晢晢間學校, 喺中秋時只放一日假, 但就有成5份功課!!!
雖然每份都好簡單, 但要用心做的話, 相信都要花好幾個鐘先能夠完成…
好在呢日爸爸好幫得手, 好用心同晢晢一齊將功課完成, 媽媽先鬆咗口氣~! 
其中一份功課, 家長要同小朋友一齊玩泥膠, 其間要紀錄小朋友o既反應 (例如: 能否表達對泥膠o既感覺? 喜唔喜歡玩? 能否將泥膠搓成球狀等…?
), 最後家長就要同小朋友合作, 並利用埋牙籤創作一件泥膠作品…
以下就係爸爸跟晢晢的大作 --- 閃電王麥坤~!
(唔知點解, 媽媽覺得件作品個樣好似佢哋兩父子, 尤其果鼓傻氣~~ 哈哈~!)
真佩服爸爸o既創意, 媽媽自問就冇乜呢方面o既天份喇~!
呢日Surmen姐姐同Kevin哥哥都唔喺度, 但就多咗個Stephanie姐姐帶堂…
上課情況:
一開始係玩摺紙, 紙上有條直線, 小朋友要跟條線去摺, 目的係訓練手眼協調, Stephanie姐姐話晢晢做得非常好
, 問平日係咪有做過呢個活動~!? (其實媽媽從來冇同晢晢玩過, 有d唔相信晢晢做到, 搵日喺屋企試下佢先~!)
之後Stephanie姐姐再叫小朋友跟著線去摺一個上面有點數的立方體(即一粒骰), 摺完後就擲骰仔玩障礙賽(點玩媽媽已經唔記得喇~!)
障礙賽係先行一條獨木橋, 再上樓梯~! Stephanie姐姐話晢晢平衡力好好
, 但上樓梯時, 初初唔知點解會雙腳踏齊先再上一步, 而唔係好似平日咁左右交替咁行
!? 不過後來晢晢又自行更正返~!
到課堂下半部份, Stephanie 姐姐拎出一d平面圖, 上面畫有唔同顏色及圖案o既積木以唔同形態排列, 小朋友要跟住平面圖上o既排法, 以立體o既實物(積木)排返一樣o既形態出嚟(遊戲係有助發展觀察力及空間概念)~! Stephanie姐姐話晢晢做得好好, 係班上唯一一個能完全跟到, 而且快而準~! 媽媽認為晢晢有此表現係因為家中有一類似o既益智玩具有關~! (玩過, 當然會識玩~!)
之後小朋友亦有玩到一d有關counting的遊戲(媽媽又係忘記咗玩咩…), Stephanie姐姐亦係形容晢晢表現好好~!
Stephanie姐姐總括晢晢全日表現係:
好犀利, 表現超越比同齡小朋友!
真多謝Stephanie姐姐有如此高的評價~! 不過媽媽覺得晢晢仲有好多進步空間~!
小記: 課堂後幾日, 晢晢無啦啦同媽媽講:
晢晢: 『晢晢呢, 返PLAYGROUP時冇扭計呀! 同小朋友玩呀~!
』
媽媽就話:『冇扭計咁叻呀
! 咁晢晢BYE BYE 爸爸果陣有冇喊呀?』
晢晢好老實:『有呀!』
媽媽: … (無言)
爸爸揍咗四日, 見晢晢次次都喊住入門口已開始有點微言
, 叫媽媽考慮清楚晢晢係唔係真的喜歡返PLAYGROUP, 又叫媽媽同晢晢好好傾下…
其實媽媽一早已經問咗晢晢點解返PLAYGROUP喊, 佢次次都答我:『我唔捨得爸爸走呀!
』 然後媽媽就會解釋放學爸爸會接返你, 係唔駛喊, 晢晢每次都表示明白… 但結果依然…
到尋晚, 唔知爸爸係咪唔信媽媽, 佢親自問晢晢…
爸爸:『晢晢, 你鍾唔鍾意返PLAYGROUP呀?』
晢晢大聲答:『鍾意~!』
爸爸:『咁你鍾唔鍾意Surmen姐姐同Kevin哥哥呀?』
晢晢:『都中意~!』
爸爸:『咁Surmen姐姐同Kevin哥哥鍚唔鍚你呀?』
晢晢:『鍚~!
』
爸爸: 『咁Surmen姐姐同Kevin哥哥啫係邊個呀?』
晢晢:『Surmen姐姐係媽咪, Kevin哥哥係爸爸…』
爸爸 & 媽媽: … 無言…
(可能太夜, 晢晢有點精神錯亂…)
仔呀仔, 到底你要扭到幾時? 可唔可以笑住返PLAYGROUP叫爸爸媽媽唔駛擔心~!?
