呢日媽媽唔駛返工, 一早起身食飽早餐就打算帶晢晢去沙灘玩(因為佢成日提住
~!), 本來媽媽想近近地到黃金泳灘就算(媽媽話晒都粗身大勢嘛~!), 但爸爸話:『放假就去遠d啦… 不如去赤柱啦』… 媽媽無話可說… 
喺往赤柱途中, 巴士經過深水灣, 媽媽見之前未嚟過, 就決定一試~! 
中午2點多到達, 頗晒, 但有陣陣涼風, 好舒服~! 
一到步, 晢晢就忙於舀沙, 非常忙碌~! 
成面沙都可以面不改容~ 勁!! 
晢晢好努力同爸爸一齊挖大古隆... 加油!!
晢晢:『等多陣啦, 就得啦!』
晢晢:『睇吓, 我個私家水池呀!』
晢晢好鍾意游水, 一個人游到好出都未驚過! (好在D水就算好出都好淺啫~!)
睇吓佢哋兩仔爺幾寫意, 媽媽都唔輸蝕, 浸咗一陣水(而家游唔郁咯!
), 只係因為太樣衰, 唔願意上鏡啫~! 
我哋玩到大概5點多就離開, 不過呢日撞正灣仔遊行, 我哋又趕住返大西北食朱精姨媽果餐生日飯, 唯有局住塞車都照打的出中環… 車費… 當然貴到嘔電
… 不過算啦, 因為呢日晢晢真係玩得好開心, 之後仲時時提住:『我哋去沙灘玩好唔好呀?
』媽媽:『緊係好~! 希望媽媽喺小B出世前可以帶多你幾次到沙灘玩啦~!』
沒有留言:
張貼留言