艾篙PLAYGROUP – 第十堂 – 26.07.10

因病入院而冇返3堂o既晢晢, 隔咗咁耐, 一入課室就有點不安, 要婆婆陪一陣先能夠慢慢適應到, 呢堂晢晢表現如何呢?

上課情況:

今堂晢晢被分到Kevin哥哥的一組上堂, Kevin哥哥解釋因為每個小朋友的lesson plan都不同, 所以未必每堂都係所有同學一齊上~!

 一開始, Kevin哥哥同佢哋玩有關語言指令遊戲, 開頭會係一d較簡單o既指令, 例如『摸頭頭』, 『摸鼻鼻』, 晢晢當然冇問題~! 之後就加深難道, 要講咗『Kevin哥哥話』的指令先要做(類似『老師話』, 晢晢係理解遊戲規則, 但每當聽到指令(無論有冇『Kevin哥哥話』的指令) 就好心急去做, 做錯咗先會醒起:『係喎, 冇『Kevin哥哥話』唔駛做喎!!!』… Kevin哥哥表示遊戲能反映小朋友有冇專注/留心聽指令, 明顯地晢晢仍有好多進步空間… (Kevin哥哥叫媽媽唔駛擔心, 今次只係第一次玩, 日後玩多幾次應該會有改善~!)

到第二個遊戲, Kevin哥哥先放一個人物公仔於板o既正中間, 然後喺公仔o既前,  後, 左, 右都放唔同o既物件(例如: 前~樹, 後~熊貓, 左~狗, 右~花),  當Kevin哥哥問:『公仔上面/隔離有d乜嘢呀?』, 晢晢都能準確回答! 然後Kevin哥哥加深難度, 要求小朋友代入角色, 並以物件o既名稱代替向方名稱!(例如: 行去樹即向前行, 行去狗即向左行…),晢晢明顯地未能理解, 當Kevin哥哥話:『行去樹』晢晢只會走到樹旁而未理解意思係要向前走! Kevin哥哥表示日後會再練習! (其實呢個遊戲媽媽都要Kevin哥哥講幾次先明點玩, 所以晢晢唔明媽媽都好體諒…)

之後到音樂環節, 一開始要求佢哋唱佢哋個名首歌(歌詞: X翱晢, X翱晢, 翱晢, 翱晢, 好孩子), Kevin哥哥話或者晢晢太耐冇返, 所以似乎已完全忘記呢首歌, 不過相信唱多幾堂就會記得返~!

到下一part係有關拍子感訓練, Kevin哥哥先打鼓並要求小朋友跟住節奏氹腳仔, 晢晢無論慢變快, 快變慢都表現不錯!

然後Kevin哥哥再加入『喳喳聲』, 當有『喳』聲時就拍一下手, 有鼓聲時就氹一下腳, 慢慢變成節奏『鼓鼓喳 (氹氹拍), 鼓鼓喳 (氹氹拍)』, 晢晢跟得唔錯! 之後Kevin哥哥唔再打鼓及喳喳, 改為彈兒歌<小蜜蜂>及<刷牙歌>, 並要求小朋友跟住節奏做『氹氹拍, 氹氹拍…』晢晢都能準確做到! (媽媽真的感到很意外, 還記得晢晢第一堂時Surmen姐姐提過晢晢拍子感較弱, 估唔到個多月後晢晢有如此表現!)

最後Kevin哥哥要求小朋友一齊拖手唱歌, 晢晢表現投入, 亦會主動跟小朋友講『拖住啦!』(即晢晢樂於同其他小朋友玩, 咁就好喇~!)

課堂秩序方面:

Kevin哥哥話今堂可能晢晢大病初癒狀態未完全回復, 明顯地冇平日咁活躍, 所以比平時定及乖巧! 要下堂要再觀察先能作準咯~!