K1開學啦~! 01~03.09.2010

上學的第一天 – 2010年9月1日

呢日媽媽拎咗假陪晢晢返學, 晢晢表現不錯, 好清楚上課流程, 而且唔駛提點都懂得遵守課堂規矩, 可能始終返過N1有關…

入到課室, 小朋友要先坐好, 打開書包, 拎出通告袋及餐具袋, 然後再將書包及餐具袋拎到課室外o既書包架上… 媽媽覺得呢個程序有啲古怪, 點解唔先放咗書包於書包架上, 然後再拎通告袋返課室??? 媽媽就此詢問老師, 老師話小朋友坐底拎物件出嚟會易handle d喎… (真係???)

之後開始自由玩玩具時間, 晢晢好清楚每次只可玩一件玩具, 而且明白要放回玩具先可能玩另一位, 而且亦知道唔可以玩同學手上玩具, 媽媽喺呢部份畀佢100分~!

到正式上堂, 老師問同學邊個想出嚟玩絲巾, 晢晢立即舉手, 老師回應後晢晢就走到課室中央跟著拍子揮動絲巾, 玩得十分開心~! (平時都唔覺晢晢咁奀, 但當晢晢走到同學堆中先發現佢差不多係全班最細粒果個, 呢個就係細B特徵…)

玩完絲巾就到洗手間時間, 晢晢乖乖排隊, 其間經過大肌肉場有同學意圖走去玩sir滑梯, 晢晢不但不為所動, 更向同學大叫:『而家唔準玩架, 快d排隊!』(一日唔偷雞就做保長~!)

去完洗手間, 晢晢問媽媽可唔可以玩sir滑梯, 媽媽叫佢問老師, 佢就走到老師面前問:『老師, 我可唔可以玩sir滑梯呀?』老師話:『而家唔玩得住, 要排隊返課室食茶點~!』晢晢乖乖服從…

吃茶點也有點步驟, 要先回課室, 然後返回課室外的書包架取回餐具袋, 再返回座位拎出餐具…

放餐具也有點技巧, 要先將杯蓋打開, 然後反轉放於枱上, 再將杯放上杯蓋上, 食物盒及毛巾盒如是…

之後開始派發食物及飲料, 同學們不可立即進食, 要一起祈禱, 再互相叫大家食茶點方可一同進食, 呢堂係茶點有動物餅及水…

吃完茶點, 抺好咀及手, 就收搭餐具並放回書包架上, 唱過放學歌, 取回書包, 再跟老師道別後就放學啦~! (呢日只需返1小時~!)

總括而言, 晢晢返學表現開心, 希望一直KEEP住就好咯~!

上學的第二天 – 2010年9月2日

大致上跟第一天差不多, 但晢晢更加投入開心, 事關今堂遊戲係喳車, 兒歌係晢晢飛弗之一THE WHEELS ON THE BUS, 放學就派晢晢偶像『閃電王麥坤』貼紙! 全部都啱晢晢胃口, 點會唔開心~!?

上學的第三天 – 2010年9月3日

由婆婆陪返學, 呢日主要係大肌肉活動, 婆婆話晢晢想踩車車, 就問同學:『可唔可以借畀我玩呀?』可惜問咗幾次同學都唔肯讓出車車… 都等咗一段時間, 老師就上前叫同學讓畀晢晢玩, 晢晢得嘗所願~! (值得一讚係晢晢一直都表現得好有禮貌, 且好有耐性! 抵鍚~!)

不過聽婆婆講, 大肌肉時間其實有點混亂, 例如同一時間會有其他班小朋友排隊到洗手間, 又會有其他小朋友喺操場另一邊做早操… 另一方面婆婆亦見到有些小朋友比較失控但老師又未能及時處理… 媽媽聽見有點擔心, 遲d都要跟老師了解清楚到正式上課後會否有同一安排!? (現時只需上1小時堂, 學校將課堂濃縮導致有呢個情況都唔出奇~! 媽媽不會太快下定論~!)

下星期一家長仍需跟小朋友一同返學, 但就唔需要再入課室陪小朋友, 而係坐喺另一間房stand by! 媽媽交咗畀婆婆負責, 希望晢晢獨立上課都冇問題啦~!