上完堂, 開始扭眼瞓,

又唔肯食嘢, 所以我哋都玩得唔夠投入, 晢晢仲食日要啜住個奶咀頂眼瞓tim呀~! 

 

睇下晢晢攰到個樣...

 

其實今日晢晢都參加咗個小型爬行比賽, 佢個對手起碼細佢一個月, 不過懶洋洋o既晢晢都輪成條街... 不過今日晢晢唔在狀態, 都唔怪得佢o既~~~ 

今日總括嚟講都幾悶, 尤其晢晢實在太攰, 冇乜心機又扭計... 或者第時等晢晢大個d, 可以周圍走時再參加呢類party晢晢會玩得投入d開心d~!

 

小晢返學喇 - 幼潛第七堂 (10個月)

因為今日下晝要出席萬聖節Party, 所以特登為晢晢預備一身魔鬼面孔(一對嘩鬼角)+天使裝束(純白襯衣), 點知同學仔o既媽咪話我知原來晢晢果件係女仔衫... 真係唔講唔知...

晢晢: 媽媽做乜你又同我扮女仔呀?

今日除咗晢晢仲有兩隻小鬼, 分別係Anna鬼同嫣嫣鬼~!

今堂其中一個項目係舀通粉, 晢晢都舀得唔錯架~ 今晚買返包喺屋企玩吓先~!

 

 

另外仲玩咗<奇妙旅程>, 即爬假草, 石春路等藉以刺激BB既觸覺~!

晢晢表現唔錯, 毫無懼色爬完成整條障礙~!