夜闖迪士尼(3歲9個月 / 11個月1星期) – 17.09.11

這天是星期六, 揍完陶陶返PG, 又待晢晢午睡飽後就和晢晢出發到迪士尼咯~~ (Sorry, 又賣甩了陶陶…)

 

出發的時間約是下午4時, 本打算和爸爸先會合, 可是爸爸有事忙著, 媽媽唯有單拖帶著晢晢, 或許很久沒和晢晢單獨相處, 晢晢顯得特別開心~!

入場不久便遇上Anna! 兩小口拖著說個不停, 有伴一齊玩, 開心了~!

天都黑齊, 爸爸終於來到, 玩過巴施光年就吃個晚餐再玩過~!

 

這天最最最大的突破可說是這個了… 『晢晢人生第一次玩SPACE MOUNTAIN啊!!! 』晢晢剛巧夠高玩, 便嚷著要試! 爸爸媽媽已事先聲明 『真係好快, 超快架, 快到會飛上太空黑呅呅架… 你驚唔驚!?』晢晢一句『唔驚』爸爸便帶晢晢去感受何謂『超快』! 過程中媽媽可緊張得手心冒汗呢! (媽媽本身唔驚, 只擔心嚇壞晢晢)

 

結果晢晢全程嚇到縮埋一舊, 不停口說著『爸爸, 好驚呀! 爸爸, 好驚呀!...』, 到完結時爸爸問晢晢想不想玩多次!? 晢晢即耍手拎頭! 還很擔心地問:『我塊面有冇變咗綠色呀?』 哈哈!! (註)

嚇到呆咗...



臨離開時, 遇到一班『嘩鬼』, 晢晢和Anna立即要合照一番~! 估不到Anna都如此大胆!

這晚玩到11時才離開, 十分盡興啊!!!




待陶陶會行會走, 一定要再來多一次!!!

 

註: 家中有一本圖書<THE THUNDERBOLT>, 講述一家四口坐過山車, 最後書中的爸爸驚到塊面變咗綠色!! 估唔到晢晢真的信以為真, 以為玩過山車嚇親塊面真係會變綠色!!! 哈哈哈!!!  

陶陶1歲了 (1Y) – 10.10.11

 

10月10日… 我們家的寶貝女兒陶陶1歲了!

自從當了第二任母親, 時間好像過得特別快, 眨下眼, 陶陶都已經1歲了..

 

短短一年, 樣子變了許多呢~!(肥咗好多!) 0-12個月, 左至右, 上至下排列~!

 

這個女兒, 實在很討人疼愛!!! 很少哭鬧, 很愛笑, 只要少少的一個動作,
就能逗得她哈哈大笑! 而且她很愛扮鬼臉, 招牌表情是『豬咀』,
其次還有伸脷和米字眼(跟哥哥當年的那個招牌米字眼笑容很相似!!),
很得人歡心~!

 

媽媽總覺得, 陶陶是一隻聰明的豬(雖然生肖是老虎),
樣子雖然傻更更的, 但郤好像什麼都懂似的,
例如只跟她隨口說:『放你入網床好唔好?』,
還沒有任何行動, 但已經好像聽得懂般,
立即搖頭say no兼調頭走!
而且亦很會表達, 雖然只會說單字,
但郤懂得用body language 搭夠,
例如想離開某地方, 會向著那地方say bye bye (open & close hand),
然後指著門口『吖吖叫』示意離開…
又例如拿著餅盒, 會叫『mum mum』然後拍拍盒蓋,
再遞給大人示意要開盒拎餅食~!
或許就是能表達, 所以脾氣比較好…

和哥哥相處的這一年裡, 很感受到他們兩個都很愛對方~!
哥哥真的很生性,
雖未至於百分百遷就妹妹, 但很多時候都會為妹妹設想,
例如看到妹妹喊時, 總會嘗試讓出他心愛的玩具或扮鬼臉來逗妹妹開心,
又例如當妹妹搶走了他的玩具, 總會嘗試用交換的方法,
一件不成功便試另一件, 從不會從妹妹手上硬搶回來!
這點媽媽是很欣賞的!

 

這個哥哥, 也會為有這個妹妹而感到自豪, 他常常對別人說
『呢個我妹妹嚟架, 佢真係好肥架!』… 『我妹妹真係唔扭計過喎』… 『我妹妹好得意過喎』…
雖然全都是微不足道的事, 但在小朋友眼中就變得無限大, 媽媽都喜於哥哥如此『欣賞』妹妹…

 

而妹妹呢, 每朝醒來, 若哥哥還未起床, 便總愛爬到哥哥邊, 然後拍拍他的頭喚他起來,
一看到哥哥爭開眼便會跟著傻笑, 很可愛~!
當外出時, 若哥哥跑到遠遠, 陶陶便會在BB車上, 七情上面的指著哥哥大叫『呀呀~呀呀~』,
好像在提醒哥哥『唔好跑咁快呀』似的,
有時哥哥見狀會跑回頭走到陶陶身邊, 然後相視而笑, 情景十分溫馨~~~~

 

每當回想起這些點點滴滴, 媽媽便會會心微笑!
很感恩天父賜我們這個可愛的女兒, 令我們家變得熱鬧和歡樂,
看見一對兒女成長有個伴,
這種幸福是任何東西都不能取代的…

 

後記: 某天晢晢跟媽媽說:
『媽咪, 你生多個妹妹畀我吖, 不過要好似陶陶一樣過喎~!』
哈哈~! 證明晢晢多愛陶陶~!

陶陶, 謝謝您! WE LOVE YOU~!