BB出世啦~! 2007年12月6日1:25pm

2007年12月5日, 放產假前最後一個工作天... 果日做到大概6pm, 開始feel到個肚有規律咁痛, 唔太痛但好有節奏, 我就開始做紀錄, 點知已經係5min痛一次, 個人開始慌, 手都震埋, 但因唔太痛所以唔係好信, 冇幾耐有個生過BB o既女同事見到我面青青咁就問我發生咩事, 佢聽到我5min痛一次就叫我快D入院, 因為都算痛得密, 我就係咁去toilet check吓有冇穿水見紅, 又冇wor, 所以都唔係好信... 本來約左佳佳去荃灣買結婚禮物比朱良, 開頭都諗住照去, 諗諗下都係唔敢博, 之後叫咗佳佳喺荃灣接我回家沖涼洗頭, 點知冇幾耐(大概6:30pm), 佳佳已經到咗我公司樓下接我...

我地撘的士去到荃灣西再轉西鐵回家, 途中我不斷record痛o既情況, 都係5min一次... 返到屋企, 我同佳佳都拿拿聲沖涼洗頭, 連牙都刷埋, 本身諗住沖完就出發去醫院, 但因為沖涼時feel唔到痛, 我怕食咋糊, 所以沖完涼我就坐喺按摩椅唔郁再觀察, 冇幾耐又feel到痛, 我再一次record, 點知又係5min一次, 都係唔太痛, record咗一陣我開始唔耐煩, 就諗住拎件冷衫o來織o來減壓, 但因為個心唔安樂又收埋咗... 隔左一陣, 我哋就打比師母問下我到底係咪陣痛, 佢話係, 仲係咁催我去醫院, 果陣時我都唔係好信... 後來又打比Andy個老婆(佢係產科護士), 佢話我咁o既情況多數都生得, 不過可以再觀察多半個鐘, 咁我就等多一陣, 就開始換衫執行李...

我哋冇撘的士, 因為真係唔係好痛, 我唔想搞到好緊張但原來未生得就好瘀.. 我哋最後撘咗尾班專巴去撘西鐵, 之後係美孚轉地鐵到太子先撘的士去法國醫院...

到左醫院, 個的士司機仲停左個唔係幾就腳o既位置, 我心諗: 好彩我唔係太痛啫, 如果我痛得勁點自己行到去產科病房呀? 司機, 你真係"專業"!

上到病房, 個姑娘同我哋做晒手續後, 就叫我換衫同埋同我檢查... 之後上到病床, D陣痛就開始密咗, 大約3分鐘一次, 亦都痛得勁咗, 但都係一度都未開... 佳佳一直陪住我, 同1am到佢先走.. 我就自己一個人留喺醫院等生BB...

成晚流流長我都冇乜點瞓, 只係不斷紀錄陣痛o既時間, 一直都係3分鐘一次, D痛都係忍受到, 中途我仲可以瞓到1-2個鐘tim...醒咗果陣我仲諗: 我會唔會食炸糊未生得呢? 所以我就祈禱求神比我痛得勁D, 等我肯定自己真係生得...

到咗第二朝7:30am, 我就feel到第一之劇痛, 冇幾耐醫生就到咗, 佢同我檢查完就話我都係一度都未開, 連放支針拮穿羊水o既位都唔夠... 我問佢我要等多幾耐, 佢就話唔知, 起碼等多十個八個鐘, 佢見我咁痛苦個樣, 就建議我做無痛分娩或者開刀, 我就話考慮吓先, 但冇幾耐我就開始後悔啦!!

