晢晢愛小B – 33 WEEK 1 DAY – 06.09.10

唔經唔覺小B已經喺媽媽個肚33 WEEK喇~! 隨住媽媽個肚漸漸脹大, 晢晢對小B既感情亦愈來愈深, 差不多每日都要鍚一啖媽媽個肚, 同小B傾一陣計先安樂…

『BB, 你幾時出世呀?』

『BB, 我係晢晢哥哥呀, 我會好鍚你架~!』

『BB, 我哋一齊去Ocean Park好唔好呀?』

『BB, 我整咗啫喱呀, 一齊食吖好唔好呀?』

『BB, 你要乖, 唔準扭計知唔知呀?』

 

除咗會關心小B, 晢晢對媽媽都十分愛護, 某日爸爸卷埋張被, 然後坐喺上面呃晢晢話媽媽喺被入面, 晢晢就即刻好緊張大叫…

『爸爸起身呀!!! 媽咪肚肚有BB架!!!』個樣緊張到差D想喊~!

 

此外, 晢晢亦會時時慰問媽媽…

『媽咪, 個肚係咪硬晒呀?』

『媽咪, BB係咪踢你呀?』

『媽咪, 你舒唔舒服呀?』

 

當有好嘢食時, 晢晢久不久都會主動分少少畀小B…

『BB, 請粒維他命C畀你啦, 你有冇多謝晢晢哥哥呀?』 (仲識得加哥哥二字~!)

 

不過當媽媽個肚漸大, 晢晢又似乎已意識到要讓出佢心愛o既BB床同被舖, 時不時都會拎住佢張BB被對住媽媽個肚講:

『BB, 呢張被被係晢晢哥哥架, 媽咪買過張新畀你好唔好呀?』

有時媽媽會好衰咁話:『不如媽咪買過張新畀晢晢, 呢張畀BB啦!』

晢晢就會斬釘截鐵話:『唔得!』

(近日已趕緊佈置小童房, 希望晢晢會喜歡並快快適應分房瞓的轉變…)

 

小B, 仲有一個月多D就會與你見面喇, 到時媽媽就升級為兩B之母, 希望媽媽應付得嚟啦~! 小B, 你要乖唔好吓媽咪, 要健健康康, 要食得瞓得, 知唔知道!!??