開飯咯~!

我們『陶。晢。家』終於有飯開咯~!

真失禮, 爸爸媽媽自結婚後, 家中爐火開過o既次數, 真係5隻手指都數得晒…

未生晢晢前, 就晚晚到婆婆家黐餐, 晢晢出世後, 就食『婆婆牌飯盒』, 一食就食咗3年!!! (何謂『婆婆牌飯盒』? 即每天婆婆中午時煮定的飯餸, pack好放入雪櫃, 到我哋放工返到屋企就叮熱食)…

頭兩年, 大家都接受到, 但漸漸, 要每天都對著焗到黃, 焗到爛的瓜菜, 以及叮完之後又乾又硬的飯和肉, 還有間中不合心水的餸菜… 真的受不了, 但又無奈要接受, 因為實在花唔起時間去煮飯…

直到陶陶出世, 婆婆要求我哋自己請姐姐, 我哋『陶。晢。家』終於有飯香咯~! 還記得第一晚開飯時, 媽媽可以吃到從飯煲舀出來的新鮮飯, 還有青綠爽脆的青菜, 以及脆卜卜的煎雞翼… 簡直感動到想流淚~!

而家每晚開飯, 我哋都會預埋晢晢果份, 等佢感受下一家人一齊食飯o既氣氛(即使佢喺我哋開飯之前都已經食咗)~! 我哋唔會刻意叫晢晢埋位, 因為想佢覺得, 一家人食飯係理所當然o既事(而唔係『被迫』), 幸好佢(暫時)都會好開心咁自動自覺一齊開飯, 雖然好多時都只係食一兩啖飯, 一啖餸, 半碗湯, 但媽媽已經好滿足喇~! 近來, 或許學校教緊『食菜有益』, 晢晢更突破性地喺我哋面前自己夾咗一條菜心食!! 簡直係奇蹟呀!!! (雖然喺個口含咗好耐先吞~!)

某日, 爸爸無聊地走去磅重, 體重一向冇乜大上大落o既佢竟然重咗5磅!!! 爸爸無奈地投訴:『唉, 無計啦, 早睡早起, 三餐定時, 晚飯又食多咗, 唔肥有鬼咯!』(咁都有得懶, 媽媽都服咗佢咯~!)

哈~! 我哋家似乎要考慮買返張餐枱喇~!

                                               

小記: 還記得婚後不久爸爸為媽媽煮的第一餐(亦係唯一一餐)住家飯, 一共有兩個餸, 其中一味係『白烚介蘭』, 第二味, 爸爸先白烚咗少量魚旦及腸仔, 然後放入日清鍚紙包裝的咖哩汁中, 成『咖哩魚旦及腸仔』… 當時爸爸仲滿有自信地問:『煮得好唔好味呢?』, 媽媽心諗『乜煮呢d需要廚藝o既咩!?』… 不過的確好難忘…