晢晢有趣語錄 - 28個月

 

近來晢晢問嘢好鍾意喺前面加個『咁』字: 『咁… 爸爸呢? 咁… 糖糖呢? 咁… pillow呢?』(古靈精怪!) 有日出街食飯, 爸爸要同朋友行開買d嘢, 晢晢見爸爸咁耐都唔返就不停口問:『爸爸去咗邊呀!? 咁耐o既~!?』(成個小大人o既語氣!) 有日媽媽無聊同晢晢講:『晢晢, 你tummy有臭臭呀!』晢晢就話:『緊係冇啦, 痾晒啦!』(心水好清! 冇錯, 尋日先痾咗~!) 夜晚經過公園, 晢晢唔會扭要玩之餘, 仲會自己話:『個天黑蚊蚊啦! 小朋友唔玩架! 要僕僕藹瞓呀!』(扮晒乖~!) 見到d小朋友唔搞得o既東東(eg 刀, lift 門, 電器), 晢晢會一臉認真話:『小朋友唔搞得, 媽咪搞~!』(再一次扮乖!) 朝早爸爸賴床的話, 晢晢就會:『太陽怕怕出咗嚟啦! 快D起身啦!』 某日撘完輕鐵, 媽媽畀咗張八達通畀佢嘟出閘, 順口提醒佢拎穩唔好跌, 晢晢就爆咗句:『跌咗就慘咯… 跌咗就陰公咯…』(事後問返, 原來係從婆婆度學返嚟~!) 又一婆婆傑作, 晢晢時不時都會爆句:『搞掂, 食碗面!』或者:『慢吞吞, 食雲吞!』呢d香港本土語言~! 有日屋企冇晒奶粉, 唯有座熱d豆漿當早餐, 晢晢一入口就話:『維他奶呀! 豆漿呀!』(細路仔果然唔呃得~!) 某晚屋企有蚊, 晢晢扮晒嘢攬住媽咪話:『媽咪, 有mosquito 呀! 好驚呀! Mosquito bite呀! 好痛呀! 蚊蚊咬好痕架! RRR呀! 爸爸打c佢!』 爸爸好鍾意唧晢晢, 有時唧到佢頂唔住就會大叫: 『唔玩啦, 唔玩啦!』(爸爸心諗: 你人仔細細, 到你話事咩~ 哈哈!) 到差不多開飯時間, 你問晢晢想食d乜, 佢就會話:『aii… 我食… 我想食… 香蕉 / ice-cream cone / 朱古力 / 士多啤利… 』(總之冇樣正經!) 睇新聞時見到有交通意外報導, D車撞到爛晒, 晢晢就會話:『嘩! TOTAL LOSS!』(仲要講得好認真架!) 其實仲有好多… 記起時再紀錄過啦~!