陶。晢。愛。這個家: 6月 2009

2009年6月30日星期二

掉我個仔落街

呢幾日心裡面都不斷出現一個畫面, 就係我個仔畀人掉落街! 心裡好不安... 有時會連手都震埋...

事源喺上星期日, 完咗聚會後各人都紛紛步出教會, 就喺門口位我見到我哋教會一位年輕人抱住晢晢翼下, 然後將晢晢成個身放出欄杆外! 作勢掉晢晢落樓!!! 我哋教會喺1樓, 即係話欄杆以外就起碼有一層樓咁高! 我睇見好驚好驚! 但未嚟得切開聲就見到果位年輕人o既爸爸輕描淡寫話咗佢一兩句似乎唔相關o既說話, 我就唔好意思再開聲... 之後我哋就去食lunch, 我就忘記咗呢件事...

到當晚我哋去完科學館返到屋企, 我醒起呢件事就同老公講, 原來佢都睇到! 我問佢點解唔出聲? 佢冇答我! 然後我再話點解個年輕人個爸爸可以當成小事咁嘻嘻哈哈帶過就算!? 老公只答一句"係lor"... 就冇再講咩...

自此, 我一呢埋眼就會諗起呢件事, 好驚! 好驚! 我覺得好似個個都覺得好小事咁! 無論個年輕人個爸爸甚至連我個仔個爸爸都係咁!! 咁容乜易有下一次!!!?? 我好擔心我保護唔到我個仔!!! 我好怕有任何悲劇!!!

今晚, 老公仲開緊OT, 夜欄人靜, 我一個人食食下飯又諗起呢件事, 我忍唔住喊咗出嚟, 之後我再忍唔住打畀師母同佢返講呢件事! 師母即刻好緊張問我喺邊個做! 期間佢仔仔聽到我哋講緊呢件事都係旁邊講搭咀"係呀! 我都見到, 真係好危險!", 原來仲有其他人見到! 即係我冇睇錯啦!!! 咁點解個個都當成小事!? 冇人出聲!?

師母問我點解我唔即時話果位年青人! 我承應我處理得唔好, 因為我見佢爸爸有即時開聲, 所以我就冇講嘢, 但我估唔到佢爸爸竟然用咁輕挑o既態度處理! 喺果一刻我諗, 如果我開聲鬧果位年輕人就好似好唔尊重佢爸爸咁, 所以即使我心裡好激動, 我都冇開口話佢...

剛才師母話我都有唔啱! 我係唔可以唔出聲! 因為我開聲唔代表你要教人哋個仔, 而係保護自己個仔!!!

係! 我有錯! 晢晢, 對唔住! 我唔識得保護你! 好彩呢次有天父保守! 媽媽已經受到教訓, 下次再有人有意圖對你做危險動作!!! 媽媽一定鬧到佢狗血淋頭!!!

"唔愛呢隻呀"

平日晢晢喺婆婆屋企都冇咩好做, 閒時工人姐姐就會播下碟畀晢晢睇, 今日下晝上婆婆度食lunch, 工人姐姐如常播碟畀晢晢睇, 畫面只去到WARNING果板, 但晢晢已經喊晒口講"唔愛呢隻呀!"... 原來晢晢已經極度厭倦Your Baby Can Read, 見到WARNING已經好反感... 又係o既, 晢晢已經睇到連最尾個查詢同每隻碟睇幾多個月都識背, 有乜法子唔悶到反眼丫~~~

之後我就問晢晢: "咁邊隻呀?"

晢晢答我: ABC呀

我再問: 係咪World family呀! (World family有隻ABC SONG嘛)

晢晢再一次喊晒口: 唔呀! ABC呀!

我真係R晒頭, 但工人姐姐竟然明白晢晢要邊隻碟~! 之後就播咗一隻不知明o既英文碟, 第一隻歌就係THE ABC SONG... 晢晢見播緊心水碟即刻心情靚晒, 仲喺梳化霸個靚位跟住電視一齊唱...

