話說晢晢年廿九開始咳, 一直用中成藥都頂得吓, 可惜連日來天氣實在太凍, 令病情轉壞, 最後媽媽喺年初七(星期六)帶咗晢晢去睇醫生。因為時間關係, 媽媽冇帶晢晢睇睇開果個兒科醫生, 而近近哋到樓下開業唔知有冇一年o既診所度睇; 不過都有意外驚喜, 因為診所好企理, 姑娘有愛心, 醫生又好細心
。醫生檢查後話晢晢有中上嚴重情度o既氣管炎
, 開咗消炎藥, 開氣管藥, 收鼻水藥同止咳藥, 仲講明開到好輕, 叫我放心畀晢晢食晒佢。結果晢晢食咗一兩次藥已經好返好多, 而且冇一般食藥後會發散o既現象, 瞓得好, 胃口好, 醒o既時候精神又好好
, 真係好感恩! 據說呢個星期回暖會係流感高峰期, 要更加謹慎先得喇! 
晢晢:「媽媽, 我咳咳呀...」
睇完醫生, 食過藥, 小睡咗個多小時後, 媽媽就帶咗晢晢到荃灣某PLAYGROUP參加試堂, 帶病中o既晢晢有d黐身, 不過warm-up完一輪媽媽都可以順利鼠走, 然後到樓下餐廳嘆個tea, 一個鐘頭後接返寶貝仔…
完成assessment後老師o既評語係… 
觀察力一般 -- 叫佢喺一堆物年中搵一樣出嚟(例如叫佢搵一件黃色lego), 佢望一陣好快就會話:「冇喎」! (不過媽媽唔多認同, 因為晢晢其實都幾眼利, 或者主因係晢晢對中文反應差d, 你問佢yellow可能會好快答到你~!
)
大肌肉發展良好 -- 叫佢行lego橋. 坐及趴喺fit ball上都毫無懼色, 平衡力亦不錯! 應該自細下過不少苦功! (又唔算咩苦功, 只係晢晢天生大膽d啫~!
)
專注力強 -- 玩靜態活動如穿珠、泥膠等好專注。(媽媽初時唔太認同, 又向老師提到晢晢玩動態活動時, 好多時都係玩幾分鐘就玩第二樣, 但老師話呢個年紀玩動態活動有呢個反應係正常, 睇佢有冇專注力係睇佢玩靜態活動時o既反應, 而晢晢就表現得唔錯。
)
觸覺敏銳 -- 老師放咗圓形同方形珠仔於袋中, 叫晢晢伸手入袋中, 憑感覺分別兩者出嚟, 晢晢100%全中! 
(從來未同晢晢玩過呢類遊戲, 估唔到佢做得咁好! 媽媽遲d 試下advance level, 畀豆同米叫晢晢分先~ 哈哈!
)
小肌肉一般 -- 穿珠仔時, 雖然知道繩係要由一端穿到另一端, 但要從另一端接過繩頭呢一PART就需要少許協助。(媽媽一向都覺得晢晢小肌肉發展只屬中規中矩, 但又唔算太差; 或許穿珠係難到佢, 但搣星星貼紙, 執頭髮, 用筆畫直線同圓, 用較剪呢d又handle得唔錯, 所以媽媽都唔太擔心。
)
欣賞晢晢會ASK FOR HELP -- 遇到困難時晢晢懂得ASK FOR HELP, 而唔係用情緒表達; 不過反過嚟睇, 解難能力就相對要提高一點, 因為求救得太快~!
解難能力顯得有創意 – 老師畀咗兩個LEGO人型公仔 + 1個韆鞦, 問佢「唔夠分, 點算?」晢晢就將其中一個LEGO放埋一邊, 然後同佢講:「你等陣先, 一陣輪到你!」
學習速度快, 模仿力強 – 老師叫佢收泥腸膠時要求佢先「放喺手」「拃實」(放手心然後鍊實佢), 然後先放入盒中, 晢晢就跟到足, 仲講埋「放喺手, 拃實, 放入盒」!
