幼兒樂園 II – 第7堂 31.01.10

晢晢:「人哋瞓得好地地又叫醒人…」

呢朝早有少許遲到, 上到課室已經係唱歌仔環節, 而晢晢仍然沉醉喺夢香中…

媽媽刻意將睡夢中o既晢晢抱近小朋友, 意圖用佢哋o既歌聲/搖鈴聲叫醒晢晢… 其實開頭都有d擔心晢晢會發老皮, 好彩晢晢被嘈醒後竟然笑笑口主動叫:「坐凳凳吖~!」咁都冇咁驚…

今堂婷姨姨講o既故事都係同農曆新年有關, 晢晢都算聽得留心架, 不過唔知佢聽得明幾多呢?

是日圖工亦十分應節, 就係做暉春啦! 其中一款叫「人人開心」, 婷姨姨預備咗一片印有『人人』二字o既模版, 小朋友就用海綿+黑色o既顏料印到紅紙上, 爸爸媽媽刻意放手畀晢晢做, 雖然印得麻麻, 但爸爸媽媽一d都唔介意 (要尊重晢晢原創嘛)…

之後晢晢再做兩個笑臉, 亦係放手畀晢晢貼上雙眼, 效果都唔錯架~!

晢晢:「完成啦~ 幾靚?」

到唱遊時間, 今堂係玩musical chair, 對上一次玩仲係幼兒樂園第一期時, 果次婷姨姨冇按「法定」遊戲規則收起一張凳(即人人有凳坐), 但呢次婷姨姨就增加難度, 收起咗一張凳, 小朋友要有凳坐就要快手d喇~!

晢晢同Anna坐得好有型呀~!

玩完遊戲就到茶點時間, 今堂係食apple + 餅餅, 好啱晢晢胃口, 不過唔知係咪年近歲晚特別好伙食!? 份量好多, 多到晢晢都食唔晒~!

爸爸拍到Anna祈禱時個趣怪樣~! 個樣好古惑~!

一個鐘頭好快就過, 婷姨姨話下堂主題係年宵, 小朋友可以去「買」返上堂自己所做o既年吉同暉春~ 期待~!

時間過得真快, 話咁快又進入倒數階段喇… 仔, 仲有3堂咋, 要好好enjoy~!

 

小記: 某日媽媽搭車時聽到一位爸爸好感慨咁同另一位朋友講:「我個女聽日上台攞獎呀… 係佢個燈籠… 可惜個燈籠係我造o既… 」 聽得出個爸爸好後悔冇放手畀個女做, 就算有獎攞, 都唔會開心… 對媽媽好大提醒, 希望媽媽日後都可以做到尊重晢晢「作品」o既媽媽, 就算做得唔靚(靚唔靚其實好主觀o既), 都盡量唔插手, 放手交畀晢晢做! (所以…晢晢, 日後d咩咩燈籠設計呀, 咩咩聖誕咭呀… 通通都係你自己做架啦, 到時唔好叫晒救命喇~!)