陶陶:
眨吓眼我就三個月大啦!
爸爸媽媽都覺得我大得好快
已經過晒初生BB既階段lu~~~
自踏入兩個月開始
我已經會有意識地笑
只要我食飽、瞓飽
喺我身邊同我傾下計
我就會哈哈大笑
氹得身邊o既人好開心~! 
食奶方面
喺媽媽努力下
仍然享受到不同口味的全人奶
有時辣味, 有時朱古力味…
視乎媽媽食過乜嘢啦~!
而自從媽媽返工後
我都接受現實
肯Eat On Schedule啦~!
而家每3個鐘一餐
每餐5.5oz
媽媽放心晒~!
學習方面
都係學下拎頭同講『奀咕』咁啦!
都幾無聊架~!
而且個頭仲畀我拎到後尾枕d頭髮甩晒添呀!
嘻… 都有少少肉酸…
另外
印印姐姐每日都會趁我食飽後同我『溫書』
時而黑白圖, 時而英文, 時而色咭…
我都幾鍾意睇架
可以睇到卡卡聲咁笑 
媽媽亦有訓練我伸脷
當有人對住我伸脷
幾秒後我就會跟住伸脷架啦!
係咪好傻瓜呢???
媽媽仲有教我bu口水
我好快學識咗!
而家一日起碼bu濕3條口水肩 + 1件衫
媽媽感到非常後悔…
睡眠方面
我都算幾抵『打』
日頭食飽奶奶
就會攤喺地墊玩
玩到攰抱我一陣就可以喺床仔瞓一個鐘以上~!
夜晚果覺更抵『打』
食埋臨瞓餐奶
我就會覺覺豬6-7個鐘
讓媽媽可以抖足精神工作
都算鍚住媽媽啦掛~~~
同哥哥相處方面
我哋感情都算唔錯架
哥哥有時會情不自禁走嚟鍚我一啖
又會讚我好得意...
不過哥哥有時都會同我爭媽咪
當我享受緊媽媽奶時
哥哥會扁晒咀投訴『點解妹妹食咁耐架!』
有時媽媽為照顧哥哥
又會由得我自己喊一陣先呵返我
都幾可憐架...
不過冇法啦
媽媽都唔想o既
喊吓當練肺啦~~
同爸爸感情方面呢
雖然好多時爸爸都要陪哥哥玩
但一抽到時間都會抱下我、鍚下我
假期又會同我洗白白、換片片咁
所以我知道其實爸爸都好愛我架
近來愈來愈多人話我似足媽媽
爸爸仲投訴我『冇忽似佢』喎
其實邊係呢
我對耳仔咪似足爸爸囉!
爸爸唔記得之嘛~!
好啦
分享到呢度
我都夠鐘食奶奶啦
啱啱踏入2011
順便祝各位
新年快樂!!!
沒有留言:
張貼留言