之後佳佳到咗, 佢買咗碗通粉比我, 但我食唔到第五啖已經痛到食唔落, 之後我就叫姑娘比笑氣我聞, 但一D止痛作用都冇, 只係好頭暈加作嘔!! 忍咗一陣, 我再問姑娘可唔可以打止痛針, 佢話要開到3度先有效, 但我一度都未開... 好慘! 我每痛一次, 個心就會唱住"以馬內利, 神與你同在, 以馬內利, 神與你同在, 在每一天, 上帝以千般恩惠寬恕賜下憐憫..." 開始時都有D用, 但冇耐就開始痛到失控, 我開始諗: 無痛好定開刀好呢? 雖然我一直都好希望自己生(順產), 但做無痛都係要等我自己開夠度數先得, 我一度都未開, 咁咪有排等!? 但要我開刀好似有D唔甘心, 都痛咗咁耐咯! 人生交义點咗一輪後, 最後就決定開刀, 因為真係頂唔順啦! 佳佳不斷打比馮醫生但一直都好唔順利(一係睇緊症, 一係電話收唔到!), 後來佢就叫姑娘急call醫生返來同我開刀. 我一聽到佳佳簽咗紙後, 我就開始發咗狂咁叫, 又捉實佳佳隻手唔放! 冇幾耐(大概12pm)馮醫生就到咗, 佢一見到我個痛苦樣就潤咗我一句: 都話會愈來愈痛架啦, 一點同你開刀啦! 我當時暈陀陀, 只係應咗佢一句: 快D!

被推落手術室時, 我一痛就大嗌, D姑娘見到我咁就叫我唔好叫, 怕我入風落肚, 咁開完刀就好易嘔! 開頭都有聽佢地講用鼻呼吸, 但個鼻塞得太緊要, 又痛到C, 所以冇幾耐都係大嗌~~ 我諗D姑娘都頂我唔順~~

好啦, 終於入得手術室啦! 果陣時痛到失晒控, 我曲埋個身, 差不多半個人出咗手術床, D醫護人員勁驚我跌落地...

ooohhh, 終於打麻醉針啦! 好快個人就鬆晒, 大概20分鐘BB就出世啦~~

BB出世7磅6, 51cm長, 男仔

BB一出世姑鋃就抱BB去我身旁, 我喺佢面珠錫咗一啖, 果種暖粒粒o既感覺我呢世都唔會忘記...

感謝天父讓我生BBo既過程順利, 又畀我經歷到陣痛讓我感受到做媽媽o既偉大(雖然最後都係開刀), 又感受到身邊所有弟兄姊妹o既關心, 我感覺到好多愛包圍住我一家! 哈利路亞~! 

作動!?

尋日返咗屯門醫院做產前檢查, 一上磅見輕咗1kg我都不以為意, 但醫生就即時寫紙叫我入院check BB心跳… 果陣都未識驚, 因為我一直都feel到胎動, 仲好活躍果隻~~

 

上到產前房, 姑娘好友善, 但係個環境都幾差, 一間房有6個床位, 但床與床之間只有僅僅一個身位, 而6位孕婦中連埋我都只得兩個香港人, 其餘係中國同胞或者南亞裔人士…

 

姑娘搞掂晒之後, 我就乖乖咁瞓喺床度check BB 心跳, 大概一個鐘後, 姑娘入嚟睇, 佢話check到我每半小時有一次陣痛, 佢問我feel唔feel到, 我就話我成日都咁痛法架啦… 又問我有冇見紅穿水… 又冇wor… 之後再觀察多半個鐘, 又check到我有好規律o既陣痛, 姑娘叫我通知老公, 我話唔駛, 應該唔係(其實係因為自己好唔想喺呢度生)… 咁姑娘唯有叫我再check多半個鐘, 點知又check到有… 我問娘講咁點算? 當時大概7點幾, 佢就提議我去canteen食咗嘢先, 佢就去問醫生意見, 到我食完件蛋牛治返上病房醫生就話未穿水見紅都唔急o既, 就打發咗我返屋企~~~

 

哈哈~! 無啦啦虛驚一場, 不過當採排都ok既~~ 好彩冇叫老公飛的去醫院搵我啫~~~

倒數階段 - 36 WEEKS wk 23/Nov/07

過多幾日我就有左9個月啦, 呢幾日個肚都有少少唔舒服, 成日都硬晒, 對腳又痺, 唔知BB幾時出世呢?

 

同事Wendy 22/Nov 已經開始放產假啦, 諗返d時間真係過得好快, 唔經唔覺就來要生啦, 唔知邊個生先呢? 我會唔會未放假就作動呢? 不過我個肚都好似唔係好夠低, 唔知咁樣係咪代表未生得住呢? 我又可唔可以順產呢? 個心雖然好多o野諗, 但其實都唔係太過緊張, 希望到要生果日我同佳佳都可以順利應付到啦! 同埋希望我同bb都健康, 好快可以出院, 我個傷口又快d唔痛, bb又乖d易湊d, 我又夠奶比bb食, 又唔會比奶奶激… 咁就好啦!!!!

