蝸牛 >.<

今晚如常去婆婆度接晢晢返屋企, 回家路上見到好多蝸牛, 結果有以下對話:

晢晢: (指住) 蝸牛呀~

媽媽: 係呀, 蝸牛呀, 要唔要呀?

晢晢: 唔愛呀!

媽媽: 點解呀?

晢晢: (拍拍心口) 好驚呀! bye bye

勉強叫拍到段片, 雖然好暗, 但睇得唔清楚都有d聲聽下丫~~~

晢晢好可愛呀~!

心中富有

有一位"朋友", 每次見面時都我都好想拎個心出嚟同佢傾下計, 講下揍仔又好, 講下近況又好... 但每次佢都係滔滔不絕的 晒命. 晒命. 晒命! 令人好唔舒服...

剛過去weekend有機會一齊食lunch, 本想閒話家常... 嘢食好唔好味? 佢個寶貝仔乖唔乖? ... 點知"朋友"又唔知咩事插到位分享佢準備放盤層樓升值百萬, 又講我知佢同事會畀套World Family佢但 "我唔要之嘛"... 真係唔知佢想我答佢咩呢!?

我反應由以前唔想得罪人只講"係係係", 到而家... 拎咩面扮聽唔到, 一句都唔應... 唔係要畀面色人睇, 而係我想尊重返我自己o既感受! 唔想答! 就唔答! 可必迫自己講反話!?

富有與否, 係唔係需要用把口話畀人知? 況且, 你有能力花好多錢都好, 都要用駛得有價值先係花得其所! 

我會好羨慕人哋可以一家大細去旅行! 聽見人哋分享旅程愉快經歷時, 我會真心替佢哋高興~! 恨到流晒口水~! 羨慕---唔係因為人哋有錢去旅行, 而係真係感受到別人快樂! 呢個就係個"價值"!

但如果好似"朋友"咁, 只會不斷數我知佢食咗幾多餐貴嘢, 每碟幾錢... 買咗幾多個名牌手袋, 每個幾錢 ... 滔滔不絶有佢講冇人講... 目的只為獲得一刻虛榮... SORRY! 我只會覺得你膚淺! 亦都唔覺得你有幾富有!

其實富有唔富有只在於你放個價值喺邊, 在我, 好簡單...

可以每日向神祈禱

可以同晢晢玩一個晚上

可以一家人食餐飯

可以每朝收到一個MORNING KISS

可以一家人去輕鬆下

可以聽到晢晢叫我一聲: 媽媽

可以親手織一件衫仔

可以造一些小手功

可以喺生日一家人一齊吹蠟燭

可以睇住晢晢喺愛裡面成長

總之...

一家人開開心心

我已經覺得好富有...

晢晢最愛歌曲

晢晢唔知係唔係遺傳咗爸爸媽媽o既音樂細胞, 佢係一個好好唱口o既BB, 基本上一有音樂就會哼起上嚟, 聽多幾次仲會成首一字不漏咁唱出嚟~! 就算冇音樂, 都會得閒無事唱返一兩句, 媽媽同佢做個紀錄先~~~

 

最愛歌曲: 當然係 “THE ABC SONG”

見到落雨時/拎起雨傘時: RAIN RAIN GO AWAY

坐住水泡游水/沖涼時: ROW ROW ROW YOUR BOAT

我叫佢sit down 時: 排排坐 (會雙手拍拍大肶 )

叫完佢touch your head/shoulder/toes…時: HEAD & SHOULDER KNEES & TOES (會做埋動作, 不過通常做唔切~! )

開始天黑/無聊時: TWINKLE TWINKLE LITTLE STAR (會跟埋 “一閃一閃” 手勢唱架~! )

臨瞓時: 時間又到差唔多, 叮叮叮叮叮(即瞓覺歌)

玩緊dog dog 玩具時: BINGO

玩緊發聲恐龍公仔時: I LOVE YOU, YOU LOVE ME

睇緊NODDY時: ONE TWO THREE FOUR FIVE, CHUF CHUF CHUF WOO WOO

都係睇緊NODDY時: I LIKE DRIVING IN MY CAR, YES YES YES WE CAN...

 

其餘仲有: HAPPY BIRTHDAY TO YOU, BAA BAA BLACK SHEEP, THE WHEELS ON THE BUS, LOOK UP THE SUN IS SHINING, OH MC DONALD 的 “EIEIO”, I LIKE TO TAKE A BATH 的 “QUACK QUACK”...

