照4D - 28 WEEKS

今日去咗照4D, 不過BB就唔係幾合作, 一係用背脊”得”住我, 一係就成塊面痴喺我胎盆… 咩都睇唔到… 我做晒高難度動作(eg: 拮高兼打側身) 都照唔到, 咁姑娘叫我出去坐陣再試過… 隔咗幾個字再試又係唔得… 到第三次, 終於照到喇(雖然仲有少少痴住我胎盤)…

 

從鏡頭可以好清楚咁見到BB個樣, 佢好多動作~~ 好似伸懶腰啦, 打呵欠啦… 佳佳睇得好興奮, 我就唔知點解冇乜大感覺, 或者我太攰, 又或者我覺得有D肉酸… 不過其實BB都好得意, 原來28week已經咁大隻…

姊妹組 + 腳腫日

尋日一早返崇拜, 之後就直踩到5點幾去Lulu屋企開姊妹組, 佳佳就去左亞生屋企開弟兄組… 成班姊妹一齊傾計好似好耐都冇似過lu~~~ (尋晚有我, Lulu, 秀儀, Simmy, 凱兒, 雪兒, Ivy, Irene, 賽賢, 娜娜, 允慈, 愛芳, 螺絲粉…希望冇數漏啦~~)

 

一上到去, 大家就齊整嘢食, 有咖哩雞, 餃子同苻竹白果糖水… 都幾好味, 不過Lulu 間屋真係有d熱, 開唔開冷氣都係, 有段時間我熱到有d唔清醒, 不過隔左一陣就ok~~~

 

傾計時間我地都傾左好多話提, 好似螺絲粉結婚啦, 我生BB啦, 仲有愛玲同允慈o既關係… 最精彩係允慈果part, 不過呢度就唔方便透露喇~!

 

小記: 係離開Lulu屋企時, 我一穿隻涼鞋就感到同平時唔同, 迫咗… OH NO! 我腳腫呀!!! 係第一次… 會唔會腫到生架!!?? 我唔濟呀!!!

法國醫院撲位記

星期六果日, 我地去咗馮澍明度覆診, BB已經掉頭, 20cm左右, 預產期早左4日, 而家係12月19日, 唔知會唔會撞正12月18日結婚紀念日呢? 果日我順口問醫生, 如果我未交法國deposit 緊唔緊要!? 佢即刻好緊張咁話: “你仲未交呀! 收到memo full 左啦! 你星期一打去check啦! 不過如果full左咪去港安lor, 貴少少啫…” 我由果一刻開始心情就好down… 夜晚去屯門同我D屋企人食飯, 大姐話如果去唔到法國就唔好諗其他醫院, 因估計都要貴成一萭蚊, 我聽到心情更down, 無啦啦要駛多一萭, 好擔心, 又唔想去屯門醫院生, 因為d comment 勁差… 到星期日, 佳佳突然醒起Andy 個老婆係喺瑪加烈做產科護士長, 果晚就打比佢問下轉院o既事, 佢話幫到我, 但床位就control唔到(都明o既, 唔通特登留定張床比你唔比其他人訓咩!), 聽完之後個心都定d…

 

到星期一(10/Sep), 我同佳佳一早起身出發去法國, 撘左差唔一個鐘車, 去到門口先拎張嘢出o來睇, 原來交deposit 要6pm-9pm, 咁都去到lor, 就走去問下, 上到三樓產科, 個姑娘開頭都話唔收, 佢問完個老姑娘, 咁個老姑娘就叫我地mark 低資料同叫我地6點返去先再同我地簽張確認書… 之後我同佳佳就撘的士返公司, 佳佳居然冇遲到), 我就9點50分返到公司, 返到去勁多嘢做!!! 之後我就4點半走(哈哈, 遲到早退~),去LCK同佳佳會合一齊再去法國… 去到都等左一輪先簽到張確認書, 交埋三千蚊按金… 好似放下心頭大石咁, 但另一方面又覺得好快就要駛成幾萭蚊而肉赤… 人真係矛盾又麻煩~~~!!! 不過, 其實我為咗呢件事都一直祈禱, 我同神講, 無論book唔book到法國我都相信係神為我安排最好, 神會為我同bb同佳佳預備~! 無論係屯門, 瑪加烈, 法國, 仁安或者港安, 我都相信係係神為我預備, 而且係最好~!!!

 

之後, 我同佳佳就出左旺角, 去到買左一大堆街頭小食(雞蛋仔, 燒賣, 黑椒牛丸, 尤魚, 魚旦…) 同佳佳喺巴士一齊食, 好開心~~~ 之後我地就到屯門聽講座, 講有關同BB沖涼同餵人奶, 一D都唔悶, 佳佳都聽得好投入, 返到屋企佢仲話第時佢要日日同BB沖涼~~~ 係就好呀~~~!!!!

 

今晚差不多10點收到馮醫生電話, 佢好緊張咁問我法國book唔book到, 因為剛收到仁安memo都full埋… 我就話佢知我已book到法國~~~ 所以神真係好憐憫我呢個懵人~~~ 感謝主~!!!

內科覆診

尋日下午去左覆診(內科), 都冇乜大問題, 甲狀腺指數正常, 唔駛加葯, 只係血色素偏低, 但都屬於正常範圍, 尤其孕婦好多時都會咁… 感謝主~!