 

尋晚同bee, meme, zenobi, lulu 食飯 (元氣), 傾左好耐, wa, 其實都唔係畢業左好多年, 但個個都有好大改變咁, 好似我同lulu都結左婚買左樓啦, meme已經master畢業啦, bee已轉左行啦, 而我仲就來做媽媽… 我好似行快人地好多步咁, 都唔知好唔好, 不過都好清楚呢d係神好大o既祝福, 不過一切都唔係自己計劃之內個人好迷茫咁….有時會諗, 到底我夠唔夠資格接受咁大咁快o既改變?? 我好怕教唔好養唔好bb, 咁就累左佢啦~~!!

 

諗返改名, 暫時都只諗到安晢, 翱晢, 英文名只有Adrian…

 

24/Nov後記: Wendy今日已經生咗! 明明12月10日預產期架! 咁快就生咗o既? 我會唔會都就快生得架??? 好緊張呀!!!

33 WEEKS

已經踏入33wk 啦! 心情其實應該緊張, 但盡量唔去諗…

 

有時我擔心o既係BB大個時聽唔聽話, 健唔康健康, 多過生果時o既情況…

有一日o既崇拜, 唱到一句歌詞 “帶走我心中的愁煩, 駒走我心中的不安”, 開頭望住d歌詞, 我仲諗若果幾年前唱到呢兩句一定喊, 而家唔會lor… 但到真係唱到時, 我真係唔知點解會喊!? 或者係神觸動, 又或者我心裡面真係不安(生BB, 錢, 教養BB…) 其實真係有D怕, 怕教唔好佢, 照顧得佢唔好… 不過就係要交比神lor, 我為BB祈禱o既時間真係比較少…!

 

諗返改名, 我地最近諗到叫”安晢”,英文名Adrian… 有一日我撘小巴係度諗, 我最想BB點呢!? 我就諗我想佢快樂, 咁最大o既快樂就係有神所賜o既平安係心, 咁之前又諗到用個”晢”字, 咁就諗到叫”安晢”, 咁我屋企就集齊左”安安”同”佳佳”兩隻國寶lor~~~ 兩個都係我o既寶~~~~!! ^__^

30 WEEKS

我呢幾日個肚都有d痛, 唔知咁係咪假宮縮? 但係我30week 咋wow~~~

 

呢幾日有好多嘢想預備, eg買bb&入院嘢啦, 想執衣櫃啦, 想洗衫啦, 但得個諗字, 都唔知做邊樣先!!?? 好似想洗衫但洗完放o係邊呢? 未買膠箱wow! 想執衣櫃但執唔掂點算呢? 點收科呢? 正值轉季wor, 好多衫都唔收得埋住… 好煩呀!

轉季的感覺

尋日開始feel到轉季o既感覺,已經唔駛開冷氣瞓, 仲有d凍~~~  呢D感覺令我覺得好舒服, 好似一個新開始… 係呀, 仲有不多o既日子我同佳佳就會進入人生另一階段, 我地就快做爸爸媽媽啦~! 興奮之餘又有D擔心, 唔知應唔應付到呢? 求天父保守!

 

諗返同BB改名, 星期六果日佳佳突然講話用個”柏”字, 柏翱, 唔知好唔好呢?

29 WEEKS

BB, 你已經o係我個肚29週啦, 仲有兩個月到就會同你見面, 一諗到呢度, 媽媽有時會好傻咁諗, 真係唔捨得你離開我個肚o既感覺… 雖然你會令我腰骨痛, 又肥, 皮膚變差, 有時你又有會踢到我痛肚… 但你知嗎, 你為我帶來好多祝福同喜樂… 陀住你o既時間, 係我人生之中最快樂, 最輕鬆o既… 有你爸爸o係身邊, 我真係感覺到生活得無憂無慮, 好舒服… 你大個都要學似你爸爸咁愛護我呀! 當然媽媽都會好鍚你~~~

