艾篙PLAYGROUP 2 – 第五堂 – 02.10.10

呢日晢晢終於冇喊啦~! 叻仔~!

呢堂前一日就係同教會職青團BBQ既日子, 回家途中媽媽趁晢晢心情靚就問佢…

媽媽:『晢晢, 聽日返PLAYGROUP好唔好呀?』

晢晢: (好高興咁答)『好呀!』

媽媽:『咁同爸爸say BYE BYE時駛唔駛喊架?』

晢晢: (好肯定咁答)『唔駛~!』

估唔到短短幾句都能起到作用~!

上課情況:

呢堂又係由Stephanie姐姐負責~! 一開始係玩有關聆聽遊戲, Stephanie姐姐播出真的動物聲音(eg: 貓, 狗, 公雞, 小鳥, 青蛙, 牛…), 然後叫小朋友只憑聲音認出該動物, 遊戲可訓練小朋友聽覺敏感度及專注能力~!

小朋友於呢part表現不錯, 好安靜及留心地聆聽, 而晢晢都能聽出大部動物, 唯獨牛未能認出, 認錯咗係『馬』~! (Stephanie姐姐話可能小朋友比較少接觸真牛o既叫聲, 所以認唔出都唔出奇~!)

之後Stephanie姐姐叫小朋友認出動物聲音後就扮返該動物出嚟, 藉以刺激佢哋o既創意~! Stephanie姐姐話呢一part小朋友玩得最投入最開心, 而且各小朋友o既connection都比平時多, 社交發展一大進步~!

而晢晢扮動物表現都不錯, 尤其扮老虎時, Stephanie姐姐形容晢晢無論形態同神情都『似得好緊要』(哈哈~! 媽媽諗起都想笑~!)

到課堂下半部份 --- 大肌肉活動 ~ 騎馬仔(即有支棍, 上面有個馬頭果d『馬仔』), Stephanie姐姐話遊戲有助訓練『眼』+『手』+『腳』協調~! (平日o既活動大多只係『眼』+『手』或『眼』+『腳』協調, 但呢個活動要『眼』+『手』+『腳』三樣配合, 難度頗高~!)

開始時Stephanie姐姐先播出輕快音樂讓小朋友喺平地上走, 晢晢騎得好神似, 真係會上下搖住隻馬仔咁行~!

之後開始加強難度, 要小朋友邊騎馬仔邊走障礙賽, 障礙物包括: 上斜, 落斜, 雙腿連續跳兩個呼拉圈(相距大約25-30cm)及跨欄~!

晢晢上斜落斜冇問題, 但跳呼拉圈時suppose小朋友跳一下就能跳到下一個圈, 但晢晢就要跳2-3下先到, 小腿肌肉發展未如理想(又或者因為要兼顧隻馬仔而未能發揮得好), 但無論如何都要再加強訓練~!

另外跨欄時晢晢都有傾左情況(因為晢晢先起右腳), 但Stephanie姐姐話呢個情況屬於正常, 因為要夾住隻馬仔跨欄對呢個年紀嚟講難度頗高~! 而且平日同晢晢玩平衡木時晢晢平衡力係冇問題, 所以唔駛擔心~!

到課堂最後一個活動 --- 認知遊戲 ~ 動物分類 (按海, 陸, 空分類), Stephanie姐姐安排咗3個桶, 桶上冇任何提示指明那一個是收集海, 陸或空的動物, 小朋友只能憑記憶將動物投入正確的桶內~!

對於明顯的動物(eg: 老虎屬陸, 魚屬海…) 晢晢表現算快而準, 唯獨對於鴨及鵝晢晢顯得好迷茫, Stephanie姐姐對於晢晢有此表現表示欣賞, 因為鴨及鵝的確有批判性(可以出現喺海/陸), Stephanie姐姐見狀就問晢晢…

Stephanie姐姐:『鴨鴨係咪會游水架?』

晢晢:『係呀~!』

Stephanie姐姐:『咁鴨鴨係咪都會喺地上行架!』

晢晢:『係呀~!』

Stephanie姐姐話晢晢識咁答證明佢猶豫得有道理~!

到課堂尾聲, 呢班小朋友趁臨尾5分鐘自發玩多次扮動物, 又互相提議扮咩, 玩得非常開心~! 社交發展的確大躍進!!!

其實媽媽都覺得呢堂晢晢表現跟過往好唔同, 放學後晢晢少有地跟媽媽提起同學o既名字, 又主動話畀媽媽知佢玩得好開心~! 媽媽上星期先擔心緊晢晢唔知要喊到幾時, 呢堂就有如此表現, 抵鍚~!