晢晢真係大個咗好多, 原來佢喺不知不覺間已懂得表達自己o既感受! 係o既, 套Your baby can read 大大話話都睇咗成年, 日日播, 而且連flap card都征服埋(都認讀到9成lu), 都係時候功成身退喇~! 好啦, 媽媽唔再迫你睇----- 住啦~! 哈哈~!

2009年6月28日星期日

科學館一遊

今朝完咗教會聚會, 食完lunch, 爸爸見仲早就話: 咁大雨, 可以帶亞仔去邊度畀佢行下呢? 我心諗你最多咪話行APM/德福果d... 點知佢突然話去科學館! 難得今日又落雨, 又拎住大大個奶粉袋, 又揹住個電結他都咁有亞仔心, 就算我已經攰到C都好少理! 一於奉陪~!

今日科學館仲多咗個糖果嘉年華, 都幾得意架~! 我哋喺果度畀晢晢做咗個嗅覺同味覺關係o既實驗~~~ 本身個實驗係鍊住個鼻o趙粒糖, 5下後再放開手, 你會feel到鍊住個鼻時粒糖係冇味, 但一放開手就會感到d甜味~! 我哋同晢晢玩我都唔知佢feel唔feel到個分別, 但係佢就覺得鍊住個鼻時好得意, 仲自己鍊埋一份~~

美中不足今日冇帶相機, 不過都仲有段片睇下~~~

2009年6月27日星期六

舀藍梅

今日係大好週末, 不過爸爸因為工作所以我同晢晢只好喺屋企休息(咪啫係漚...), 當媽媽同晢晢已經玩到冇嘢好玩時, 突然醒起看過一個朋友的blog佢個囡囡用舀藍梅訓練小肌肉, 咁啱屋企有一盒, 媽媽即開檔同晢晢玩啦~~

點解d藍梅咁酸晢晢都食到咁開心o既

晢晢小天地的序幕

晢晢日漸長大, 需要o既空間會愈來愈多, 除咗要有一個屬於佢o既睡房, 仲需要有一個適當o既位置畀佢玩, 畀佢學~!

爸爸媽媽早前商量過後, 決定將我哋3間房期中一間房大變身! 我哋o既idea係…

- 先將較高身o既單人床換成一張較矮o既小童床, 逐漸訓練佢一個人瞓…

- 另外再買d小衣櫃(要安全o既), 教佢自己整理自己o既衣服…

(睡房區暫時係咁多)

到遊戲/學習區…

本來爸爸想將間晢晢睡房o既一角間為遊戲區, 但因為媽媽睇過一本書講“中學前唔好畀佢習慣返到屋企就呢喺房, 以免阻礙溝通”, 所以我就說服爸爸掉咗張9成99新o既餐枱, 將成個飯廳改裝成晢晢小天地~~~我哋o既idea係…

- 掉咗張餐枱後放數個矮木架, 將晢晢o既玩具一陳列品咁放好, 藉以教佢玩完玩具要放返原位, 從小培養佢做事要有條理~! (其實晢晢受過長時間訓練, 都算幾有手尾, 每次玩具時只會拎一件, 玩完會主動放返原位, 不過現時只得一個玩具箱而唔係木架…)

- 原先個玩具箱就由客廳移到遊戲/學習區區, 但裡面只放唔同類型o既波波而唔係“大雜會”(睇過書話最適合小朋友o既玩具係積木同波波嘛, 咁啱屋企咁多波波, 啱晒~!)

- 買一個小木架放晒晢晢o既圖書~! (晢晢好鍾意睇書架~!)

- 另外會買一set兒童書枱畀, 讓晢晢好好適應坐定定玩玩具/做圖功/聽故事/睇書, 為明年一月N1開學o既校園生活做好準備~!

(遊戲區暫時係咁多)

都講咗成個幾星期, 尋晚終於的起心肝去IKEA, 為晢晢小天地展開序幕! 是日收穫包括:

- 小童床連床褥

- 小童書桌連2張凳仔

- 2個小木架

- 一塊掛牆磁石黑板(藉以吸引晢晢去寫寫畫畫, 從而激起佢繪畫興趣~! 不過其實未諗到掛喺邊, 爸爸話買咗先算… 咁都得~!?)

