第一次睇牙醫 – 07.04.11 (3Y4M)

晢晢隻側門牙出咗冇耐已經發現有條細細的黑線, 但一直未有理會…

直到3月尾, 媽媽發現晢晢隻牙直頭冇咗成忽(直徑約半mm)!!! 媽媽擔心再唔處理會令晢晢牙痛, 亦擔會影響將來換牙, 所以睇牙醫事在必行!

3月28日打電話預約時媽媽已擔心得有點手震, 還問姑娘一個十分白痴的問題:『3歲補唔補得牙架?』姑娘沒好氣的答:『補唔補到係睇個小朋友咋喎! 有d會驚到連瞓上床都喊添…』

到底平日膽生毛的晢晢會唔會怕睇牙醫呢???

當晢晢聽到 ”deeeeeeeeeeeee”, “zeeeeeeeeeee” 呢d會令人毛管幢o既聲音會唔會驚到縮埋一舊呢???

媽媽實在有點擔心, 所以自呢一日開始就進行催眠式思想教育, 每日都用好期待o既語氣同晢晢倒數睇牙醫! 初初晢晢都會有點擔心, 會皺皺眉問:『點解要睇牙醫呀?』但漸漸已被媽媽感染(欺騙)~!

終於到睇牙醫的日子, 於診所等候期間媽媽再次強調:『好嘢! 好快到我哋啦!』晢晢顯得好躇躍~!

等候其間, 晢晢在診所內快樂地玩單車~!

等咗3分鐘, 就到我哋晢晢啦! 晢晢的表現係… 十分鎮定! 冇郁, 冇掙扎, 冇大叫, 牙醫叔叔叫佢做乜就做乜, 只用咗10分鐘就補好隻牙! (晢晢表現就好似剪頭法一樣! 仲好似好enjoy咁~! 服咗佢~!)

好明顯係偷拍(勁矇!)

晢晢如此勇敢, 媽媽都忍唔住讚咗佢, 不過亦後加一句:『如果冇蛀牙就更好喇~!』

返到屋企, 晢晢一見到爸爸都即刻講返自己d威水史:『我呢… 睇牙醫呢… 補牙係唔駛驚過喎, 係咪好犀利呢~! 超勁呀!』

爸爸為咗令晢晢更加落力刷牙(同埋刷得再乾淨d), 就買咗支閃電王電動牙刷畀晢晢, 晢晢好鍾意呀! 而家已經唔駛再用吸印仔利誘都會自動自覺要求刷牙! 有時仲一日刷多過3次添呀~! OK, 冇問題, 刷牙又冇壞o既~!

第一日用閃電王電動牙刷…

width="425" height="344">

雖然晢晢表現唔驚, 但呢次經驗都令佢真正體會到咩叫『蛀牙』(有時齋同佢講佢都未必明), 唔多唔少都令佢更加注意牙齒健康 (原來牙真係會蛀過喎)~! 咁希望晢晢以後都唔好再有蛀牙啦~!