 

時間唔係淨返好多咋, 媽媽要開始為你出世作一d準備… 好似買入院用品啦, 同你洗定d衫同被啦, 買個衣櫃俾你啦! 買d衫仔, 褲仔, 沖涼jel, 花士令, cream, 盆… 好多嘢未準備好呀~! 不過媽媽一d都唔緊張, 你都唔洗緊張呀~! 爸爸媽媽會o係你出世前預備好o架啦~~

 

不過有一件事就令我同爸爸好煩惱, 就係改名啦! BB, 媽媽都有求天父給你一個有意思o既名, 但我地一直都未有idea… 希望快d諗到啦~~~

照4D - 28 WEEKS

今日去咗照4D, 不過BB就唔係幾合作, 一係用背脊”得”住我, 一係就成塊面痴喺我胎盆… 咩都睇唔到… 我做晒高難度動作(eg: 拮高兼打側身) 都照唔到, 咁姑娘叫我出去坐陣再試過… 隔咗幾個字再試又係唔得… 到第三次, 終於照到喇(雖然仲有少少痴住我胎盤)…

 

從鏡頭可以好清楚咁見到BB個樣, 佢好多動作~~ 好似伸懶腰啦, 打呵欠啦… 佳佳睇得好興奮, 我就唔知點解冇乜大感覺, 或者我太攰, 又或者我覺得有D肉酸… 不過其實BB都好得意, 原來28week已經咁大隻…

姊妹組 + 腳腫日

尋日一早返崇拜, 之後就直踩到5點幾去Lulu屋企開姊妹組, 佳佳就去左亞生屋企開弟兄組… 成班姊妹一齊傾計好似好耐都冇似過lu~~~ (尋晚有我, Lulu, 秀儀, Simmy, 凱兒, 雪兒, Ivy, Irene, 賽賢, 娜娜, 允慈, 愛芳, 螺絲粉…希望冇數漏啦~~)

 

一上到去, 大家就齊整嘢食, 有咖哩雞, 餃子同苻竹白果糖水… 都幾好味, 不過Lulu 間屋真係有d熱, 開唔開冷氣都係, 有段時間我熱到有d唔清醒, 不過隔左一陣就ok~~~

 

傾計時間我地都傾左好多話提, 好似螺絲粉結婚啦, 我生BB啦, 仲有愛玲同允慈o既關係… 最精彩係允慈果part, 不過呢度就唔方便透露喇~!

 

小記: 係離開Lulu屋企時, 我一穿隻涼鞋就感到同平時唔同, 迫咗… OH NO! 我腳腫呀!!! 係第一次… 會唔會腫到生架!!?? 我唔濟呀!!!

法國醫院撲位記

星期六果日, 我地去咗馮澍明度覆診, BB已經掉頭, 20cm左右, 預產期早左4日, 而家係12月19日, 唔知會唔會撞正12月18日結婚紀念日呢? 果日我順口問醫生, 如果我未交法國deposit 緊唔緊要!? 佢即刻好緊張咁話: “你仲未交呀! 收到memo full 左啦! 你星期一打去check啦! 不過如果full左咪去港安lor, 貴少少啫…” 我由果一刻開始心情就好down… 夜晚去屯門同我D屋企人食飯, 大姐話如果去唔到法國就唔好諗其他醫院, 因估計都要貴成一萭蚊, 我聽到心情更down, 無啦啦要駛多一萭, 好擔心, 又唔想去屯門醫院生, 因為d comment 勁差… 到星期日, 佳佳突然醒起Andy 個老婆係喺瑪加烈做產科護士長, 果晚就打比佢問下轉院o既事, 佢話幫到我, 但床位就control唔到(都明o既, 唔通特登留定張床比你唔比其他人訓咩!), 聽完之後個心都定d…

 

