給雷暴警告騙了的端午節 @ 流浮山 & 遊水 – 16.06.10

端午節大好假期本應同晢晢四處玩吓, 但天文台一句『預料會有狂風雷暴』, 爸爸媽媽唯有睇定d…睇定d… 一吽就吽到4點幾…  

到快餐店食tea時, 爸爸突然話:『不如去流浮山行吓咯…』 見個天仍然風平浪靜, 就嗱嗱聲打的出發lu~~!!! 

因為太過即興, 連相機都冇預備, 唯有Iphone頂住先, 好在靚景搭救~! 呢幾張拍得有feel嗎?

爸爸好識氹晢晢, 只要佢哋喺埋一齊就會有好多笑聲~~~

 

行行下, 爸爸突然發現隻鞋黐咗塊樹葉, 原來踩到香口膠(核凸), 爸爸唯有同佢清厘一番…

晢晢:『爸爸. 得未呀?』(得返一隻鞋, 晢晢竟然識得疊隻冇鞋腳上另一隻腳上)

之後爸爸同晢晢發現地下有隻spider, 又吸引到佢哋睇一餐…

 晢晢:『冇o既? Spider去咗邊呀?』爸爸:『走咗lu~~』

晢晢叫緊爸爸抱抱 (晢晢知道媽媽tummy有BB, 已經好少要媽媽抱lu~!)

做乜爸爸同晢晢起飛腳? 其實佢哋喺度趕緊d水曱甴, 保守估計起碼有過百隻!! 媽媽嚇到彈開十萬九仗遠~!

之後佢哋完全無理過媽媽, 愈行愈出… 媽媽見地面濕滑, 唯有留守原地…

十幾分鐘後, 爸爸就帶咗隻污糟貓返嚟 (救命…!) ... 晢晢好好笑, 佢見到對鞋畀d泥封實咗, 就不停問:『閃電王麥坤呢? 閃電王麥坤去咗邊呀?』(佢指佢鞋頭隻公仔…)

一腳都係泥漿, 仍然神態自若, 媽媽服咗你咯…

之後本打算到公厠洗腳(晢晢一路行一路問:『水喉呢? 洗腳腳呀!』), 點知出到路口都唔見有厠所, 唯有坐的士回府先算…

一上車, 主意多多o既爸爸又嚟料:『不如而家去游水咯! 我喺屋企樓下個更衣室同晢晢洗腳, 你就上樓拎嘢啦!』(媽媽又畀爸爸老點...), 不過睇在個仔份上, 就畀你老點一次咁多啦~!

大個咗, 反而冇咁抗拒水泡~!

玩咗差不多兩個鐘就返屋企, 臨走時晢晢又喺度唱埋d怪歌, 相信佢又係攰過龍喇~!

一個漫無目的又好開心o既假期~~

晢晢:『我遊完龍舟水啦~!』

父親節快樂 – 20.06.10

晢晢, 你知道你爸爸有多愛你嗎?

自從你出世以後,

爸爸差不多把工作以外所有的時間留給你,

有時候明明已經工作到筋疲力竭,

但都會放棄休息,

寧願帶你四處去玩,

陪你跑跑跳跳,

那些精力都不知從何而來!?

晢晢, 你又知道誰人替你沖涼得最多呢?

其實又是你爸爸呢,

媽媽反而只是客串而已…

現在你較大一點,

爸爸直頭與你一起沐浴,

與你玩泡泡,

玩拋毛巾,

玩「潛水」…

媽媽在門外聽見你們歡樂的笑聲,

都不好意思打擾你們呢~!

晢晢, 當你長大了, 出來工作以後,

就會知道每個假期有多難得,

當你回看於每假期爸爸與你去玩時所拍的照片,

就會知道你爸爸為你付出有幾多,

更加知道爸爸有多愛你~!

所以你都要愛爸爸啊~!

 祝爸爸父親節快樂~!