 

睇完醫生之後, 都差唔多四點半, 我就撘輕鐵(籮咁大個肚都一直冇人讓位!), 到銀座時, 見有時間, 就去左東海堂買個炸火腿芝士多士食, 但勁難食, 好油, 我食左一半到就掉左! 之後我就去左百佳買面包做早餐比佳佳, 入到去, 法包冇得賣, 我就買左英式鬆餅 (今日食過好好味)! 又買左罐粟米吞拿魚醬同蕃茄… 後來諗起佳佳成日都想食啫喱, 我就諗, 要整就整好d, 我就買左罐雜果(十幾蚊一小罐)同花奶, 其實我覺得好貴, 但我個心不斷諗, 為左氹佳佳開心, 值得o既~~~ 之後我又買左三文治袋, $13.9 一碌, 買二送一, 我掙扎左一輪(廿幾蚊買三文治袋好似有d貴, 但最後都買左三碌, 因遲d BB出世都有用! 最後我駛左六十幾蚊! (死火! 仲乜得咁C9!!!)

 

買完差唔多5點25分, 我就急急腳去趕專巴, 但遠遠已經見架車到左, 我就揮手叫停佢, 我行左好遠路, 又行得慢, 要個司機等左好耐, 本來都怕佢唔等, 好彩佢肯等, 如果唔係要我拎住咁多嘢行或者等多四個字就慘啦~~~

 

尋晚我同佳佳喺媽媽屋企食完飯返到屋企, 我地就食啫喱, 我同佳佳都食得好開心!

 

今朝整早餐, 本來諗住整吞拿魚夾鬆餅, 但好似唔係好襯, 最後整左煙豬脾+蕃茄+芝士, 佳佳果份仲double煙豬脾, 今朝焗熱左勁好味, 佳佳都話好味呀~~~

拍拖五週年紀念日

話咁快就過左五週年紀念(9月3日), 尋晚我同老公去左Fat Angelo’s 食飯, 叫左海鮮燴飯, 芝士焗西花同萍果撻, 好好味, 尤其開頭個包同沙律! 開頭我食得好急, 好似食便飯咁, 一D慶祝o既感覺都冇(可能有d餓同太好味啦), 慢慢醒覺之後, 我就開始放慢, 同老公回顧呢五年…

 

喺五年時間裡面, 我地已經經歷左拍拖, 買樓, 結婚, 生BB… 真係好快! 老公話, 初時都冇諗過咁早結婚, 仲[諗住買完樓兩年後先結, 因為怕唔夠錢! 不過師母同佢傾完之後, 佢就決定要結婚… 雖然我地個婚禮唔算好豪, 但因為係教會”同年齡界別”中第一pair, 大家都因為有新鮮感而好興奮, 而且我地個宴會場地又可以讓所有人都看到, 加上朋友多, 親戚少, 氣氛好好, 個個都好投入…

 

之後我地再諗返拍拖到而家, 其實對我o來講冇乜大轉變, 感覺唔到邊度係分水領… 老公話, 係咪而家仲有拍拖o既感覺? 其實, 我反而覺得一直都冇拍拖感覺(冇乜浪漫經歷 @_@), 好似一齊就係好自然o既事咁… 不過, 自從知道我有左之後, 我同老公o既關係好左好多, 冇交嗌, 大家都冇發大家脾氣, 冇嬲o既時候, 好和平, 冇容忍o既需要, 成日只係想點令對方開心… 其實呢段時間, 係我同佢一齊最開心o既, 唔知BB出世之後, 可唔可以維持呢?

 

尋日又諗到改名o既事, 諗左幾個, 迦藍, 翱迦, 翱臨… 我自己就唔鍾意迦藍, 一來” 迦乜”好似好leung, 二來我唔鍾意個”藍”字呢個音… 唔知最後會唔會改其中一個呢?

24 WEEKS

又一個星期o既開始啦! 今日除左係bb o係我個肚踏入第六個月之外, 仲係我同佳佳一齊五週年紀念, 今晚我地打算去 Fat Angelo’s食返餐慶祝~~~ (話咁快就五年lu, 今朝佳佳同我講五年我地就有自己o既樓, bb又就來出世… 好幸福~~~~)

 

星期六(01/Sep), 我同佳佳去左旺角上樓舖賣左好多BB 嘢, BB床啦, BB車, 揹帶, 奶pump連杯, 被, 雨簷… 駛左$6xxx~! D貨即晚已送到, 我同佳佳見到D BB 嘢都好心急想BB快D出世, 想快D睇見佢用~~~ 尋晚我同佳佳都忍唔住開左張BB床, 佳好細心同張床消毒, 我就太攰啦, 只係坐埋一邊睇住佢整~~~~ 之後佢將部分之前買落o既BB衫, 被等放o係床上, wooo! 已經滿左lu~~! 我諗我要快d執個衣櫃, 等BB第時可以同爸爸share 衣櫃用~~~~

 

同一晚我d屋企人o來左我屋企玩wii (大姐借回來的), 佢地玩得好開心, 我都睇得好開心! 果晚悠悠仲表演自己企, 佢企得好穩, 完全唔駛人扶, 叫佢clap又識clap, 好得意… 唔經唔覺, 悠悠已經十一個月大啦 (今日9月3日)! 下個月10月3日, 佢就一歲啦! 時間過得真係快… 明年今日, 你就有個表弟仔同你玩, 你會錫表弟嗎~!?