陶陶上PG – 第八課 – 畢業了! (10M3D) – 27.08.11

人生第一張證書~!

貶下眼就完成8課嘅課程, 雖然已報了下一期, 但同班的同學仔有的升班, 有的又冇報, 所以都會各散東西, 有點唔捨得呢…

今堂係最後一堂, 姑娘容許家長拍照, 媽媽隆而重之帶了部頗重的相機諗住影個夠, 可惜開始時較錯mode, 所以相片濛查查... 好在有其他家長幫忙拍了幾張~! (暫時仍未收到相片…), 先看看媽媽所拍的劣照吧 …

這就是陶陶最愛之一的『搖搖板』

同學仔, 陶陶細人哋好幾個月, 但身型郤大幾個碼...

於黑房看的『魚魚』是這樣子的

和媽媽合照...

會發光的按鈕, 旁邊是陶陶最愛的『電線簾』

陶陶少有地主動爬到這邊玩~!

今堂有得玩波波池, 陶陶極之興奮~!

雖然最後一堂, 但內容絶不馬虎, 除了以上的波波池, 還有玩其他活動, 例如『騎馬仔』, 即BB爬喺地, 媽媽抬起佢哋雙腿然後要BB用雙手支撐身體並向前爬, 陶陶表現一如所料… 媽媽已經抬到佢肚腩位置咁滯, 但陶陶雙臂仍未夠力支撐身體(莫講話爬), 仲衰到連手連頭一舊肉餅咁黐著地典來典去, 媽媽抬到身水身汗都爬唔到一步, 唉… 要加加加加加強訓練喇!

另一個活動係入珠仔, 一個小小的兜仔 + 10 粒小小的珠仔, BB要用前二指入下入, 可惜陶陶極度分心, 媽媽出盡九牛二虎之力才成功令佢入到兩粒… 好過冇…

到茶點時間, 今堂食烚蛋, 因為陶陶未開始食蛋白, 所以只比咗少少蛋黃佢食, 又因為媽媽怕佢肥, 所以餵咗半隻就停, 剩餘半隻由媽媽搞掂~! 食飽飽, 就係時候say bye bye 了…

 

 

 

 

 

這8課轉眼就過, 在課堂上, 媽媽可以全程投入且單獨的陪陶陶去玩去學, 讓媽媽更看清陶陶的特質, 更了解自己的女兒…

還記得第一堂, 當媽媽第一次放陶陶到BB韆鞦時, 看見她那燦爛的笑容, 真的很感動, 因為之前是從未見過陶陶笑得那麼開懷的; 但另一方面郤又有點內疚, 正因為未見過, 就表示媽媽之前從未認真的跟陶陶去玩過… (作為兩孩之母就是有這個難處, 顧得個大, 又顧唔到個細…)

在這8堂裡, 媽媽看到陶陶仍有許進步空間(尤以大肌肉因為甚), 雖然如此, 媽媽郤沒有半點失望, 反而更欣賞陶陶的投入! 起碼她每樣事物都勇於嘗試, 從未因接觸新事物而害怕或哭鬧, 這已算是向成功踏出第一步,  呢一刻做唔到都變得唔重要…

下星期是新課程的開始, 課程內容相信大至相同, 所以爸爸都微言:『你都報咗幼潛啦! 又報???』但媽媽真的不想錯過和陶陶去玩去學的機會, 所以都說服爸爸去排隊…

不知道下一期陶陶會否帶來新驚喜呢?? 識行?? 似乎大貪咗d… 期待~~~