到星期一(10/Sep), 我同佳佳一早起身出發去法國, 撘左差唔一個鐘車, 去到門口先拎張嘢出o來睇, 原來交deposit 要6pm-9pm, 咁都去到lor, 就走去問下, 上到三樓產科, 個姑娘開頭都話唔收, 佢問完個老姑娘, 咁個老姑娘就叫我地mark 低資料同叫我地6點返去先再同我地簽張確認書… 之後我同佳佳就撘的士返公司, 佳佳居然冇遲到), 我就9點50分返到公司, 返到去勁多嘢做!!! 之後我就4點半走(哈哈, 遲到早退~),去LCK同佳佳會合一齊再去法國… 去到都等左一輪先簽到張確認書, 交埋三千蚊按金… 好似放下心頭大石咁, 但另一方面又覺得好快就要駛成幾萭蚊而肉赤… 人真係矛盾又麻煩~~~!!! 不過, 其實我為咗呢件事都一直祈禱, 我同神講, 無論book唔book到法國我都相信係神為我安排最好, 神會為我同bb同佳佳預備~! 無論係屯門, 瑪加烈, 法國, 仁安或者港安, 我都相信係係神為我預備, 而且係最好~!!!

 

之後, 我同佳佳就出左旺角, 去到買左一大堆街頭小食(雞蛋仔, 燒賣, 黑椒牛丸, 尤魚, 魚旦…) 同佳佳喺巴士一齊食, 好開心~~~ 之後我地就到屯門聽講座, 講有關同BB沖涼同餵人奶, 一D都唔悶, 佳佳都聽得好投入, 返到屋企佢仲話第時佢要日日同BB沖涼~~~ 係就好呀~~~!!!!

 

今晚差不多10點收到馮醫生電話, 佢好緊張咁問我法國book唔book到, 因為剛收到仁安memo都full埋… 我就話佢知我已book到法國~~~ 所以神真係好憐憫我呢個懵人~~~ 感謝主~!!!

內科覆診

尋日下午去左覆診(內科), 都冇乜大問題, 甲狀腺指數正常, 唔駛加葯, 只係血色素偏低, 但都屬於正常範圍, 尤其孕婦好多時都會咁… 感謝主~!

 

睇完醫生之後, 都差唔多四點半, 我就撘輕鐵(籮咁大個肚都一直冇人讓位!), 到銀座時, 見有時間, 就去左東海堂買個炸火腿芝士多士食, 但勁難食, 好油, 我食左一半到就掉左! 之後我就去左百佳買面包做早餐比佳佳, 入到去, 法包冇得賣, 我就買左英式鬆餅 (今日食過好好味)! 又買左罐粟米吞拿魚醬同蕃茄… 後來諗起佳佳成日都想食啫喱, 我就諗, 要整就整好d, 我就買左罐雜果(十幾蚊一小罐)同花奶, 其實我覺得好貴, 但我個心不斷諗, 為左氹佳佳開心, 值得o既~~~ 之後我又買左三文治袋, $13.9 一碌, 買二送一, 我掙扎左一輪(廿幾蚊買三文治袋好似有d貴, 但最後都買左三碌, 因遲d BB出世都有用! 最後我駛左六十幾蚊! (死火! 仲乜得咁C9!!!)

 

買完差唔多5點25分, 我就急急腳去趕專巴, 但遠遠已經見架車到左, 我就揮手叫停佢, 我行左好遠路, 又行得慢, 要個司機等左好耐, 本來都怕佢唔等, 好彩佢肯等, 如果唔係要我拎住咁多嘢行或者等多四個字就慘啦~~~

 

尋晚我同佳佳喺媽媽屋企食完飯返到屋企, 我地就食啫喱, 我同佳佳都食得好開心!

 

今朝整早餐, 本來諗住整吞拿魚夾鬆餅, 但好似唔係好襯, 最後整左煙豬脾+蕃茄+芝士, 佳佳果份仲double煙豬脾, 今朝焗熱左勁好味, 佳佳都話好味呀~~~

拍拖五週年紀念日

話咁快就過左五週年紀念(9月3日), 尋晚我同老公去左Fat Angelo’s 食飯, 叫左海鮮燴飯, 芝士焗西花同萍果撻, 好好味, 尤其開頭個包同沙律! 開頭我食得好急, 好似食便飯咁, 一D慶祝o既感覺都冇(可能有d餓同太好味啦), 慢慢醒覺之後, 我就開始放慢, 同老公回顧呢五年…

 