音樂感較弱 -- 老師邊放音樂邊叫晢晢打拍子同擺動身子, 但晢晢唔多郁! (應該只係呢日有d怕羞, 因為平時晢晢喺幼兒樂園都算幾郁得下~!)
只分到低音 – 老師將高音比喻為小鳥, 低音就比喻為大笨象, 叫晢晢分別搵返佢地出嚟, 晢晢只搵到大笨象, 唔識搵小鳥。(媽媽每星期都會畀晢晢彈下琴, 只希望培養佢對鋼琴o既興趣, 所以冇刻意教佢咩係高音/低音, 不過老師咁講完, 媽媽都要努力下, 唔係o既話, 晢晢「鋼琴小王子」o既稱號就不保架喇!
)
之後媽媽問到老師晢晢語言能力係唔係較弱!? 
老師就話晢晢呢個年紀有呢個情度算正常, 雖然唔算突出, 但起碼溝通時能作簡單回應。又提到媽媽覺得晢晢發展較慢, 可能因為晢晢由細至大屋企都用兩種語言有關。
另外媽媽又問到晢晢返學後變得黐身問題, 老師話唔覺得晢晢太黐身, 雖然媽媽離開時都有問「媽媽呢?」, 但又未至於好慌張! 
而媽媽對呢間playgroup既感覺, 一入門口時見裝修及設施都頗簡陋, 有點扣分, 不過對老師印象就唔錯, 好有heart, 只用咁短既時間已經能夠對一位小朋友有咁詳盡o既分析, 如果唔係用心去同小朋友相處同了解又點能夠做到!?
媽媽本來都打算參加, 但睇到晢晢個病樣, 突然有點醒覺… 回想起近呢幾個星期晢晢「密集式」返N1同PLAYGROUP, 晢晢已經變得沒精打彩, 喊攰同喊抱都比笑o既時候多, 又時時因為搭車外出, 令小睡同食正餐時間混亂… 想到呢度, 就好想畀晢晢休息一下, 所以媽媽同老師講就算上都只會4月開始… (其實媽媽尚未決定…)
第二朝本來要返幼兒樂園, 但爸爸媽媽見晢晢仲未病好, 就缺課一天。呢日我哋留守大西北, 同晢晢行下超市, 去公園玩下, 之後就留喺屋企玩舀通粉, 行下廁紙cat walk(用兩條圈裝廁紙砌成天橋然後喺上面行), 同爸爸踢下波, 教下中英文生字, 講下故事, 仲有特備節目~~ 同爸爸一齊沖涼~! 媽媽覺得呢日晢晢好開心, 已經好耐冇見過晢晢呢個樣啦!, 而且學到更多嘢(起碼唔駛浪費時間搭車), 臭脾氣亦不再~~~ 媽媽有d「我個晢晢返來啦~!」o既感覺~! (晢晢心諗: 我曳你就唔認我呢個仔嗱!?
)
晢晢用積木砌咗架TRUCK呀~!
晢晢話佢砌緊行人天橋WOR...
玩到冇嘢好玩, 用波子玩滑坡車!
又係o既, 得兩歲人仔, 已經一個星期返足五日學, 星期六日不如home teaching 好過啦, 既能親子, 又學到嘢!
晢晢:「嗱…嗱…嗱… 你話架, 唔好陣問又報埋d咩咩班要我上呀!!!」
媽媽:「係啦, 乖仔, 捱多兩個星期啦, 兩個星期後所有PLAYGROUP都完架啦, 抖一排, 有適合o既先再參加過啦~! Ok?」
22/Feb
小記: 今日係晢晢放新年長假後第一日返學, 仲要係返足3 個鐘, 媽媽好擔心晢晢又會喊(尤其仲未病好), 所以媽媽連日來不停同晢晢講有關返學o既故事, 又叫佢返學要開心笑, 笑笑的話就有「朱古力牛牛糖」食(朱古力味鈣片)… 再加上連日來媽媽不停祈禱, 求主保守返學順利, 又賜晢晢心裡有平安, 結果今日爸爸走時都冇喊到, 婆婆接放學時又係笑咪咪咁走出嚟, 真係好感恩!
(
