艾篙PLAYGROUP – 第五堂 – 21.06.10

上課情況:

或許Surman姐姐見晢晢跟某某同學仔有點『牙齒印』, 所以今堂一開始就講咗個<<交朋友>>的故事, Surman姐姐話小朋友都聽得好投入~!

故事講完後, Surman姐姐就教佢哋邀請小朋友一齊做一件事(例如某玩意), 並要求以句子表達, 例如:『xx, 你可唔可以同我一齊玩呀?』, Surman姐姐話原來佢哋仲未識覆述整句句子, 一聽到『可唔可以?』就只識答『可以』(因為佢哋好心急想玩), Surman話個課室好快就洋溢住一遍『可以可以可以』及笑聲中~~~ (場面諗起都覺得搞笑~!)

之後Surman姐姐叫佢哋一齊合作砌lego, 開始時佢哋都係各自各玩, 但喺Surman姐姐努力營造氣氛吓, 再加入故事元素, 佢哋就好愉快咁一齊合作砌起一棵樹~! (其實以佢哋呢個年紀本應未識享受一齊玩, 相信佢哋可以投入地玩Surman姐姐一定花咗好多心血~!)

另外, Surman喺呢個遊戲中又見到原來晢晢跟上次大打出手o既同學仔係好老友, 因為每次Surman姐姐叫佢哋邀請朋友一齊玩時, 佢哋都必定選對方~! (唔通真係愈打愈老友?)

到下一part, 遊戲其中一部份係分辦咭上人物表情(分別係開心, 唔開心及驚), 晢晢呢part做得唔錯~! 之後Surman姐姐跟晢晢有以下對答:

Surman: 『晢晢你遇到咩事會開心架?』

晢晢:『見到daddy咪開心lor』(Surman姐姐已勸咗媽媽唔好傷心~!)

之後Surman姐姐再拎咗一張唔開心o既咭, 咭上人物係因為玩具車個車轆爛咗而唔開心, Surman姐姐就問:『點解個小朋友唔開心o既?』

晢晢:『因為個轆轆爆炸!』(仔, 個轆爛咗咋嘛…)

Surman姐姐再問:『咁個車爛咗點算呀?』

晢晢:『搵爸爸整lor~!』(啱喇, 粗重嘢搵爸爸啦~!)

之後Surman姐姐又問:『咁晢晢遇到咩事會驚架?』

晢晢:『打爛花樽好驚架!』(屋企未試過打爛花樽, 爸爸話可能我講過d故事有有關情節喎…)

之後Surman姐姐拎住張驚o既咭, 咭上人物係因為就嚟從單車跌落地所以好驚, Surman姐姐就問:『如果小朋友跌咗落哋受傷咁點算呀?』

晢晢:『痛痛… 要睇醫生, 要坐消防車去醫院呀…』

Surman姐姐:『坐消防車!?』

晢晢諗咗一陣:『要坐ambulance呀!』(晢晢d中文就係咁差, 時時mix-up消防車同救傷車…)

到建構環節, 今堂用lego砌咗個醫院場景, 藉以讓佢哋認識醫院有o既物件, 當中有一個用白色lego砌成o既『洗手盤』, Surman姐姐諗住教佢哋出入醫院要洗手, 點知佢哋異口同聲話個『洗手盤』係用嚟wee we, 真係激C Surman姐姐~!

之後Surman姐姐再問:『如果媽咪病咗要點做呀?』

晢晢:『媽咪冇事, 媽媽睇醫生食咗通粉好返晒啦!』(食通粉? 晢晢你都好無厘頭喎…)

從以上對答, Surman姐姐話晢晢講嘢算有文有路(雖然有d無厘頭), 起碼每問一樣嘢會答返有關o既嘢而唔係天馬行空~! 另外, Surman姐姐又提到晢晢性格係『極度』受軟唔受硬! 當你好嚴厲叫佢唔準做一件事時, 晢晢多數都會唔聽, 但你好聲好氣同佢講, 例如:『晢晢, 你好乖過喎, 坐定定叻畀Surman姐姐睇!』, 晢晢就會乖乖follow~!

媽媽跟Surman姐姐反映, 晢晢由細到大媽媽都係用『軟』方法同佢溝通, 差不多可以話從未嚴厲過, 而且一直以來晢晢喺呢種方法溝通下都算係一個肯講道理o既小朋友, 大家都感到好舒服, 所以媽媽從未諗過會因為咁而令晢晢只受軟唔受硬, 亦冇諗過呢個都係一個『問題』! 後來Surman姐姐回應, 其實媽媽呢種溝通係正確, 只係佢日後需要再揣摩如何跟晢晢溝通…

此外, Surman姐姐又提到晢晢自我保護意識好強, 唔係好願意分享, 呢點媽媽跟婆婆真的要多加注意, 因為以往晢晢呢個問題都不算嚴重, 但近來似乎有點變本加厲, 媽媽認為係平日跟Yoyo相處時, 婆婆處理佢哋衝突o既方法出咗問題, 已跟婆婆反映, 希望會有改善! 

自呢日之後, 媽媽每晚都會好似催眠咁同晢晢『訓話』…

媽媽:『晢晢, 你想玩同學仔件玩具要點做呀?』

晢晢:『要問… xx, 一齊玩可唔可以呀?』

媽媽:『咁人哋話唔可以又點算呀?』

晢晢:『唔該啦, 借畀我玩啦!』

媽媽:『係喇, 要笑住問人哋架, 人哋唔借咪玩第二個玩具lor!』

晢晢:『一人一個玩具唔好爭呀!』

媽媽:『咁如果有小朋友問晢晢拎玩具玩咁晢晢畀唔畀呀?』

晢晢: 一時點頭, 一時拎頭, 似乎有點唔願意…

媽媽:『晢晢好乖過喎, 識得同小朋友一齊分享係咪呀?』

晢晢: (點頭)『我畀小朋友玩架!』(果然係極度受軟唔受硬!)

媽媽:『仲有呀, 晢晢打小朋友啱唔啱架?』

晢晢:『唔啱架, 要細細力摸!』

媽媽:『係呀, 你記住啦, 唔可以打人架, 你打痛小朋友人哋唔同你玩架啦, 知唔知?

晢晢:『知!』

仔, 你答就答得有文有路喇, 希望到上堂時都能夠做到啦~!