喺五年時間裡面, 我地已經經歷左拍拖, 買樓, 結婚, 生BB… 真係好快! 老公話, 初時都冇諗過咁早結婚, 仲[諗住買完樓兩年後先結, 因為怕唔夠錢! 不過師母同佢傾完之後, 佢就決定要結婚… 雖然我地個婚禮唔算好豪, 但因為係教會”同年齡界別”中第一pair, 大家都因為有新鮮感而好興奮, 而且我地個宴會場地又可以讓所有人都看到, 加上朋友多, 親戚少, 氣氛好好, 個個都好投入…

 

之後我地再諗返拍拖到而家, 其實對我o來講冇乜大轉變, 感覺唔到邊度係分水領… 老公話, 係咪而家仲有拍拖o既感覺? 其實, 我反而覺得一直都冇拍拖感覺(冇乜浪漫經歷 @_@), 好似一齊就係好自然o既事咁… 不過, 自從知道我有左之後, 我同老公o既關係好左好多, 冇交嗌, 大家都冇發大家脾氣, 冇嬲o既時候, 好和平, 冇容忍o既需要, 成日只係想點令對方開心… 其實呢段時間, 係我同佢一齊最開心o既, 唔知BB出世之後, 可唔可以維持呢?

 

尋日又諗到改名o既事, 諗左幾個, 迦藍, 翱迦, 翱臨… 我自己就唔鍾意迦藍, 一來” 迦乜”好似好leung, 二來我唔鍾意個”藍”字呢個音… 唔知最後會唔會改其中一個呢?

24 WEEKS

又一個星期o既開始啦! 今日除左係bb o係我個肚踏入第六個月之外, 仲係我同佳佳一齊五週年紀念, 今晚我地打算去 Fat Angelo’s食返餐慶祝~~~ (話咁快就五年lu, 今朝佳佳同我講五年我地就有自己o既樓, bb又就來出世… 好幸福~~~~)

 

星期六(01/Sep), 我同佳佳去左旺角上樓舖賣左好多BB 嘢, BB床啦, BB車, 揹帶, 奶pump連杯, 被, 雨簷… 駛左$6xxx~! D貨即晚已送到, 我同佳佳見到D BB 嘢都好心急想BB快D出世, 想快D睇見佢用~~~ 尋晚我同佳佳都忍唔住開左張BB床, 佳好細心同張床消毒, 我就太攰啦, 只係坐埋一邊睇住佢整~~~~ 之後佢將部分之前買落o既BB衫, 被等放o係床上, wooo! 已經滿左lu~~! 我諗我要快d執個衣櫃, 等BB第時可以同爸爸share 衣櫃用~~~~

 

同一晚我d屋企人o來左我屋企玩wii (大姐借回來的), 佢地玩得好開心, 我都睇得好開心! 果晚悠悠仲表演自己企, 佢企得好穩, 完全唔駛人扶, 叫佢clap又識clap, 好得意… 唔經唔覺, 悠悠已經十一個月大啦 (今日9月3日)! 下個月10月3日, 佢就一歲啦! 時間過得真係快… 明年今日, 你就有個表弟仔同你玩, 你會錫表弟嗎~!?

媽媽病了

連埋上個星期日到星期三, 我呢兩個星期都病左一半咁濟, 成日發燒, 星期二(28/Sep)又請左sick leave 係屋企休息, 訓到個人好熱好熱, 到兩點幾再食多粒退燒葯後, 個人就不斷流汗, 結果我訓係床上, 一路訓, 一路涼冷氣, 一路吹風扇, 一路抺抺唔停o既汗水… 流汗流咗差唔多幾個鐘後, 個人終於開始降溫, 又精神返d, 就走去沖涼, 但沖完d汗都係咁流, 我就繼續涼冷氣, 吹風扇, 抺汗同食粥… 隔左一陣我就訓左, 醒左已經係夜晚, 個人舒服左好多, 我知道我已經退燒… 冇幾耐媽媽就送飯&粥到我屋企, 到佳佳返到來, 我已經好似冇事, 不過個人仲係好攰…

 

直到今日, 我都周不時(夜晚)訓到成身濕晒, 雖然有d唔衛生, 但起碼個人唔會好似之前咁, 成日困住d熱唔散咁, 其實咁仲舒服… 我而家返到公司, 我會一直開住部風扇吹住自己, 唔比自己再焗親, BB要吸收咁多葯都對佢唔係幾好~! 呢兩個星期我覺得BB大得冇之前咁快, 唔知係咪我錯覺呢??!! BB呀BB, 你要健康咁係我個肚成長呀! 我知媽媽我成日食好少嘢(尤其有益o既嘢), 又成日病要食葯, 但BB你都要爭氣呀! 你要強壯D做個叻仔呀!!!