- 其他濕星嘢eg小童衣架, 磁石塊…

總消費額around $15xx, 都唔算好貴~! 不過仲差衣櫃仔未買… 時間緊迫, 揀唔切, 唯有遲d行多轉…

貨30號送到, 咁啱我拎咗假, 可以慢慢執~~~

媽媽好期待成形後o既晢晢小天地呀~! 晢晢, 希望你都鍾意啦~!

2009年6月24日星期三

穿珠仔

今日先講開晢晢上星期玩穿珠時, 雖然會穿, 但都未係好識將粒珠tun去條繩度, 又要人提先會再穿下一粒, 不過當今晚再畀佢玩時, 佢突然又掌握到曉門, 好利落咁左手拎住支針, 右手拎住粒珠嚟穿, 穿過後, 右手會放開粒珠然後接過針頭, 然後用左手tun粒珠去條繩度, 之後再將右手的針給左手, 主動再穿下一粒... 好叻仔~!

其實我都冇特別去教, 因為我明白晢晢性格, 我愈捉住佢隻手去教佢愈冇興趣學~! 反而我放手畀佢去試去領悟, 佢會學得更快, 而且會更有滿足感~~

晢晢, 你話媽媽講得啱唔啱???

瘋狂莫札特

Simon 的確係一位好上司兼好爸爸, 佢知道Mozart Effect對小朋友好, 除咗預備咗一隻仔畀佢3個月大o既仔仔外, 仲好有心為晢晢預備一隻, 但係… 點解晢晢次次聽親都瘋狂成咁o既~!?

加上同爸爸玩就更加興奮~~

今日返到公司我訪問Simon同埋另一位都有呢隻CD既同事, 佢哋仔仔都唔會聽到咁wor… 晢晢, 你冇事嘛~!?

2009年6月22日星期一

What Colour?

今日媽媽因為扭親腳下午請咗sick leave, 睇完跌打就約婆婆同晢晢一齊去食個tea, 食食下晢晢突然指住d 嘢講"What colour?", 我問婆婆同工人姐姐係咪佢哋教佢講, 佢哋都話冇教過, 係晢晢突然今日成日自己講"What colour?"

晢晢話: 你哋平時都考得我多(我哋成日問佢What colour is it?"), 而家仲唔到我考返你!? 嘻嘻~!

媽媽話: 好啦, 以後你教返媽咪啦~! 你問我"what colour is it?"時, 媽媽會好似你咁答返你blue, red, green, orange, pink, yellow, purple...

2009年6月21日星期日

搣粟米

今日煲粟米紅白白雞肉粥用剩半支粟米, 靈機一觸畀晢晢玩搣粟米段練一下小肌肉~!

不過可能搣生粟米對於一個18個月大既小朋友會有d吃力, 當晢晢搣咗大概十多粒後就開始左拎右拎支粟米搵下有咩方法會易搣d, 佢試倒轉搣同埋中間咪, 不過都冇乜成績, 只不斷同支粟米渣汁~~ 玩多一陣仲冇心機玩~~~ 走人~!

碗中o既粟米粒係晢晢搣架~! 都有十多粒~!

玩完o既粟米冇浪費到, 媽媽事後自己烚咗嚟食, 哈哈~!

十指痛歸心

今日完咗聚會上咗光明頂練歌, 晢晢就喺露台玩, 到練完歌我就去搵晢晢, 冇耐我就眼白白睇住希希大力推天台屋個玻璃門, 剛剛晢晢放隻手喺門隙 --- 夾實咗… 果一刻晢晢當然大喊尖叫, 而我都心痛到想喊… 檢查過後, 晢晢隻左手無名指夾出一條紅痕, 腫起咗少少, 不過好彩仲郁到, 之後小曾曾畀咗小半粒能得利仲止埋喊… 咁先冇咁驚…

事後Esther(希希媽)好緊張晢晢情況, 搞到我都唔好意思… 其實我知希希係冇心o既, 我都怕希希以為我哋會怪佢, 所以我嗱嗱聲去同希希講: 晢晢郁到冇事呀, 唔駛太擔心喇~! 不過都有少少痛架, 所以你下次要小心睇住, 有小朋友行過就唔好大力閂門啦~! 之後希希好乖咁出去搵晢晢話要睇下晢晢點wor… 小朋友, 其實好純真~!

