生妹妹住院的4日3夜 - 10.10.10 ~ 13.10.10

趁仲記得, 要好好紀錄一下~~~

雖然爸爸媽媽一早定了2010年10月10日開刀生妹妹, 但懶懶閒的媽媽直到10號凌晨先將走佬袋收拾好~!

呢日跟醫生約好約早上7至8點開刀, 所以爸爸媽媽凌晨4點就起床, 5點就出門口搭的士向法國醫院出法~! 而晢晢呢? 就繼續喺屋企覺覺豬, 交畀婆婆照顧~!

雖然係定咗日子開刀, 但呢日咁啱得咁橋媽媽開始有陣痛, 約10分鐘一次, 所以妹妹都註定係呢日出世架啦~!

監察BB心跳中

媽媽:『醫生, 7:30啦, 仲未見人o既!? 又話7至8點開刀??』

就喺媽媽剛剛影完上面張相後, 姑娘就幫媽媽換衫準備到手術室, 正當滿心歡喜時, 姑娘突然同爸爸媽媽講: 『今日係星期日, 我哋人手唔夠, 所以冇得陪產...』把媽媽嚇得半C... 我哋一直苦苦哀求, 直到去到手術室門外, 姑娘都依然堅持冇得陪, 媽媽唯有接受...

於等候室, 醫生終於出現, 佢問媽媽對手術有咩疑問, 媽媽就問醫生:『醫生醫生, 你會唔會喺我個肚畫個等如架?』醫生問: 『咩係等如?』媽媽:『上一刀, 下一刀咪等如( = )咯~!』(上次生晢晢已經有一刀啦嘛~!)... 醫生大笑完一輪就話:『緊係唔會啦, 我開返舊疤痕度架!』咁媽媽就放心喇~!

終於要瞓到手術床上喇~! 一個人, 冇人喺身邊分下心就會周圍望, 不過望望下就有點唔對路... 見到d刀呀, 較剪呀, 手術室先會見到o既綠色布呀... 都咪話唔驚~! 當麻醉師為媽媽喺手度打豆豆時, 就問: 『咦~ 你好凍喎, 你冇咩嘢吖嘛?』媽媽:『我諗我冇咩o既, 有d驚啫...』到正式麻醉後(半麻)媽媽親眼睇住醫生喺自己個肚上面搽消毒藥水準備開刀時, 媽媽終於頂唔住大喊: 『我好驚呀!』麻醉師安慰完一輪, 又扯開話題講吓東講吓西, 然後再喺媽媽前面拉起布幕手術先可以順利進行~!

不久, 麻醉師喺媽媽個頭o既方向大力一推~! 妹妹就出世啦~! 當時佢同醫生邊接生邊大叫: 『嘩! 呢個BB咁大隻o既!!』加上妹妹o既喊聲, 手術室突然熱鬧起嚟~!

同生晢晢時一樣, 見到妹妹第一時間鍚咗佢面珠一啖~! 好暖粒粒架~!

喺門外苦等o既爸爸, 一見到妹妹即同佢留情影~!

因為手術第一日媽媽唔可以落床, 所以生完就只有靠爸爸到BB房同妹妹影相以解相思之苦~!

DAY 1 - 沖完涼, 已經唔同晒樣~!

DAY 2 - 又係一個喊樣...

今次生妹妹可能已有經驗, 所以第二日已經可以落床, 不過都暈咗幾次先正式走得郁, 到下午3點, 媽媽終於可以去餵奶房餵奶, 見吓妹妹啦~!

妹妹好大食, 每餐埋身餵完都可以食晒食支超過2.5oz既奶, 有次媽媽餵剩大概5ml, 姑娘特登走嚟同媽媽講:『不如你餵埋佢啦, 佢成日喊架~!』(妹妹, 你都出晒名喇~!)

每餐餵完奶, 媽媽都會偷偷替妹妹拍照~! 妹妹個樣幾滿足~!

(時序: 左至右, 上至下排烈)

媽媽住院其間, 晢晢每日都有嚟探媽媽同妹妹~! 喺第一日, 晢晢見到媽媽個肚扁咗, 然後又見到真係有個BB出現喺佢面前, 初時都顯得有點迷茫, 好似兩樣嘢link唔埋咁~! 不過好快已經畀佢諗通咗, 而且仲好開心終於見到妹妹添~!

好勉強的一張合照~!

以為生第二胎爸爸唔會買花添, 算你識做啦~!

留院第四日, 妹妹健康情況良好, 媽媽又食得瞓得行得走得就決定出院啦~! 有樣嘢差d忘記提, 今次媽媽住o既病房竟然同生晢晢時一樣!!! 上次係319B, 今次係319C, 真橋~!!

臨走影吓張床留個念先~!(我諗我唔會生第三個啦掛~!)

入院時明明只得右上果個走佬袋, 出院時竟然有5大袋(第5袋冇影到相), 真多謝各位~!

因為太多嘢拎, 所以扎花唯有留低佢喺醫院... 唔緊要, 在心中~!

終於返到屋企, 正式展開一家四口生活~! 媽媽同爸爸喺好多方面都要重新學習, 重新適應, 求天父保守, 讓我哋兩個孩子都快快樂樂, 健健康康地成長~!

我們這一家~!