21 WEEKS

BB係我個肚已經21week啦, 08/Aug果日照埋結構性都一切正常, 感謝主! 我果日見到BB個心都好感動, 尤其見到佢係咁郁, 玩手仔腳仔好得意, 如果果日老公都係身邊就好啦!

 

諗返呢個懷孕過程真係好感恩, 由三月醫生證實我難受孕, 到五月頭就收到喜訊… 人人懷孕頭三個月都會嘔同唔舒服, 我一次都未嘔過, 只有作悶同暈過一次… 之前個醫生話明明我d egg 質素唔好, 就算受孕都唔會健康, 但so far 每次檢查BB都好健康, 8月6日照結構性超聲波仲話BB係中上size tim~!!! 呢幾個月我同佳佳的關係好好, 佳佳對我真係好體貼, 我亦會盡量做到我可以做的令佢開心(eg: 做早餐)… BB未出世已經收到好多禮物(eg: steamer, 奶奶d衫仔, 床仔, 大伯的BB車…) …困擾左我十多年的腰骨痛, 竟在我拕BB第十多週開始已不再痛, 唔知係咪BB移返正我個盆骨呢??

BB係仔呀~!

心情忐忑咗好多日, 今日去咗照性別… 原來BB係男仔嚟架~!

 

其實當醫生照第一下我已經見到個咕咕… 開頭都有少少失望(係人都知我恨女~~), 但慢慢又接受咗, 加上陪我一齊照o既爸爸, 婆婆, 大姐, 二姐同yoyo知道係仔時都好興奮咁, 我就畀佢哋感染咗喇~!

 

其實只要係自己o既BB, 仔/女又有咩所謂呢~!? 

14 WEEKS

早幾日諗o左個名: 牽澄, 意思係想神牽住BB走聖潔o既路, 但老公話個”牽”字好似拖泥帶水咁, 所以建議叫”軒澄”, 睇落都幾好, 但好似冇o左我原先個意思, 等我再諗下先~! 

 

尋日我發覺我o既情緒有d差, 佳佳o係我身邊時我好心平氣和好平靜, 但當得我一個人時就好似失控咁… 好似尋日撘巴士回家時(269C), 架巴士好”鄧”, 我就好炆!!! 之後我就祈禱, 咁就好d, 希望唔好愈來愈嚴重…

 

今日好眼訓, 其實呢幾日都成日訓, 尋日食完lunch 返教會就訓咗… 師母話有咗特別而攰wor… 的確係呀~!

屯門醫院-超聲波檢查13/Jun/07 (三)

今日下午我請咗假去屯門醫院照超聲波, 原來BB已經有7cm大, 我見佢好活躍, 隻左手成日都舉高, 又彈來彈去, 好得意~~!

 

姑娘照得好細心, 我初初只見到佢一隻腳, 本來好擔心, 但又唔敢問, 以為咁早未必睇到, 後來個姑娘好仔細咁照, 然後話我知: “ 嗱, 呢對咪手lor… 呢度兩隻腳…”, 即刻放心晒~!

 

BB, 我好想同你改一個又好聽, 又有意思o既名, 但一真都未有idea… 天父, 求你賜BB一個好名~~~~

母嬰健康院檢查 6-Jun-2007

今朝早到母嬰健康院檢查, 大至上冇太大問題, 但我要轉介到屯門醫院睇專科(內科&產科), 我諗係跟緊d啫~! 不過咁檢查法, 我今個6月都要請好多日sick leave lu~!

 

呢排心情好差, 可能荷爾蒙作怪~! 希望我可以快d刻服佢, 唔好影響到身邊o既人, 仲有BB呢~~