晢晢:「睇吓我幾大對黑眼圈…」 
呢朝早媽媽都有一刻想缺課, 因為前一晚晢晢發惡夢, 由半夜2點斷斷續續喊到5點先返瞓, 一家3口精神極度欠佳, 又唔多好老皮
… 不過, 媽媽又唔想咁輕易放棄, 所以頂硬上…
其實自晢晢N1開學後, 就要接受一星期返足7日學o既生涯(抱括MON~FRI 返學, SAT德怡 PLAYGROUP 及 SUN幼兒樂園), 爸爸都有微言安排得太密
, 但媽媽又覺得每個PLAYGROUP都對晢晢有幫助! 雖然時間上有少少不足, 但媽媽仍然覺得係值得! 希望到3月時, 所有PLAYGROUP都完結後情況會好D… (不過媽媽又開始搜尋緊其他課程, 有合適的話, 晢晢都好大可能會開始返一星期上6日課生涯…
)
話題扯到太遠添! 講返上堂情況先… 
今堂因為遲到咗20分鐘, 所以一入門口已經係唱歌仔時間… 唔知晢晢係咪經過一連5日N1而習慣咗獨自上課!? 呢堂竟然唔需要爸爸媽媽坐喺背後, 都可以自己一個人坐定定並投入課堂之中~! 
當婷姨姨畀每位小朋友輪流嘗試做圖工時, 雖然每次都係晢晢包尾咁制, 但晢晢只不斷舉手及講:「到晢晢吖~ 到晢晢吖~」, pat pat依然掂凳坐, 冇離座, 又冇發脾氣, 直到婷姨姨畀佢為止… 耐性, 似乎好了… (係咪好似好乖仔呢? 好戲在後頭!
)
是日圖工 – 穿爆竹, 穿到第5個左右就開始扭眼瞓, 餘下部份由媽媽負責…
完成圖工後, 就是日重頭戲 – 行年宵
婷姨姨預備咗每人4個小金幣到不同「檔口」辦年貨, 分別有揮春檔, 年桔檔, 爆竹檔(以上全部貨品都係同學喺課堂上o既作品)以及小朋友最鍾意o既糖果檔
, 藉以教佢哋買賣概念同埋認識新年物品!
「年宵」仲未開始, 晢晢已被糖果吸去整個靈魂! 不斷扭計話:「我要candy 呀!
」, 等到正式開始, 晢晢第一時間到糖檔搵食! 跟Patty姨姨講咗句:「我要買糖糖」就立即掃貨! 放咗勁多糖入袋! 然後拿拿聲畀錢就走人! 
媽媽本想帶晢晢去下一站揮春檔買揮春, 但晢晢已經冇心機再行, 一心只想食糖! 媽媽好言相勸:「買埋揮春先啦!」但晢晢就大發脾氣! 大喊大叫又典地! 媽媽都冇佢咁好氣! 鍾意典就典飽佢啦! 
結果餘下o既檔口全都冇好好完成… 咁有意義o既遊戲就咁白白錯過咗…
晢晢:「唔好阻住我食糖啦!」 
洗過手, 就到茶點時間, 今堂伙食唔錯, 有柑, 蛋散, 角仔同提子包~! 初初以為柑同燈差不多味晢晢應該會食, 結果?(唔駛多講)… 到食蛋散時, 雖然一睇就知係香口嘢, 但晢晢因為未試過都先搵媽媽驗毒, 見媽媽大口吃下仲卜卜脆, 就成件食晒!! 而角仔因為學校剛剛食過, 所以唔駛通過媽媽檢查就成件食晒! 至於提子包… 諗都唔諗就掉咗落垃圾桶! 4樣東東只有2樣唔食, 算「好成績!」
晢晢:「不如以後淨係食角仔唔食飯咯~!」
臨放學時, 媽媽再一次把握機會到婷姨姨細心擺設o既「賀年枱」前細心講解, 希望晢晢到新年時唔會大鄉里到連存盒, 水仙, 瓜子, 揮春都唔知係咩啦~! (HEEHEE 晢晢家個存盒太過新潮, 又唔會插年花, 所以唯有趁機好好教育一下~!)
放學時, 晢晢喺婷姨姨手上接過揮春同利是(入面係朱古力金幣), 講句: 「新年快樂, 恭喜恭喜!」就放學lu~!
小記: 為咗讓晢晢感受多點節日氣氛, 媽媽特意拎晢晢o既賀年圖工將屋企佈置一翻(其實貼得超求奇~!), 晢晢一見到就大叫:「好靚呀!」… 不枉媽媽花o既心思~!
沒有留言:
張貼留言