兩個只能鍚一個 !?

自從陶陶出世後, 好多朋友都會問:『晢晢有冇呷醋呀?』

Umm… 雖然晢晢久不久會襯媽媽抱陶陶時會扁扁咀, 皺皺眉叫:『媽~~~咪~~~』, 但醋意又唔算好嚴重, 起碼, 佢係真心鍚妹妹…

不過某日跟晢晢坐喺梳化o既一段對話, 就令媽媽個心有點戚戚然…

那日, 媽媽右手抱住陶陶, 左手踏著晢晢膊頭…

媽媽:『晢晢, 媽咪最鍚邊個?』

晢晢:『晢晢!』

媽媽:『咁仲有呢?』

突然, 晢晢雙眼通紅, 定睛望住媽媽, 然後豎起1隻手指話:『1個咋! 媽咪淨係鍚1個架咋!』

媽媽都畀晢晢突如其來o既反應嚇一跳, 但都繼續問:『咁妹妹呢? 鍚埋妹妹得唔得呀?』

晢晢:『唔得呀! 淨係鍚晢晢一個架咋! 一個, 一個架咋!!』

媽媽:『吓? 媽咪淨係鍚晢晢一個, 咁妹妹邊個鍚呀?』

晢晢:『妹妹等我鍚啦!』

之後, 晢晢就去拎咗張被仔同妹妹蓋好, 再輕力拍幾下妹妹:『妹妹, 你乖喇, 哥哥鍚晒你』, 跟手鍚妹妺一啖, 再伏喺媽媽身旁默不作聲…

呢一幕, 媽媽差點感動到喊出嚟! 估唔到平日大癲大肺o既晢晢, 心底裡會原來如此不安, 如此著緊自己喺媽媽心裡o既位置…

仔, 媽媽又點會因為有咗妹妹而分薄咗對你o既愛呢!? 媽媽對你, 對妹妹, 都係百分之百咁鍚架…

 I LOVE YOU, MY KIDS~!