小事一樁 ~ 我真好開心呀~! 21.03.11 (3Y3M)

小事一樁… 但感覺… 嘻… 好溫馨啊~!

話說傻媽媽傻間間喺某連鎖店買貴咗片片(買貴咗成$14一包, 共兩包!!), 喺朋友提醒下先知原來可以退款! 當晚返到屋企就拿拿聲拉埋晢晢, 一人拎一包片片浩浩蕩蕩退款去…

可能平日好少可放工帶晢晢落街, 所以由出門口一刻, 晢晢已經好興奮, 拖住媽媽的手不停講講講, 問問問…

晢晢:『媽咪, 我哋拎d片片畀邊個呀?』

媽媽:『媽咪拎d片片去maxxxxg退錢呀! 媽咪好開心呀!!』

晢晢:『點解媽咪好開心o既?』

媽媽:『因為媽咪買貴咗嘢, 後來知道可以退錢, 所以咪好開心lor! 我哋退咗錢去超級市場shopping好唔好呀!?』

晢晢:『好嘢!! 我哋去超級市場shopping啦!!!』

媽媽:『咁晢晢想買咩呀?』

晢晢:『買… 買士多啤利吖好唔好呀?』

媽媽:『好吖! 就拎d錢去買士多啤利啦!』

晢晢: (開心到彈起!)『好嘢!! 買士多啤利!! 媽咪, 我真係好開心呀!!』

然後沿路晢晢就一直笑住講『我真係好開心呀!!』…『我真係好開心呀!!』…

退完錢, 就到隔鄰的超級市場消費一番~! 雖然冇士多啤利賣, 但晢晢退而求其次話:『不如買大西瓜慶祝吖好唔好呀!?』

其實, 個大西瓜係好重好重, 但睇見個仔笑得咁開心, 真的唔忍心潑佢冷水, 所以就拎咗慳返o既錢去買大西瓜, 然後手拖手的把大西瓜托回家去…

其實自從陶陶出世後, 晢晢和媽媽單獨相處的時間少了, 所以呢晚雖然只係陪媽媽去退款和逛超級市場, 但就足以令晢晢開心到不停口話『我真係好開心呀!!』同埋要買大西瓜『慶祝』, 媽媽… 實在…實在…有點點感動呢~~~ 嘻~~

超低能的兩母子~!