 

唔知有冇記漏呢? 哈哈~!

車厘子核

媽媽照顧晢晢一向都小心為上, 啱啱o既星期日, 約咗嫲嫲一齊食lunch, 嫲嫲就買咗晢晢最鍾意食o既車厘子畀晢晢, 我本來準備同晢晢去核時, 爸爸竟然二話不說原粒畀晢晢食! 爸爸話佢信晢晢識吐核wor...

晢晢一路食我就一路提心吊胆! 好驚佢啃親! 我就係咁叫晢晢: "lur啦, lur出嚟啦", 晢晢就係咁邊拎頭邊"妹"粒車厘子! 我怕晢晢以為我搶佢而格硬吞, 我就冇講嘢! 眼都唔斬睇到實! 隔咗一陣, 晢晢果然lur咗粒"妹"得乾乾淨淨o既核出嚟~! 爸爸即話: "都話晢晢識架啦!" 之後再試多5-6粒晢晢都係順利咁吐核! 厲害! 媽媽低估咗你tim~!

晢晢, 你又喺度話畀媽媽聽你大個仔喇~! 雖然每次你做到某些事時媽媽都會好欣喜, 但又會好傻咁諗~~ 唔捨得你大得咁快~! 晢晢, 無論你幾多歲, 你永遠都係媽媽心中o既寶貝晢晢B~! 

 

書展 2009

讀書果陣從來冇諗過行書展, 一來怕迫, 二來跟本對睇書冇太大興趣~!

直到晢晢出世, 媽媽除咗愛上睇有關教育o既書外, 今年, 仲好想好想好想去人生第一次o既書展, 因為好想掃平價書畀晢晢~!

今朝返工o既車程中已經諗: "不如搵日請假去啦!", 點知收音機就啱啱講起今日係 LAST DAY! 仲係收5點!  嗱嗱聲打畀今日會喺灣仔見客o既爸爸, 問佢可唔可抽少少時間陪我行, 佢除咗不停咁拒絶我之外, 仲話我知佢本來有免費VIP飛, 不過諗住唔會去所以冇要到! 我問佢: "點解唔要?"  佢答我: "冇諗過你想去!" 我即話: "你實在太唔了解你老婆喇!"

返到公司, 成朝都坐立不安, 好驚自己唔去會好後悔! 不停打畀爸爸希望有一絲希望... 不過最後都係say NO!

正在人生交叉點 "一個人去 VS 唔去" 之制, 有兩位0712媽媽竟然話可以一齊去wor! 我就嗱嗱聲遞紙請半日假出發去了~~ 心情可謂極度興奮!

今日都唔算好多人, 不過因為5點就關門, 所以只能主力行3樓"兒童天地", 見識唔到"o靚模"魔力~!

開始時, 本想買一D識知o既書, 點知發現原來好多差不多o既書晢晢已經有, 揀完一輪, 就買咗呢幾本~!

其實有部份內容我覺得對19個月o既晢晢嚟講有少許深, 但我又覺得冇理由停留喺已經識o既知識上, 所以買咗~!

梅花係 plum blossom ... 我都係啱啱先知~!

 

另外為咗每晚講故事呢項親子活動, 我又買咗5本 <3分鐘床邊故事>...

大部份都係耳熟能詳o既故事, 好似<三隻小豬>, <拇指姑姑>, <小木偶>, <醜小鴨>等等... 5本書有25個故事~! 抵!!

媽媽要開始煲書, 等講果陣講得流暢D先得~!

 

買咗中文就到英文喇~! 我揀咗4本 'STEP INTO READING STEP 1 (ready to read)" 加1本 "LEVEL 1 (Kindergarten-Grade 1)"...

構圖簡單清楚, 內容顯淺易明~! 相信已能認讀一定數量生字o既晢晢好快就可以 read independently~!

是日仲買咗晢晢最愛o既 ABC磁貼, 配合早前喺IKEA買o既磁石黑板, 遲少少就可以玩拼字喇~!

以下唔係今日o既收獲, 但都同書展有關, 因為我係趁書展期間出版社有特價於網上訂購~! 都畀佢哋出下鏡先~!

<童韻認知小書>, 一套6本精美硬皮書 + 1隻CD先百鬆D蚊, 點可以唔買?