 

艾篙PLAYGROUP – 第四堂 – 17.06.10

已經第4堂喇, 晢晢表現可謂一堂比一堂令人失望, 尤其課堂秩序方面, 實在令媽媽有點頭痛…  

Surman姐姐的評語:

先講曳嘢, 上課其間晢晢跟另一位同學玩電子琴, Surman姐姐要求佢哋停止及入房坐定定, 但晢晢唔聽, 仲話:『我唔要貼紙呀!』(連行為簿仔都失效了, 仲可以點教?)… 之後Surman姐姐就捉咗兩隻小鬼入房說教…  

第二件曳事, 上上下堂晢晢竟然跟上述同學大打出手! 事原係同學仔突然推跌晢晢, 然後兩個就互相捉住對方雙手紏纏, Surman姐姐話大家係有敵意而非『玩打交』果隻… 之後Surman姐姐要求互相道歉及握手做好朋友, 同學仔好快就願意道歉同做返好朋友, 但晢晢就堅持, 要Surman姐姐講咗好耐先肯follow…  

到臨放學, Kelvin哥哥畀緊貼紙時, 兩隻小鬼再一次大打出手, 因為呢次Surman姐姐唔在場, 所以唔太了解衝突原因…  

曳嘢講到呢度, 講返上堂做過d乜!? 今堂一開始Surman姐姐用4個唔同顏色o既呼拉圈, 配合唔同顏色o既豆袋玩配對遊戲(詳情太複雜, 所以唔多講喇~! 但都係非常有心思o既遊戲!), 晢晢無論配對, 用完整句子表達同大肌肉能力(行”S”字)都冇問題! 

今堂又有做『故事情節發展』遊戲, 故事係『烏鴉飲水』, 晢晢對於熱就要飲水呢個關係唔係太肯定, 要提點先找到相應o既咭… 之後Surman姐姐講到『隻杯太高, d水太少, 烏鴉個咀唔夠長飲唔到』, 就拎咗隻杯出嚟, 叫小朋友輪流用夾夾起道具石頭放入杯中, 令水位上升, Surman姐姐話小朋友喺呢part玩得好投入, 好同心為咗烏鴉能夠飲水而努力~! 不過Surman姐姐又觀察到晢晢前三指能力不太穩陣, 要提佢先識得用前三指拎夾(否則佢就用晒五隻手指拎!), 不過後來練習多咗表現又好d… 另外提點晢晢其間又見佢好硬頸, 有時都好抗拒Surman姐姐o既更正, 會堅持:『我自己嚟!』 

呢堂仲做過d乜呢??? 隔咗一晚, 加上有點勞氣… 媽媽真係醒唔起喇…

有關晢晢行為問題, 媽媽覺得或許同學仔比較活躍及熱情, 所以令晢晢有點誤會… (就第一堂媽媽親眼所見, 呢位同學一見到晢晢就不停撲向佢, 又cool頸, 又不停拉跌晢晢幾次, 最後更嚇得晢晢喊咗出嚟…), 媽媽好明白同學仔係冇惡意, 亦明白晢晢都有不是之處, 但晢晢年紀太小, 媽媽都體諒晢晢係因為未完全明白才會有反抗行為… 不過媽媽唔想晢晢喺呢幾個月都帶住呢種心情學習, 更加唔想佢習慣出手打人, 所以跟Surman姐姐商量可否調班, 希望可以盡快安排得到… (晢晢o既學習路總係有點崎嶇…) 

當晚, 媽媽一啖沙糖後就開始審晢晢…

媽媽:『晢晢, 你今日返PLAYGROUP係咪同XX打交呀!』

晢晢:『aaa… XX推晢晢呀! aaa… XX捉住手手呀! 』(同Surman姐姐所講吻合!)

本來媽媽想同佢講打人唔啱, 但晢晢已經主動話:『小朋友唔可以打人!』(唔知係咪經Surman姐姐說教後所以識咁講呢?)

媽媽:『係喇, 下次同學仔推你你就話畀Surman姐姐知, 但就唔可以出手打人, 知唔知?』

晢晢:『知!』

媽媽:『咁你今日上堂係咪走咗去彈琴, 冇坐定定呀?』

晢晢: 點頭…

媽媽:『小朋友要聽Surman姐姐話, 叫坐定定就坐定定, 可以玩o既時候Surman姐姐就會畀你玩, 知唔知道?』

晢晢:『知!』

然後晢晢又無啦啦講:『小朋友一人一個玩具唔準爭架!』

媽媽:『係喇, 咁就乖喇~!』(希望唔係得個講字啦!) 

今日媽媽趁晢晢午睡時就打畀婆婆, 同佢講返Surman姐姐o既comment同傾吓平日可以點做去改善晢晢行為, 幸好婆婆非常明白事理, 好願意接納媽媽建議~! 另外, 又因為聽到導師提到晢晢前三指能力問題(Surman姐姐親口同婆婆講), 婆婆話佢會多d同佢玩夾豆同晾衫夾, 並提醒佢多用前三指… 連婆婆都咁肯幫手, 相信晢晢o既問題好快得到解決!!! 大家要繼續努力喇!