晢晢, 今次幸得天父保守你隻手指仔冇咩大礙, 不過下次你都要醒目唔好亂放手喺門隙啦!

2009年6月16日星期二

數學概念

近來發現晢晢開始有數學概念, 已唔止一次見過晢晢邊疊積木邊逐件數1-2-3-4-5, 又見過邊篤住d手指/腳指邊數1-10 / one to ten, 今日同班0712媽媽朋友提起, 有人就提醒我我快d買d數理玩具畀晢晢玩, 我喺淘寶揀咗4件玩具畀晢晢, 希望佢鍾意啦~!

玩具包括: 乘除法板, 蒙氏教具-感觀教具8件套(家庭版), 木製動物水果串珠, 形狀輪(認對形狀)

後記: 貨於19號收到! 件件都好精美! 真係物超所值!!! 當晚我已急不及待開咗個串珠同其中一件蒙氏教具畀晢晢玩, 晢晢好畀心機串珠之餘, 仲好細心欣賞每一粒珠珠o既顏色同圖案tim~~~ 是次消費得好有滿足感~! 哈哈!!

2009年6月14日星期日

自助游水

今日係晢晢今年第二次下水禮, 目的地係樓下會所個泳池, 近到喺著住泳衣搭lift果隻~~

落到水, 本來晢晢係坐緊"潛艇"(小童水泡有兩個loan插對腳入去坐果隻), 但大姐提議我畀晢晢單單用手袖+普通得圓形個loan果種畀晢晢試吓~~~ 結果...

晢晢試咗一陣就掌握到平衡, 仲開游起上嚟, 自由自在游來游去(其實不停打圈), 仲一路游一路唱住"row row row your boat", 玩到好開心呀…

不過美中不足我落樓時冇睇時間, 原來落到去已經過咗4點半, 個池5點就收, 玩咗唔夠半個鐘就要走, 唔夠盡慶…

唔緊要啦, 晢晢你咁鍾意游水, 等爸爸返嚟我地再游過啦~~~

2009年6月13日星期六

The Alphabet

大概15個月開始晢晢經常念住A-B-C-D-E-F-G, 偶爾會念下H-I...M.., 媽媽一直以為晢晢只能夠念到G, 直到4月尾, 即將踏入17個月時, 婆婆竟然同我示範, 喺少少提水情況下, 晢晢竟然可以由A念到Z! 媽媽即時"O"晒咀~!

之後媽媽再細心教晢晢認Alphabet, 不經不覺, 晢晢已經認讀到所有英文字母, 而家就算媽媽隨意抽一張字母咭晢晢都能輕易讀出~~

以下片段係今晚拍, 雖然念到O就開始亂"up", 中間又有少少失手, 又試過畀電視播放中既"row row row your boat"吸引而分心, 不過都算表現唔錯呀~!

媽媽下一步係要教小階定係其他生字呢?? 晢晢你話事喇~!

走了半個地球

今日long week, 要返工, 我如常8點10分出門口趕搭唯一一班o既穿巴出荃灣, 點知落到樓, 架穿巴竟然準備開車! 我就9秒9跑去追... 司機叔叔非常好人, 佢示意我唔駛跑, 叫我喺路口等佢~! 咁我就大安指意等佢駛埋我度, 而我就趁呢個短空檔望"真"係咪荃灣車~~ 我上到車就再三感激司機停車之恩~~~

當架車一路開都冇為意, 但行行吓! 點解我喺三號幹線架!!!???

係果一刻, 我先知我搭.錯.車.!! on the way 中港城!!!