<漢語拼音小王國>, 我打算晢晢正式返學先開畀佢睇, 咁早買, 只因為貪平~!

嚟張大合照先~!

嘩! 咁多o既... 駛咗幾多錢我都唔敢計喇...

今日美中不足係買唔到我Target <幼兒生活圖解字典>套裝! 事原我哋一直都搞錯咗佢會喺1樓大眾擺賣, 去到先知原來喺3樓, 返轉頭時個sales哥哥話我知 "喺15分鐘前剛剛賣晒"... 天啊! $450 減到 $310!!! 買唔到真係 "dum"心!!! 我只好拎張leaflet留念...

今日實在太攰... 好手震... 失禮晒...

今日仲有另一Target "Oxford Reading Tree stage 1+", 不過最後都冇買到, 因為一來同'STEP INTO READING"近似, 二來我記得某拍賣網更平, 買唔到都唔可惜, 所以~~ 慳返!

今日行咗好多路, 超攰! 但為咗晢晢值得o既~! 希望晢晢鍾意啦~!  

 

趣事一則 - 晢晢港男

剛過去o既星期日, 我哋播放錄影咗o既香港先生選舉~! 其中有個泳裝環節, 晢晢睇到眼定定!

當人哋濕完水除衫果一刻! 晢晢竟然跟人哋除衫!  嗱起件衫拮起個肚兼定格show 佢個完美o既body畀我哋睇~! 笑到我同爸爸肚痛!

之後每次叫晢晢"除衫", 佢都係招牌式嗱起件衫然後定格, 笑C我~! 哈哈~!

 

晢晢: [媽媽, 我係咪好有潛質選港男呢~!?] 媽媽: [仔~ 媽媽心血少, 唔嚇得架!]

武林英雄大會 2009

剛過去o既星期六, 我哋一家3 口去咗一個武林大會 ~~ 其實呢個係一個一年一度o既武術比賽盛會, 因為爸爸o既朋友有兩位徒弟仔出賽, 爸爸就帶埋我同晢晢一齊去捧場~!

一入到會場~! 嘩! 真係各路英雄雲集! 南拳, 北腿, 太極, 刀, 劍, 棍… 男, 女, 老, 幼… 真係咩都有!

晢晢唔執輸, 拉下筋先!

 

晢晢: [師父! 我準備好, 可以出場喇!]

師父: [晢晢, 過多兩年先到你啦!]

 

今次派出果兩位徒弟仔都不負眾望, 表現強勁! 兩位都喺個人賽分別都獲得金牌! 一位更加係全場總冠軍! 另一位都唔弱, 獲得全場銅牌! 佢哋三師徒得戚到飛起~~~

 

睇下幾得戚到佢哋個樣~~ 不過佢哋真係耍得好好o既~! 

是日晢晢都學到一招半式! 見到人哋耍功夫又學人哋耍! 出拳時仲識 “喳”一聲~! 超搞笑~~~

晢晢: ["喳"! 問你怕未!?]

 

睇下晢晢除咗衫, 露出鋼條般o既身段~! 型仔到呢~!

 

是日仲有兩件小插曲...

比賽中段時有醒獅表演, 我開頭仲擔心晢晢會驚, 所以推佢遠處迴避, 點知一起D “冬冬查查”晢晢就好興奮彈起身un身un勢, 仲指住舞獅方向話要 “去果度”, 我問咗幾次佢都話要去我就抱咗佢去睇, 晢晢一見到d舞獅就好興奮咁指住叫 “dog dog 呀~!”, 我即時笑C咗! 我話佢知: “唔係 dog dog, 係lion dance”, 晢晢又跟我講 “lion dance”, 不過睇得興起又話果隻係dog dog, 激死!

 

另一件係晢晢o既傻瓜事~! 在場有一對twin BB勁得意, 一向鍾意BB既晢晢見到佢哋非常肉緊, 好想攬實人哋但又唔敢(可能怕整親BB啦), 結果佢就雙手喺保持1cm距離下作勢攬實BB, 然後拱個頭埋去係咁叫: baby 噢baby 噢(d聲氣勁似小新), 超可愛~!

 

晢晢變身小新: [baby噢baby, 畀我攬下你得唔得啫~!]

 

晢晢: [媽媽, 下次拎金牌會唔會係我呢?]

媽媽: [仔~ 今晚早D瞓咪到你lor~!]