今日我同晢晢再睇多次兒科, 因為今朝佢把聲都係唔係好開到同埋"牛牛豆豆"... 醫生檢查過後就話晢晢個喉嚨已經接近消晒炎, 但痰同鼻水都好多, 佢話食埋呢次藥就唔好再帶佢睇醫生la wor, 佢話bb冇發燒又唔係細菌感染要食咁多藥唔值得! 嘩! 真係一位好有醫德o既醫生! 抵你好生意!!! 
晢晢今日食咗第一次藥之後明顯d痰聲薄咗好多, 亦都畀尋日生猛! 到啱啱臨訓前仲可以大叫同一輪咀講嘢! 不過食嘢真係少到嚇C人, 由原本每餐8oz奶, 而家只食到0.5-3oz不等... 雖然係咁, 但我相信晢晢好快就會再反斗返架啦!!! 
感謝主!! 畀我遇到一位好醫生, d藥又咁快見效! 仲有畀我一班好好o既弟兄姊妹為我哋一家祈禱!! 今日收到個電話, 佢話我知做咗人父母, 當遇到子女病時就更加感受到主耶穌o既愛.. 係呀, 當見到自己亞仔病時真係令願病果個係自己, 耶穌就係愛我哋愛到令願哋捨去自己o既生命...
我會努力, 係佳佳出trip期間我會悉心照顧晢晢, 7月3日晢晢要肥肥白白到爸爸返來都唔認得! 哈哈哈!!!! 
6月22日我哋參加咗一個YMCA舉辦o既<BB玩水樂園> , 一齊參加o既仲有喺BK認識o既BB, 包括嵐嵐, Anna, 仲有曈曈, 另外我仲叫咗大姐同Yoyo一齊參加~~~
呢日係第一次見班BK BB, 嵐嵐好白雪雪, 曈曈好高大, 而Anna就好細粒, 不過佢雙眼真係大到跌出嚟咁滯
~~ 哈哈~!
呢日教練教咗我哋一d同BB游水o既技巧, 例如抱BB伏喺身上然後指導BB用腳踢水啦, 抱住BB係水咗swing啦, 另外仲教咗一個浸BB潛水o既方法! 我聽完教訓講解一次後都冇諗過要同晢晢試, 因為都怕危險嘛, 點知大胆o既爸爸二話不說就浸咗晢晢入水, 晢晢嚇到呆咗(好在冇喊), 我都嚇咗一跳! 爸爸仲一不離二, 唔夠一分鐘再浸多一次, 呢個時候教練出聲叫爸爸唔好再浸, 因為BB太細係唔可以浸太多次, 否則回唔到氣... 教練救咗晢晢一命呀~! 
上完一個鐘頭o既堂, 我哋就沖涼換衫走, 點知d"家庭更衣室"full晒, 爸爸就用單人房嗱嗱聲同晢晢沖完涼, 然後我就抱晢晢去女更衣室換衫, 沿路d冷氣都好大... 我o既惡夢就開始喇...
同日返到屋企晢晢就發燒, 燒到成102度, 咳到而家, 又嘔, 今日仲聲都開唔到, 好慘呀! 
已經帶咗晢晢睇咗兩次醫生, 今日個醫生(另一個兒科醫生)檢查過話晢晢重感冒加喉嚨發炎, 開咗4支藥水畀晢晢, 每餐要飲成13ml藥水, 食親都反晒胃, 真係冇陰公... 但呢個醫生好有信心咁同我講, 晢晢食完D藥就可以清到D菌, 希望係真啦! 我帶晢晢睇第一個普通科醫生好流, 只係開咗一支退燒藥同咳水就算!!!
晢晢係第一次病, 已經嗱手唔成勢, 偏偏咁啱呢個星期五爸爸又要出trip去德國, 得返我獨力揍晢晢... 真係大鑊...!
我已經同公司拎咗假, 喺爸爸出trip期間全力照顧晢晢~! 晢晢呀! 你乖快d好返啦~! 媽媽最多應承你以後都會小心照顧你保護你, 好唔好?? 
今日做咗一件係我呢世女第一次做o既事, 就係半夜起身出去排隊, 唔係排咩咩演唱會飛wor, 係同晢晢報名參加幼潛~~
話說係BK同一班奶媽都傾咗好幾個月, 講開就相約一齊夾班去報名参加幼潛(包班8個人), 我仲自告奮勇話負責出去排隊tim~~~
開頭諗住我一個人出去搞掂, 但大西北出去TST最早班車都成5:20am先開出, 實唔夠前啦, 諗咗一陣就厚住面皮叫Ivy幫手5am前去到, 然後我出去接力, 估唔到佢一口應承我! 後來因為其中一個BK媽咪可以出到去, 我就冇麻煩到Ivy lu~~~ (在此再一次鳴謝Ivy~~!)
今朝我4:45am就身咗身, 泵完奶, 換埋衫, 就拿拿聲拎埋凳仔出去, 到TST已經差不多7am, 而subb(BKmama)就around 5am 到, 7am時我粗略估計我地排40到啦!
之後subb走咗, 我就開始坐凳仔打NDS, 大概8:30am就開始派籌, 係37號! 都ok啦!
好感恩係排o既時候一直都冇落雨, 直到當我交完表果一刻先至落好大雨, 果一刻諗起首歌 -- 雲上太陽! 
呢Ｄ咁瘋狂ｏ既行為真係做女時都未試過～～呢ｄ唔係母愛係咩呀～！ 哼～！