其實沿途都有站, 但一路都唔見有MTR, 最"熟悉"只有上海街呢個街名, 但都係唔知喺邊!? 咁唯有捱到總站先落車啦… 落果陣係8:50am…

平時如果我遇到搭錯車或者盪失路, 我一定會call佳佳或者朋友求救... 但今日佳佳仲喺福建!! 電話.... 我尋日漏咗喺公司... 真係由頭黑到落尾...

落車時都唔係好肯定d路, 但就不停同自己講: 有幾難啫? 我一定行到出去o既~! 又安慰自己: 佳佳唔喺度我自己都搞得掂o既! 冇電話~冇地圖~我一樣可以搞得掂!

結果, 我行到marco polo prince 已認到d路, 之後由TST搭MTR到葵芳, 再轉的士返公司, 9:40am到, 都唔係遲咗好多啫~! 不過車費就花咗$60!!

同事問我做乜咁遲, 我只好苦笑話我"走咗半個地球先返到嚟", 同事對我o既今朝o既表現到感到好驚訝...

唉... 我真係論盡得好過份~! 尋日漏電話! 今朝就搭錯車! 鑊鑊新鮮鑊鑊金!! 但我會原諒我自己! 呢個先係我吖嘛~~!

My Adrian Can Read

自晢晢4個月開始就教佢學生字, 到14個月已開始能認字, 例如:

- Could you please point to / pick up the word "apple"? 晢晢就會指住/拎起張apple card

- 又或者晢晢見到生字會做出相應既動作, 例如見到"wave"會揮手, 見到"mouth"會張開口, 見到"smiling"會微笑...

直到上個星期日, 剛剛踏入18個月, 晢晢突然主動讀出字咭上o既字, 數日後, 已經能將全部Your Baby Can Read slide card 的字認讀出來(共40多個字生, 當中包括d較長o既字例如chimpanzee, touch your toes, elephant, arms up...), 媽媽睇見好感動啊~!

以下片段係今晚拍, 有d虾碌又有d失手, 不過拍到都好難得, 因為晢晢出奇地冇搶電話, 而且今晚只得我兩母子(爸爸出trip), 又要顧住鏡頭, 又要叫佢讀, 又要唔畀佢走佬... 都唔係咁易呀~!

以下係"NG"片段, 拍果刻以為晢晢叫"dog"做wow wow, 睇返先知佢學我跌card叫"唉yo", 之後仲飛我card...

2009年6月11日星期四

打腫晢晢隻手 >.<!

仲諗住晢晢打針唔喊好叻! 點知今日婆婆同我講晢晢發燒, 手脾個針口位仲腫到拳頭咁大! 又紅又腫又慶仲實篤篤! 婆婆話好正常, 但我睇到肉到赤埋!

婆婆叫我fu暖水. 但已經慶合合唔係應該冷fu咩!?

媽媽真係好鬼冇用! 腫成咁都注意唔到! 唔怪得尋晚瞓瞓吓慘叫啦! 一定係又腫又慶好辛苦喇... 唉... 難為了晢晢…

2009年6月10日星期三

到健康院

今日特登請咗假同晢晢返健康院做成長監察同打歲半針, 成績如下:

Wgt: 10.57kg

Tall: 80.5cm

由中大碼變成中碼B, 姑娘評語--增長欠佳...

見姑娘做成長監察時, 用筆畫嘢, 用杯飲嘢, 行路... 都冇問題! 語言方面, 姑娘更加大讚佢叻! (我都未講佢念到A-Z同1-10咋~!)... 之後姑娘問返晢晢上次扭傷腳o既事, 我又提到佢便秘同食奶問題... 姑娘又係話晢晢食得太多奶, 便秘可能係關食得太多蛋白質事, 建議減奶同時加多d蔬果... 唉, 都唔係第一次聽, 婆婆唔肯follow都冇計... 又係奶粉廣告的禍...

之後打針, 冇喊, 鬆容不迫! 好叻仔! 不過婆婆就好大反應話晢晢一d都唔叻, 因為奀皮既小朋友先唔怕痛, 咁先惡教!